Олунньу 15 күнүгэр М.Н.Жирков аатынан Култуура дыбарыаһыгар Мария Томская салайааччылаах Бүлүү улууһун уопсастыбаннай түмсүүлэрин 2024 сыллааҕы үлэлэрин түмүктүүр «Уопсастыбаннай түмсүүлэр-модун күүс!» диэн үтүө үгэскэ кубулуйбут үөрүүлээх тэрээһиннэрэ уонна “Бүлүү улууһа эһигинниин бииргэ” диэн анал байыаннай дьайыы кыттыылаахтарыгар, кинилэр дьиэ кэргэннэригэр улуустааҕы көмө оҥорор пуун тэриллибитэ үһүс сылынан күүс-көмө, өйөбүл буолар дьоннорун чиэстээһин буолла.
Бүлүү куоратыттан, нэһилиэктэриттэн 22 түмсүү, нэһилиэктэр баһылыктара, ыҥырыылаах ыалдьыттар, барыта 200 тахса киһи кыттыылаах дьоһун-мааны түһүлгэ саха дьоно барыта ытыктыыр, саха эмчитэ Дьөккөн Сөдүөтүн Айыы алгыһынан саҕаланна. Саха сиэрин-туомун тутуһан түһүлгэ кыттыылаахтара оһуохайдаан дьиэрэттилэр, оһуохай тылын Александр Иванов -Уол Сомоҕо таһаарда. Түмсүүлэр кыттыылаахтара, ыҥырыылаах ыалдьыттара уһун күнү ыытыллыбыт үөрүүлээх тэрээһиҥҥэ толору астаах сандалы тула олорон ирэ-хоро сэһэргэстилэр, ырыаһыттар, үҥкүүһүттэр толорууларын сэргии көрдүлэр, чиэстээһиҥҥэ кытыннылар.
Түмсүүлэр ааспыт сыллааҕы үлэлэрин түмүктэрин, байыаннай дьайыы кыттыылаахтарыгар дьоһуннаах көмөлөрүн Бүлүү улууһун уопсастыбаннай түмсүүлэрин, “Бүлүү улууһа эһигинниин бииргэ” диэн анал байыаннай дьайыы кыттыылаахтарыгар уонна кинилэр дьиэ кэргэттэригэр улуустааҕы көмө оҥорор пуун салайааччыта, өрөспүүбүлүкэтээҕи «Утум» уопсастыбаннай тэрилтэ Бүлүүтээҕи салаатын дириэктэрэ, Бүлүү куорат Бочуоттаах олохтооҕо Мария Томская билиһиннэрдэ.
Кини ааспыт сылга түмсүүлэр элбэх үлэни ыыппыттарын, улууска, өрөспүүбүлүкэҕэ ыытыллар араас тэрээһиннэргэ, акцияларга, субуотунньуктарга көхтөөхтүк кыттыбыттарын бэлиэтээтэ. Байыаннай дьайыы кыттыылаахтарыгар көмө оҥоруутугар үрүҥ көмүс волонтер, «Алаһа» түмсүү салайааччытын, 81 саастаах Екатерина Алексееваны, «Стимул» түмсүү салайааччытын Елена Сивцеваны, кыттыылаахтарын Валентина Кононованы, Ирина Волкованы, Татьяна Петрованы, Галина Иванованы, Мария Михайлованы уо.д.а. үлэлэрин бэлиэтээтэ.
Түмсүү кыттыылаахтара СВО-ҕа көмө оҥорор улуустааҕы пууҥҥа спанбонд матырыйаалтан өрүллүбүт «G» диэн ааттанар дроннары тэйитэр пластик хаххалыыр сиэккэлэри сыанаҕа таһааран көрдөрдүлэр. Бу күн атын да түмсүүлэр үлэлэрин түмүктэрин билиһиннэрдилэр, тепловизор көрбөт бүрүөһүннэрин, сиэккэлэрин кытта оҥороллоро олус хайҕаллаах.
Тылгыныттан Иван Прокопьев СВО кыттыылаахтарыгар анаан кыһыҥҥы сонугар тиийэ тикпит таҥастара, байыаннай көстүүмнэрэ, бейсболкалара дьон болҕомтотун тарта. Кини былырыын социальнай хантыраагынан иистэнэр массыыналары атыыласпыт, бэйэтин сакааһын таһынан түүннэри иистэнэр эбит!
СВО саҕаланыаҕыттан улуус бары түмсүүлэрэ илиилэрин сылааһынан, дууһаларын иэйиитинэн, баҕа өттүнэн, биир-биэс харчыта суох, күннэрин-дьылларын аахсыбакка элбэх көмөнү оҥороллор, оҥоһуктарын байыаннай дьайыылар буола турар сирдэригэр тиэрдэллэр.
Бу дьоро күн улуус түмсүүлэрин кыттыылаахтарыгар улуус баһылыга Сергей Винокуров, оройуон Сэбиэтин бэрэссэдээтэлэ Гаврил Корякин, улуус баһылыгын социальнай эйгэҕэ солбуйааччы Александр Комаров, куорат депутаттарын Сэбиэтин бэрэссэдээтэлин солбуйааччы Александр Колтовской, Култуура сайдыытын уонна норуот айымныьытын киинин салайааччы Алена Дашевская, Бүлүү улууһун бэтэрээннэрин Сэбиэтин бэрэссэдээтэлэ Федор Николаев, Росгвардия Бүлүүтээҕи салаатын, байыаннай дьайыылар кыттыылаахтарын улуустааҕы тэрилтэтин салайааччы Афанасий Константинов элбэх Арассыыйа, Ил Дархан, Саха өрөспүүбүлүкэтин, улуус, куорат таһымнаах Махтал суруктары, кырааматалары, бэлиэлэри туттардылар.
