Быйылгы сылга Арассыыйаҕа аан дойдутааҕы таһымнаах биир саамай улахан тэрээһиҥҥэ — “Азия оҕолоро” VIII аан дойдутааҕы спортивнай оонньууларга Бүлүүттэн “Үрүҥ көмүс волонтердар” хамсааһын кыттыылаахтара Римма Нестерова, Ксения Семенова, Ираида Евсеева уонна Надежда Парникова ис-санааларыттан күүс-көмө буола сылдьаллар.
Оонньуулар ыытыллар спортивнай эбийиэктэригэр саастаах волонтердары үгүстүк көрүөххэ сөп. Кинилэр ханан киирэргэ табыгастааҕын ыйан, мунаардахха быһааран биэрэллэр, болҕомтолоохтук сыһыаннаһаллар. Быһата, олус туһалаах дьон.
Биһиги Бүлүүттэн сылдьар биир дойдулаахтарбытын көрсөн улаханнык үөрдүбүт. Бүлүү куоратын көхтөөх, олоххо тардыһыылаах, дууһаларынан эдэр бэтэрээннэрэулахан спортивнай тэрээһин таһымнаахтык ыытылларыгар бэйэлэрин кылааттарын киллэрэллэриттэн, спорт бырааһынньыгар сыһыаннаахтарыттан үөрэллэр, астыналлар.
— Бүлүүттэн бэс ыйын 17 күнүгэр “Азия оҕолоро” оонньууларыгар волонтердуу түөрт буолан кэлбиппит уонна спортивнай тэрээһин бүтүөр диэри сылдьабыт. “Дууһабытынан эдэрбит” диэн эрэгийиэннээҕи хамсааһын кыттыылаахтарабыт, — диэн Римма Нестерова билиһиннэрдэ.
— Арассыыйа киин уобаластарыттан уонна кыраайдарыттан кэлбит волонтердары кытта бары бииргэ түмсэн үлэлии сылдьабыт. Быһа холоон, 150 киһи баар диэн ааҕабыт. Спортивнай эбийиэктэргэ күрэхтэһиилэри көрө кэлбит дьоҥҥо көмөлөһөбүт, ыйан-кэрдэн, ханна туох баарын, эбийиэккэ хайа өттүнэн киирэри-тахсары, трибуналарга олорору этэн биэрэбит, — диэн Ксения Семенова билиһиннэрдэ.
—Волонтердары “Азия оҕолоро” VIII спортивнай оонньуулар үөрүүлээх арыллыыларыгар сырытыннарбыттарыттан олус диэн астынныбыт, тэрээһини улаханнык сэргээтибит. Спорт бырааһынньыгар күүс-көмө буолан кыттарбытыттан улаханнык үөрэ, долгуйа сылдьабыт, — диэн Ираида Евсеева этиннэ.
“Үрүҥ көмүс волонтердар” хамсааһыннарыгар 55 саастарыттан үөһэ саастаахтар кытталлар. Хамсааһын 2013 сыллаахха Казань куоракка Универсиада кэмигэр төрүттэммитэ. Арассыыйаҕа волонтердар үксэ улахан таһымнаах спортивнай күрэхтэһиилэргэ көмөлөһөллөр. Кинилэр анал спортивнай таҥаһынан, аһылыгынан, өссө олорор сиринэн эмиэ хааччыллаллар.
Бүлүүттэн кэлбит дууһаларынан эдэр “үрүҥ көмүс волонтердар” спортивнай оонньуулар таһымнаахтык ыытыллалларыгар дьоһун кылааттарын киллэрэллэр.
Николай Куприянов.