Анал байыаннай дьайыыга сылдьар биир дойдулаахтарбытыгар улуустааҕы көмө оҥорор пуун өйөбүлэ тохтообот, үһүс сылбытын уолаттарбыт кыайыы үктэллээх дойдуларыгар этэҥҥэ эргиллэллэрин туһугар бары бииргэ сомоҕолоһон үлэлии сылдьабыт, көмө күн аайы салҕанан бара турар.
Байыаннай дьайыылар буола турар сирдэригэр биир дойдулаахтарбытын көрсө барыахтаах Бүлүү улууһун дэлэгээссийэтин састаабыгар киирсэр буолбуппутун билэн баран, СВО кыттыылаахтарыгар улуустааҕы көмөнү оҥорор пуун волонтердара алтынньы ыйтан бэлэмнэнии үлэтин саҕалаабыппыт.
Бэлэмнэнии, баһыылкалары оҥоруу
Улууска саҥа тэриллибит “Победа” фондата үп көрөн, уопсастыбаннай түмсүүлэр бэйэбит харчы кыттыһаммыт, Дьокуускайтан флисовай, камуфляжнай, плащевай, палаточнай, харыстанар сиэккэ матырыйаалларын, фурнитура атыылаһан кэлэммит улуус уопсастыбаннай түмсүүлэригэр, урбаанньыттарга түҥэппиппит, икки нэдиэлэ иһигэр урбаанньыт Валентина Григорьева уолаттар бэйэлэрэ сакаастаабыт 6 флисовай көстүүмнэрин, бэргэһэлэрин, госпитальга анаан сакаастаабыт вещмешоктары Лия Сергеева, Саргылана Иванова, Татьяна Корякина, Айсена Васильева, Парасковья Корякина көмөлөһөн 60 устууканы, Семен Афанасьев 20 устууканы тикпиттэрэ, Семен 50-нуу устуука эр киһи харысхалын уонна улууспут гиэрбэтин быыһабайдыыр массыынанан нашивка оҥорон биэрбитэ.Тылгыны нэһилиэгин иистэнньэҥэ, урбаанньыт Иван Прокопьев 6 көстүүмү, 18 бэргэһэни, Тааһаҕар нэһилиэгин “Күбэйэ” түмсүү чилиэнэ, иистэнньэҥ Туйаара Максимова 8 кэмпилиэк, Сюзанна Баишева 3 кэмпилиэк, Кыадаҥдаттан “Күндэли” түмсүү салайааччыта Варвара Чиряева 5 кэмпилиэк, Чинэкэ нэһилиэгин иистэнньэҥнэрэ 7 кэмпилиэк, Лөкөчөөн нэһилиэгин иистэнньэҥнэрэ 6 кэмпилиэк, флисовай, камуфляжнай байыаннай көстүүмнэри тигэ охсон киллэрбиттэрэ. Тааһаҕар нэһилиэгин “Күбэйэ” түмсүүтэ 10 кээнчэ, 28 вещмешок, 200 руническай сурук, 11 нашлемник, 30 харысхал, 22 сиэлтэн угунньа, 15 дэйбиир, 9 байыаннай көстүүм, 4х6 кээмэйдээх 3 харыстанар сиэккэ, ону таһынан халыҥ сэлиэнчик, куурка, Бөтүҥ нэһилиэгин “Дьүөгэлэр”, “Иис абылаҥа” түмсүүлэр 10 кэтиинчэ, 6 байыаннай көстүүм, 3х5 кээмэйдээх 3 харыстанар сиэккэ, Арыылаах нэһилиэгиттэн “Чэбдигирии” түмсүү 4х8 кээмэйдээх 3 харыстанар сиэккэ, Баппаҕаайы нэһилиэгин “Сүрэҕим баҕатынан” түмсүү 8 техника сабар сиэккэ, угунньа, 1 Чочу нэһилиэгиттэн “Утум ситимэ” харысхаллары, эмтээх оттору анал мөһөөччүктээн, ичигэс таҥастары, урбаанньыт Иван Корякин 7 халыҥ сонноох, ыстааннаах кэмпилиэги, Лөкөчөөн нэһилиэгин олохтоохторо 4 харыстанар сиэккэни, 3 уолга анал баһыылкалары, Халбаакы нэһилиэгэ 3х6 кээмэйдээх харыстанар сиэккэни, 5 уолга тоҥ астаах анал баһыылканы, Өкүндү нэһилиэгин “Холумтан” түмсүүтэ оҕолор суруктарын, 100 харысхаллары анал мөһөөччүктээн, 3х6 кээмэйдээх 3 харыстанар сиэккэлэри киллэртээбиттэрэ. Алексей Кондратьев салайааччылаах “Сыа Бүлүү” СХПК 23 киилэ арыы, 72 устуука отон сироба, 72 устуука барыанньа, 150 эт кэнсиэрбэтэ, 5 устуука потроха, 10-тан тахса киилэ ынах этэ, 10-тан тахса киилэ фарш, 20 устуука үүт, уопсайа, 124 647 солк. суумалаах аһы-үөлү биэрдилэр.
