Балаҕан ыйын 10 күнүн туругунан күнүс 12 чааска Бүлүү улууһун быыбардааччыларын 52 % куоластаата. Ол эбэтэр, улуус 34 быыбардыыр учаастактарыгар 8812 киһи кэлэн сүрүн сокуоннарынан мэктиэлэнэр бэйэлэрин гражданскай иэстэрин толордулар.
Бырыһыанынан ыллахха, Бүлүү улууһугар саамай элбэх куоластааччы Хаҕын быыбардыыр учаастагар кэлэн куоластаата. Манна испииһэккэ киирбит быыбардааччылартан 73,8 % куоластаата. 60 % кирбиини «Хампа», «Унаардаах», «Баппаҕаайы», «Бөкчөҥөө», «Өкүндү», «Дьөккөн» уонна «Тааһаҕар» быыбардыыр учаастактарыгар куоһардылар.
Бүлүү куоратыгар «Эрчим» спорт киинигэр үлэлиир 148 учаастактааҕы быыбардыыр хамыыһыйа бэрэссэдээтэлэ Луиза Кононова быыбар хаамыытын бу курдук билиһиннэрдэ:
— Бүлүү куоратын 148 нүөмэрдээх «Дорожнай» быыбардыыр учаастагар бүгүн 12 чааска испииһэккэ киирбит 800 быыбардааччыттан 409 киһи куоластаата. Ол эбэтэр, быыбарга дьон 51,1 бырыаһыаннара кытынна.
Биллэн турар, бастакы күн элбэх киһи кэлбитэ. Ол курдук, балаҕан ыйын 8 күнүгэр быыбардыыр учаастакка 259 уонна бэҕэһээ – балаҕан ыйын 9 күнүгэр 129 киһи кэлэн Өрөспүүбүлүкэ Баһылыгын, Ил Түмэн уонна оройуон Сэбиэтин депутаттарын быыбардааһыҥҥа санааларын эттилэр, куоластарын биэрдилэр.
Улуус быыбардааччыларын быыбардыыр учаастактарга тиийэн Конституциянан көрүллэр быраапкытын туһанан куоластыыргытыгар ыҥырабыт!
Николай Куприянов.