Салгыыта
Салгыы айаннаан Таганрогка тиийэн таһаҕаспытын сүөккээн баран, Ростовка төннөн, анал байыаннай дьайыы кыттыылаахтарыгар улуустааҕы көмө оҥорор пуун волонтердара госпитальга эмтэнэр буойуттарга анаан тикпит таҥастарбытын, малларбытын Сахабыт сириттэн СӨ Үлэ уонна социальнай сайдыы министиэристибэтин иһинэн СВО кыттыылаахтарын уонна кинилэр дьиэ кэргэттэрин өйүүр Киин отделын салайааччыта Вера Петровна Душкевичка аадырыстаан тирэх пууҥҥа илдьэн туттардыбыт. Бүлүүгэ кэлэн баран Вера Петровналыын телефонунан кэпсэтэ олордохпутуна: “Мин төрдүм Бүлүү ээ, Лөкөчөөнтөн төрүттээхпин”,- диэтэ. Шамаева диэн араспаанньалаах эбит, биһиги маннык күүстээх санаалаах кыыстаахпытынан киэн туттабыт.
“Бүлүү улууһун делегацията Ростов куоракка баар госпитальга анаан аҕалбыт таҥаһа, мала барыта туһалаах. Ис сүрэхтэн тигиллибит малларга илиигит сылааһа, хас биирдии дойду көмүскээччитигэр күүс-көмө буолар. Бүлүү улууһун делегациятыгар, баһылык Сергей Николаевич Винокуровка, анал байыаннай дьайыы кыттыылаахтарыгар улуустааҕы көмө оҥорор пуун волонтердарыгар, салайааччы Мария Петровна Томскаяҕа, бука барыгытыгар истиҥ махталбытын тиэрдэбит”.
Вера Душкевич, СӨ Үлэ уонна социальнай сайдыы министиэристибэтин иһинэн СВО кыттыылаахтарын уонна кинилэр дьиэ кэргэттэрин өйүүр Киин отделын салайааччыта.
Уолаттар Ростов базатыттан баран 8 матассыыкылы атыылаһан, Антон Амбросьев ыытан кэлбит масыынатын иһигэр лип курдук тиэйэн кэбистилэр уонна эмиэ икки массыынанан Таганрог диэки оргууй аҕай айанната турдубут.
Таганрогка Юрий Гвызин дьонун дьиэтигэр 9 буолан бары түстүбүт. Сарсыарда 4 уолга эбии баһыылка оҥордубут, ичигэс таҥас, берца, саппыкы, тактическай бэрчээккэ, тактическай рюкзак, фуфайка, футболка, термобелье, ис таҥас, халыҥ ыстааннаах сон комплегын, маскировочнай сиэккэ, хампыат, бичиэнньэ, «Сыа Бүлүү» СХПХ биэрбит сиробун, барыанньатын, эт кэнсиэрбэтин, арыытын, уган барытын скотчтаан, аадырыстарын суруйан, Москваттан атыыласпыт, бэйэбит тикпит таҥастарбыт ордубутун, барытын Курскайга баар уолаттарбытыгар туспа баһыылка оҥорон бэлэмнээтибит.
Посылкаларбытын оҥорон бүтээппитин опорнай пуунтан массыыналар кэлэннэр, 4 массыынаҕа барытын тиэнэн Новоазовскайга 7 буолан айаннаатылар, опорнай пууҥҥа тиийэн уолаттар заявкаларынан Москваттан атыыласпыт прибордарын, малларын, халыҥ таҥастарын хас биирдии уолга упаковкалаан бэлэмнээбиттэр. Елена биһикки хаалан дьоннорбут киэһэ кэлэллэригэр бэрэски буһаран, ас астаан тоһуйдубут, сарсыарда 5 чааска төттөрү бардылар.
Ахсынньы 1 күнүттэн Бүлүү делегацията үлэтин икки хайысханан саҕалаата.
