Ытыктабыллаах Сергей Николаевич, Ян Анатольевич! Үбүлүөйдээх Бүлүү куоратын күндү олохтоохторо!
Биһиги, Н.Г. Чернышевскай аатынан Бүлүүтээҕи педагогическай училищены араас сылларга бүтэрбит выпускниктар, олус күндүтүк уонна истиҥник саныыр Бүлүүбүт куоратын 390 сыллаах өрөгөйдөөх үбүлүөйүнэн истиҥ-иһирэх эҕэрдэбитин холбуурбутун көҥүллээҥ!
Араас сылларга Бүлүү куоратыгар эрчимнээх эдэр сааспыт ааспыт дьон ханна да, хаһан да буолларбыт Бүлүүбүтүн олус истиҥник саныыбыт, ахтабыт. Бэйэбит кэммитигэр Саха сирин араас муннуктарыттан, ийэ-аҕа көрүүтүттэн саҥа тэйбит, сорохторбут тулаайах да ыччаттар, кырылас кумахтаах биэрэктээх Бүлүү куоратын булан, суон сурахтаах үөрэх кыһатыгар уһаарыллан, олус истиҥ, көрсүө Бүлүү дьонун кытта алтыһан, кинилэрдиин бодоруһан бэйэбит кэммитигэр араас үлэни үлэлээн, саҥа Саха өрөспүүбүлүкэтин да салайсан кэллибит. Биллэн турар, онно тапталлаах учууталларбыт, училищебыт, Бүлүү куоратын үтүөкэннээх олохтоохторо сүҥкэн сабыдыаллаахтар. Күн бүгүн кинилэргэ биһиги махталбыт муҥура суох.
Эдэр сааспыт кэрэ кэмнэрэ ааспыт сирэ –Бүлүү куората саҥа үйэ балысхан сайдыытын тэтимин кытта тэҥҥэ сайдарын көрө-истэ олоробут, олус астынабыт, тэҥҥэ үөрсэбит! Улуус да, куорат да олоҕор үөрэммит училищебыт сайдыыны, ситиһиини түстэһэриттэн үөрүүбүт икки бүк үрдүүр!
Саха аймаҕы үөрэхтээһиҥҥэ сүҥкэн кылааты киллэрсэр, үтүө-мааны дьонноох, өрүү ахтар-саныыр Бүлүүбүт куората, үйэлэргэ албан аатырдын, сирдьит сулус буолан кэҥии-чэлгийэ турдун! Эдэр дьон эрчимигэр, ыччат дьон кыаҕар уйдаран Бүлүүбүт өрүү эдэр буоллун!
Барыгытыгар чэгиэн-чэбдик туругу, уйгулаах олоҕу, ыраас халлааны баҕарабыт!
Бүлүү педучилищетын араас көлүөнэ выпускниктарын аатыттан:
К.Е Павлов, Аҕа дойду Улуу сэриитин бэтэрээнэ, СӨ бочуоттаах гражданина, СӨ норуотун хаһаайыстыбатын үтүөлээх үлэһитэ;
К.Е. Иванов, СӨ бочуоттаах гражданина, СӨ норуотун хаһаайыстыбатын үтүөлээх үлэһитэ, судаарыстыбаннай деятель;
К.К. Корякин, СӨ норуотун хаьаайыстыбатын үтүөлээх үлэһитэ, судаарыстыбаннай деятель;
А.Е. Алексеев, РФ уонна СӨ физическэй культуратын уонна спордун үтүөлээх үлэһитэ;
П.Т. Тумусов, СӨ норуотун хаһаайыстыбатын үтүөлээх үлэһитэ, экономическай наука кандидата;
Е.М. Махаров, РФ уонна СӨ үтүөлээх деятелэ, философскай наука доктора;
Р.З. Алексеев, СӨ наукаларын үтүөлээх деятелэ, медицинскэй наука доктора;
В. С. Иванова-Зверева, Саха АССР үтүөлээх учуутала, учууталлар учууталлара;
Г.А. Фролова, поэтесса, Саха сирин суруйааччыларын союһун чилиэнэ, СӨ культуратын туйгуна;
В.С. Нанова-Солдатова, СӨ норуотун хаһаайыстыбатын үтүөлээх үлэһитэ, общественник, поэтесса;
В.Н.Ксенофонтов, Россия журналистарын союһун чилиэнэ, СӨ суруйааччыларын союһун чилиэнэ, Өймөкөөн улууһун бочуоттаах гражданина уо.д.а.