Алтынньы 19 күнүгэр М.Н.Жирков аатынан Култуура дыбарыаһыгар ытыктабыллаах төрөппүттэргэ — Саха сиригэр Ийэ, Арассыыйаҕа Аҕа күннэригэр аналлаах наҕараадалары туттарар үөрүүлээх тэрээһин, бырааһынньыктааҕы көхтөөх кэнсиэр тэриллибитэ.
Үөрүүлээх тэрээһиҥҥэ улуус баһылыгын социальнай эйгэҕэ солбуйааччы Александр Прокопьев, Бүлүү куорат баһылыгын солбуйааччы Николай Иванов, улуустааҕы дьахталлар Сэбиэттэрин бэрэссэдээтэлэ Мария Прокопьева, Аҕалар Сэбиэттэрин салайааччы Юрий Тутукаров улуус, куорат сайдыыларыгар сүҥкэн кылааттарын киллэрбит күндү төрөппүттэри – күн-күбэй ийэлэри, эйэҕэс эбээлэри, амарах аҕалары, эрэллээх эһээлэри иһирэх тылларынан эҕэрдэлээтилэр, наҕараадалары туттардылар.
Бу дьоро күн Александр Прокопьев «Бүлүү улууһун Күн-күбэй Ийэтэ» бочуоттаах бэлиэни Тааһаҕар нэһилиэгин Далбар хотунугар, элбэх оҕолоох Мария Прокопьеваҕа ытыс тыаһа доҕуһуолун ортотугар үөрүүлээх быһыыга-майгыга туттарда.
Ийэ күнүнэн итинник бочуоттаах наҕараада Арыылаах нэһилиэгиттэн Мария Ивановаҕа уонна Мария Михайловаҕа, Күүлэттэн Анна Семеноваҕа, Кыргыдайтан Анастасия Кырбасоваҕа, Бороҕонтон Мария Яковлеваҕа, Хаҕынтан Тамара Львоваҕа, Үгүлээтттэн Феодосия Маисоваҕа, Бүлүүттэн Светлана Калачиковаҕа ананна.
Бу киэһэ күн-күбэй ийэлэргэ, эбээлэргэ, аҕаларга, эһээлэргэ чэгиэн доруобуйаны, чөл туругу, сир үрдүгэр баар бары үтүөнү, кэрэни баҕардылар!
«Олох суола».