7 киһилээх делегация Запорожскай уобаластан саҕалаан салгыы биир дойдулаахтарбытын көрсө, уолаттар эрдэ сакаастаабыт прибордарын, таҥастарын-малларын барытын Москваттан атыылаһан, улуустааҕы көмө оҥорор пуун үлэһиттэрэ, үрүҥ көмүс волонтердар, нэһилиэк олохтоохторо, тэрилтэ үлэһиттэрэ, уопсастыбаннай түмсүүлэр, иистэнньэҥнэр, илиилэрин сылааһынан тикпит флисовай, комуфляжнай көстүүмнэрин, таҥастарын, харыстанар сиэккэлэрин, халыҥ ыстааннаах, соннору, дойдуларын ахтылҕаннаах астарын “Сыа Бүлүү” арыытын, барыанньатын, сиробун, эт кэнсиэрбэтин маны барытын уган 31 уолга анал баһыылка оҥорбуппутун уонна дьонноро ыыппыт баһыылкаларын илдьэ айаннаабыттара.
Ахсынньы 1 күнүгэр биһиги күнүс 3 чааска Таганрогтан автобуһунан Москваҕа айаннаан сарсыарда 7 чааска тиийдибит. Гостиницабытыгар малбытын хаалларан баран постпредствоҕа бардыбыт. Биһиги аан бастаан Москваҕа кэлээт да постпредствоҕа Москватааҕы оперштаб СВО кыттыылаахтарын өйүүр оперативнай сулууспатын салайааччыта Лена Афанасьевна Алексееваны кытта көрсөн хайдах үлэлии сылдьарбытын, кини үлэтин билсиспиппит, Москваҕа госпиталларга сылдьан биир дойдулаахтарбытын көрсөр былааннаахпытын эҥин кэпсэппиппит, тоҥ аспыт сороҕун постпредство холодильнигар уурдарбыта. Сарсыарда эрдэ Таганрогкка барыахпыт иннинэ Звенигород диэн куоракка госпитальга сытар биир дойдулаахпытыгар кэргэнэ ыыппыт баһыылкатын уонна дойдутун аһын кэһиилэнэн таксинан баран көрсөн, туохха наадыйарын ыйыталаһан кэлбиппит, барахсан үөрэн бөҕө буолла, кэллибит да сакааскын барытын атыылаһан аҕалыахпыт диэбиппит.
Постпредствоҕа Лена Афанасьевна кабинетыгар хаалларбыт малларбытын ыллыбыт уонна сарсын Звенигородка барабыт диэн массыына көрдөөн заявка биэрдибит, холодильниктан «Сыа Бүлүү» биэрбит фаршын, үүтүн ылаат госпитальга сытар уолаттарбыт сакаастарын ыла Садовод ырыынакка айаннаатыбыт. Гостиницабытыгар киэһэ хойут кэллибит, кэлэн иһэн бурдукпутун эҥин атыыластыбыт. Түспүт хоспутугар плитка, стиральнай, микроволновай оһох, иһит-хомуос барыта баар буолан наһаа абыранныбыт, хобордоохпутун Бүлүүттэн атыылаһан илдьэ сылдьабыт. Тиэстэ охсо охсон, фаршпытын микроволновкаҕа ириэрэн, түүннэри бэрэски бөҕө астаатыбыт, сарсыарда заявкабытынан постпредство массыына биэрэн Звенигород куоракка госпитальга икки уолга үлэспит таҥастарын, малларын, “Сыа Бүлүү” биэрбит үүтүн, сиробун, барыанньатын, арыытын уонна бэйэбит астаабыт бэрэскибитин, урбаанньыт Валентина Григорьева Илизаров аппарааттаахтарга анаан тикпит кэтиинчэтин илдьэн биэрэн, кэтэрдэн уолаттарбыт барахсаттар үөрүү бөҕө буоллулар.
Москваҕа олорор саха волонтер Мария Семеновна Саха сириттэн сылдьар уолаттар ханнык госпитальга сыталларын миэхэ ыыталаан, үс күн госпиталларга ас астаан, 5 госпитальга сылдьан, уолаттарбыт сакаастаабыт таҥастарын, малларын, астарын уонна бэйэбит дойдубут аһын тириэртибит.
Госпиталь барыта куорат таһыгар баар эбит.
Бука бары көмөлөспүт дьоммутугар улуус делегациятын уонна улуустааҕы көмө оҥорор пуун аатыттан улахан махталбытын тириэрдэбит. Түгэнинэн туһанан, кэлэн иһэр саргылаах Саҥа дьылынан итиитик-истиҥник эҕэрдэлиибин. Бу сыл эһиэхэ үтүөнү-кэрэни эрэ аҕаллын, бука бары чэгиэн, доруобай буолуҥ.
Мария Томская, СВО-ҕа улуустааҕы көмө оҥорор пуун салайааччыта.