«Сахатранснефтегаз» улуустааҕы филилалын салайааччы Георгий Петров Ил Түмэн депутата Александр Гоголев аатыттан түмсүүлэр кыттыылаахтарын эҕэрдэлээтэ, сэмэй бэлэхтэри туттарда. Мария Томскаяҕа оверлок тигэр масыынаны дохсун ытыс тыаһынан туттарда.
Ил Дархан Айсен Николаев Махтал суруга урбаанньыт Александр Григорьевка, Ил Түмэн сис хамыыһыйатын Бочуоттаах кырааматалара Людмила Павловаҕа, Парасковья Томскаяҕа, Ил Түмэн Бэрэссэдээтэлин солбуйааччы Махтал суруга Варвара Тупринаҕа, Розалия Варфоломееваҕа, Маргарита Новиковаҕа туттарылыннылар. 20 тахса киһиэхэ “СВО кыттыылаахтарыгар көмөлөрүн иһин” бэлиэ туттарылынна.
Улуус баһылыга Сергей Винокуров улуустааҕы көмө оҥорор пуун салайааччытыгар Мария Томскаяҕа профессиональнай иистэнэр массыына ылалларыгар сертификат туттарда.
«Сыл бастыҥ түмсүүтэ» диэн анал бэлиэни уонна 20 тыһ. солк. суумалаах сертификаты Тааһаҕартан Акулина Поскачина салайааччылаах «Күбэйэ» түмсүүгэ, «Амарах санаалаах түмсүү» диэн анал бэлиэни, 15 тыһ. солк. суумалаах сертификаты Баппаҕаайыттан «Сүрэхпит баҕатынан» түмсүүгэ, салайааччы Ирина Жирковаҕа, «Үрүҥ көмүс волонтердар»диэн анал бэлиэни, 10 тыһ. солк. сертификааты I Күүлэттэн «Дьүөгэ» түмсүүгэ, салайааччы Оксана Ивановаҕа туттарда.
«Сыл бастыҥ көмөнү оҥорооччута» анал аат бэлиэни Иван Прокопьевка, «Сыл доброволеһа» аат Семен Афанасьевка иҥэрилиннилэр. Иван Прокопьевка саха эмчитэ Дьөккөн Сөдүөтэ бэйэтин 7000 солк. бириэмийэтин туттарда.
Тааһаҕар нэһилиэгин баһылыга Семен Каратаев «Сыл бастыҥ түмсүүтэ» ааты ылбыт «Күбэйэ» түмсүү туһунан санаатын үллэһиннэ:
— Биһиэхэ элбэх түмсүү үлэлиир. 2012 сыллаахха тэриллибит аҕам саастаах «Күбэйэ» эбээлэр түмсүүлэрэ биир бастыҥ үлэлээх түмсүүнэн буолар. Бастакы сылларыгар улуустааҕы ыһыахха ат симэҕин оҥорон бастаабыттара.
Элбэх түбүктээх уопсастыбаннай үлэҕэ сылдьааччылар киэҥник биллибэттэр-көстүбэттэр, кинилэри сыл түмүгүнэн чиэстээһин олох сөптөөх тэрээһин буолар!
Дьоро күн куорат уопсастыбаннай түмсүүлэрин бастыҥнарыгар номинациялар туттарылыннылар.
“Үрүҥ көмүс волонтердар” анал аат, 7 тыһ. солк. суумалаах сертификат «Оһуор» түмсүүгэ, салайаачы Мария Томскаяҕа, «Амарах санаалаах түмсүү» анал аат, 8 тыһ. солк. суумалаах сертификат “Стимул” түмсүүгэ, салайааччы Елена Сивцеваҕа, “Сыл бастыҥ түмсүүтэ” анал аат, 10 тыһ. солк. суумалаах сертификат «Алаһа» түмсүүгэ, салайааччы Екатерина Алексееваҕа туттарылынна.
Өрөспүүбүлүкэтээҕи “Утум” уопсастыбаннай тэрилтэ Бүлүүтээҕи салаатын дириэктэрэ Мария Томская Үгүлээт нэһилиэгин “Күбэйэ “ түмсүүтүгэр “Сыл бастыҥ түмсүүтэ” анал аат бэлиэни, 10 тыһ. солк. харчынан бириэмийэни, “Үрүҥ көмүс волонтердар” анал аат бэлиэни, 5 тыһ. солк. харчынан бириэмийэни туттарда.
Түмсүүлэр кыттылаахтара баҕа өттүнэн түмсэн үлэлиир, биир санаалаах буолан ордук таһаарыылаахтык үлэлииллэр. СВО кыттыылаахтарыгар күүс-көмө буолаллар. Иистэнэллэрин таһынан үүнэр көлүөнэни иитиигэ, үөрэтиигэ улахан кылааттарын киллэрэллэр.
Байыаннай дьайыылар кыттыылаахтарыгар, кинилэр дьиэ кэргэннэригэр суолталаах көмөнү оҥорор улуус уопсастыбаннай түмсүүлэрэ чиэстэниэхтэрин чиэстэнэллэр, улуус дьонун-сэргэтин, СВО кыттыылаахтарын ааттарыттан истиҥ махтал тылларын истэллэр, модун күүс буолалларын көрдөрөллөр, итэҕэтэллэр!
Николай Куприянов.