Анал байыаннай дьайыыга Бүлүү улууһуттан, Сахабыт сириттэн кытта сылдьар уолаттарбытыгар Бүлүү улууһун көмө оҥорор пуунун үлэһиттэрэ уопсастыбаннай түмсүүлэри, олохтоохтору, тэрилтэлэр үлэһиттэрин кытары бары биир киһи курдук сомоҕолоһон, өстөөх хараҕыттан, дронтан харыстанар сиэккэлэри тиһигин быспакка өрөбүт.
Бүлүү улууһугар анал байыаннай дьайыыга сылдьар уолаттарбытыгар, кинилэр дьиэ кэргэттэригэр көмөлөһөр сыаллаах көмө оҥорор пуун тэриллэн, быыстала суох араас хайысхалаах көмөнү оҥорон үлэлээбитэ 2024 сыл балаҕан ыйын 29 күнүгэр 2-с сылбыт буолар. “Олох суола” хаһыакка балаҕан ыйын 20 күнүгэр таһаарбыт ыстатыйабар Бүлүү улууһуттан анал байыаннай дьайыыга сылдьар уолаттарбытыгар уонна кинилэр дьиэ кэргэттэригэр көмө оҥорор пуун элбэх хайысханан үлэлиирбит туһунан суруйбутум. Бүгүн үһүс хайысхабыт туһунан кылгастык сэгэтэн суруйуом.
Маннык харыстанар сиэккэлэри өрүүнү 2023 сылтан саҕалаабыппыт. Бүгүҥҥү күҥҥэ диэри 346 харыстанар сиэккэ өрүлүннэ. Уоппускаҕа кэлбит уонна контрагынан барар уолаттарбыт иккилии-үстүү обработкаламмыт сиэккэлэри ылан бараллар, бу саас Бүлүү улууһун делегацията СВО-ҕа көмө оҥоро барарыгар 35 харыстанар сиэккэни биэрэн ыыппыппыт, от ыйыгар 43 устуука 8х4 кээмэйдээх улахан сиэккэлэри Дьокуускайга “Якутия с тобой” диэн көмө оҥорор ыстаапка илдьэн туттарбыппыт.
Ол иннинэ акцияҕа кыттыһан хаста да ыыталаабыппыт. От ыйыгар диэри сиэккэлэри атын схеманан өрөр этибит, атырдьах ыйыгар көмө оҥорор пуун салайааччытын солбуйааччы Елена Яковлевна Сивцева Дьокуускай куоракка баран, Светлана Ильинична Архипченко салайааччылаах “ДоброVольцы” диэн харыстанар сиэккэлэри өрөр волонтердарга сылдьан, G диэн схеманан өрөргө үөрэнэн, олортон сиэккэ, лента ылан кэлэн сиэккэ өрө кэлбит дьоннору барыларын үөрэтэлээн, бу күннэргэ 3х5 кээмэйдээх 15 сиэккэ өрүллэн бүттэ. Бу улахан сиэккэлэри өрөн оҥорууга үрүҥ көмүс волонтердар, куорат тэрилтэлэрэ төһүү күүс буоллулар: пенсионнай фонд, сбербанк, “Алмазик” оҕо уһуйаана уонна Бүлүүтээҕи колледж 261 группатын устудьуоннара. Хас биирдии сиэккэ өрөргө көмөлөһө кэлбит киһи бу харыстыыр сиэккэ уолаттарбытын араҥаччылыы, харыстыы сырыттын диэн санаалаах өрөн, илиилэрин сылааһын тиэрдэллэр. Бу курдук тэрилтэлэр салайааччылара күн аайы үлэ чааһын бириэмэтигэр үлэһиттэргитин биир, икки чаас салгыы ыытан көмөлөһүннэрдэххитинэ, ол наһаа улахан төһүү күүс буолуо этэ.
Хаҕын нэһилиэгин “Аҕам саас” түмсүү, салайааччы Оксана Христофоровна Еремеева 8х4 кээмэйдээх улахан тиэхиньикэни сабар икки сиэккэни, 10 ардахтан харыстанар пончалары, 18 сиэлтэн өрүллүбүт угунньалары, 50 харысхалы, 38 үөрэ оттоох, туостаах, сиэллээх ыраастанар набор оҥорон киллэрдилэр.