Көмө оҥорор пууҥҥа күн аайы сарсыардаттан киэһээҥҥэ диэри 3х5 кээмэйдээх 48 харыстанар сиэккэлэри пуун үлэһиттэрэ, үрүҥ көмүс волонтердар, тэрилтэ үлэһиттэрэ көмөлөөн өрбүттэрэ, госпитальга анаан 1 Күүлэттэн пууҥҥа үлэлэһэ сылдьар Валентина Захарова 15 косточка, 10 бублик, 10 сыттык, 10 копчик анныгар угуллар сыттык, 10 валик тигэн, онно барытыгар пуун үлэһиттэрэ иһигэр 1х1 сантиметр кыра гына кырыллыбыт таҥаһы, холлофайбер симэттээн тигэн бэлэмнээбиттэрэ.
Бу курдук бэлэмнэнэн, баһыылкалары оҥортоон сэтинньи 23 күнүгэр улуус дьаһалтата массыына биэрэн, 750 киилэ таһаҕастаах Дьокуускайга айаннаатыбыт.
Таһаҕас сүөккээһинигэр Дьокуускай куоракка үөрэнэр устудьуон оҕолорбут күүс-көмө буоллулар. 
Москубаҕа тиийэн баран СВО-ҕа сылдьар, госпитальга сытар уолаттарбыт эбии сакаас биэрбиттэрин толорон, “Садовод” ырыынактан ичигэс таҥас, берца, тактическай бэрчээккэ, тактическай рюкзак, термобелье, ис таҥас, халыҥ ыстааннаах сон комплегын эбии атыыластыбыт.
Москубаттан Таганрог куоракка айан
Бүлүү улууһун баһылыга Сергей Винокуров салайааччылаах дэлэгээссийэ ахсынньы 28 күнүгэр Москваттан икки улахан массыынаны уларсан, бииригэр таһаҕаспытын тиэнэн, бииригэр бэйэбит олорсон Таганрог куоракка 9 буолан Кыһыл Сыыр баһылыга Юрий Гвызин, Чинэкэ баһылыга Антон Амбросьев, Хаҕын баһылыга Роман Софронов, Бүлүү улууһун кииннэммит бибилэтиэкэ ситимин дириэктэрэ Николай Харлампьев, улуустааҕы СВО-ҕа көмө оҥорор пуун салайааччыта Мария Томская, солбуйааччыта Елена Сивцева, улуус дьаһалтатын информационнай отделын сүрүннүүр исписэлииһэ Александра Яковлева уонна биир дойдулаахпыт “Саха сирэ” хаһыат кылаабынай эрэдээктэрэ Александр Тарасов буолан айаннаатыбыт.
Массыыналары нэһилиэк баһылыктара Юрий Гвызин, Антон Амбросьев бэйэлэрэ ыытан бардылар. Мин бэйэм массыынаны ыытабын да хайдах эрэ салла санаатым, олох билбэт сирдэригэр уолаттар төһө да навигатор көмөтүнэн айаннааталлар да эрэллээх баҕайыларыттан наһаа үөрдүм, киэн да тутта санаатым. Биир саамай сөхпүтүм диэн суолбут барыта төлөбүрдээх буолла, төһө ыраатабыт да сыаната ыараан иһэр. Дьэ, итинник айаннаан түүн биир чааска Воронеж куоракка “Жемчужная Лагуна” диэн гостиницаҕа тохтоон, утуйан, сынньанан аастыбыт. Сарсыарда туран салгыы айаннаатыбыт, Воронежка түүн дроновай атаака буола сылдьыбыт, суол чугаһыгар турар ньиэп баазатын биир емкаһын ытан таппыттара умайа турарын баһаарынай массыыналар умуллара сылдьалларын көрөн, хата гостиницаҕа хоммуппут да үчүгэй эбит дии санаатым, оруобуна ол аттынан ааһыа эбиппит…
Салгыыта бэчээттэниэ.
Мария Томская, СВО-ҕа улуустааҕы көмө оҥорор пуун салайааччыта.