Улуус кииниттэн тэйиччи сытар Күүлэт уонна Мастаах түөлбэлэрин нэһилиэктэрин амбулаторияларыгар, ФАП-рыгар сотору кэминэн киһи доруобуйатын туругун быһаарар араас анаалыстары оҥорор лабораториялар үлэлиэхтэрэ.
Ити туһунан улуус дьаһалтатын 2024 сыллааҕы үлэтин отчуоттуур өрүс уҥуордааҕы нэһилиэктэргэ тэриллибит мунньахтарга оройуоннааҕы балыыһа кылаабынай бырааһа, Ил Түмэн депутата Егор Григорьев эппитин дьон улаханнык сэҥээрэ иһиттэ.
Тыа сирин киһитигэр биир-икки анаалыс туттараары таксига ботуччу харчы төлөөн ыраах куоракка охсуулаах суолларынан сахсыллан киирэн-тахсар эрэйдээҕэ биллэр – күн-дьыл, харчы да бара түһэр. Оройуон балыыһатын салалтата дьон туһа диэн ыраах нэһилиэктэргэ сотору кэминэн саҥа анализатордары таһааран туруорууну, үлэһиттэри үөрэтиини тэрийиэхтээх.
Билигин улуус тыатын сиригэр Үгүлээккэ эрэ, быраас амбулаториятыгар, лабораторияны үлэлэтэн анаалыстары оҥороллор. 
Амбулаторияҕа иккис сылын биэлсэринэн үлэлиир Үгүлээттэн төрүттээх Александр Алексеев чиэски сирдэргэ сытар нэһилиэктэргэ анаалыстары оҥоруохха диэн этии киллэрбитин оройуоннааҕы балыыһа салалтата өйөөн, саҥа анализатордары аҕалтаран эрэр. Анестезиолог-реаниматолог идэлээх Александр Алексеев бэйэтэ 18 сыл фтизиатрияҕа, 2 №-дээх өрөспүүбүлүкэтээҕи балыыһаҕа үлэлээбит баай уопуттаах эмчит буолар.
— Тыа сиригэр анаалыс туттарыыны тэрийии тыын бопуруос буолар. Билиҥҥитэ Үгүлээккэ улуус тыатын сиригэр соҕотох лаборатория үлэлиир, барыта 8 көрүҥҥэ анаалыс оҥоробут. Күҥҥэ 4-5 анаалыһы, муҥутаан 18-һы оҥоробут. Урут анаалыһы массыынанан куоракка ыыттахха айана уһун, сөптөөх температурата тутуһуллубат буолан көрдөрүүтэ уларыйара, быраак элбэх буолара. Билигин миэстэтигэр оҥоһуллар анаалыстар баар чахчыны көрдөрөллөр.
Ыксаллаах, экстреннай түбэлтэлэргэ лаборатория анаалыстарын түмүктэрэ олус туһалаахтара көһүннэ.
Биһиэхэ урут Бүлүү лабораториятыгар турбут анализатор үлэлиир. Дьон миэстэтигэр анаалыстары туттаралларын биһирээтилэр, — диэн Александр Алексеев үлэ тэрээһинин кэпсээтэ.
— Олунньу 5 күнүгэр 8 саҥа анализатор кэллэҕинэ Күүлэт, Мастаах нэһилиэктэригэр таһаарыахпыт. Анализатордары үлэлэтэр төһө да улахан ороскуоттааҕын иһин дьон кыһалҕатын өйдөөн итинник хардыыны оҥоробут. Үлэһиттэри Бүлүүгэ үөрэттэриэхпит.
Үгүлээт амбулаториятыгар саҥа массыына ананна, Дьокуускайга кэлэн турар. Саҥа балыыһа туруохтаах сирин олохтоох МАУ тэрилтэтэ оҥордо, онон, хааччыйыыга, тутууга үлэлэһэ олоробут, — диэн Ил Түмэн депутата, оройуоннааҕы балыыһа кылаабынай бырааһа Егор Григорьев билиһиннэрдэ.
Тыа сиригэр киһи доруобуйатын туругун быһаарар сүрүн анаалыстары оҥоруу, мин билэрбинэн, билиҥҥитэ Бүлүү улууһугар эрэ тэрилиннэ. Впервые.
Николай Куприянов.