Бороҕон кырдьаҕас олохтоохторо Августина Васильевна Мальцева, Антонина Васильевна Федорова, Мария Григорьевна Тимофеева, Варвара Григорьевна Тимофеева, Үгүлээттэн “Күбэйэ” түмсүү салайааччыта Парасковья Дмитриевна Афанасьева үөрэ отун хомуйан, хатаран ыыппыттара. Пуун үлэһиттэрэ саас туос хастаан, сайын эмтээх, ыраастанар оттору хомуйан, хатаран, сиэлинэн харысхаллары оҥорон, онно анал мөһөөччүктэри тигэн, таһыгар Бүлүү улууһун былааҕын, биир өттүгэр эр киһи харысхалын түһэттэрэн бэлэмнээбиппитин “Алаһа” түмсүү далбардара Зоя Николаевна Михайлова уонна Мария Михайловна, 1 Күүлэттэн киирэн көмө оҥорор пууҥҥа үлэлэһэ сылдьар “Дьүөгэ” түмсүү салайааччытын солбуйааччы Валентина Афанасьевна Захарова сааһылаан, барытын тус-туспа анал бакыаттарга угаттаан, харысхал мөһөөччүгэр уган бэлэмнээтилэр.
Анал байыаннай дьайыыга сылдьар биир дойдулаахтарбытыгар харыстанар сиэккэ өрүүтүгэр ис сүрэхтэриттэн кыһаллан көмөлөһө сылдьар амарах санаалаах күндү дьоннорбутугар: улуус дьаһалтатын социальнай уонна эдэр ыччат политикатын отделын салайааччытыгар Елена Николаевна Федороваҕа, сүрүннүүр исписэлииһигэр Анна Васильевна Лущевскаяҕа пенсионнай фонда үлэһиттэригэр, салайааччы Ламинария Федотовна Макароваҕа, “Алмазик” уһуйаан үлэһиттэригэр, салайааччы Мария Кимовна Прокопьеваҕа, сбербанк үлэһиттэригэр, салайааччы Марианна Петровна Спиридоноваҕа, Бүлүүтээҕи колледж 261 группатын кураторыгар Александр Васильевич Алексеевка, устудьуоннарга: Сивцева Валерияҕа, Никифорова Даниелаҕа, Николаев Егорга, Таныков Владиславка, Иванов Антоҥҥа, Григорьев Викторга уонна күн аайы үлэлиир үрүҥ көмүс волонтердарга улуустааҕы көмө оҥорор пуун үлэһиттэрин аатыттан улахан махталбытын тириэрдэбит. Билигин бу уустук кэмнэргэ бука бары биир сомоҕо буоллахпытына эрэ бары ыарахаттары туоруохпут.
Уолаттарбыт бары этэҥҥэ дьиэлэригэр эргиллэн кэллиннэр диэн алҕаан туран, балаҕан ыйыгар Дьокуускай куоракка “Якутия с тобой” ыстаапка тикпит таҥастарбытын, харыстанар сиэккэлэри, хас биирдии уолга оҥорбут анал баһыылкаларбытын уонна госпитальга бааһыран эмтэнэ сытар байыастарга анаан тикпит малларбытын илдьэн туттарыахпыт.
Улуус уопсастыбаннай түмсүүлэрэ СВО-ҕа эрэ көмөлөһөр буолбатахтар, улууска, нэһилиэктэригэр, куоракка, өрөспүүбүлүкэҕэ ыытыллар араас тэрээһиннэргэ көхтөөхтүк кытталлар да, тэрийсэллэр да. Ол курдук, балаҕан ыйын 7 күнүгэр Бүлүү куората төрүттэммитэ 390 сыллаах үбүлүөйдээх тэрээһинин арыллыытыгар Бүлүүттэн, Бөтүҥтэн, Өкүндүттэн, 1 Күүлэттэн тиийэ киирэн көхтөөхтүк кытыннылар. Бу тэрээһиҥҥэ киирэн кыттыбыт далбардарга улахан махталбын тириэрдэбин, баҕарабын үрдүктэн үрдүк ситиһиилэри, саха алмааһыныы кытаанах доруобуйаны. Мин эһигинэн киэн туттабын!
Мария Томская, Бүлүү куоратын бочуоттаах олохтооҕо, Бүлүү улууһун уопсастыбаннай түмсүүлэрин уонна СВО-ҕа көмө оҥорор пуун салайааччыта.