Бүлүү эбэ өлгөм балыктааҕынан былыр былыргыттан биллэр. Манна олорор элбэх дьон бэртээхэй балыксыттарынан биллэллэр. Балыксыт күнүгэр анаммыт тэрээһиҥҥэ алта саастаах балыксыт оҕоттон саҕалаан барыта 53 киһи күөгү араас көрүҥнэринэн күрэххэ кытыннылар.
«Балыксыт күнэ» Бүлүү куорат кыраайы үөрэтэр музейын аннынан биэрэгэр буолла. Күрэхтэһиини Бүлүү куорат дьаһалтата, куорат Сэбиэтин депутаттара уонна Бүлүү улууһун айылҕа харыстабылын инспекциятын көҕүлээһининэн Бүлүү куорат киэн туттар олохтооҕо, биллиилээх кыраайы үөрэтээччи, Үлэ Геройа П.Х. Староватов төрөөбүтэ 150 сылыгар уонна Үлэ сылыгар ананан тэрилиннэ.
Балаһыанньа быһыытынан биэс араас номинациянан балыксыттар үлэлэрин дьүүллүүр хамыыһыйа сыаналаата.
Ити күн Бүлүү өрүс кумахтаах биэрэгиттэн күөгүһүттэр борохой, тэҥэли, кыһыл харах, күстэх, алыһар, хаахынай, бэл, сыа балыгы күөгүлээн ыллылар.
«Бастакы балык» диэн номинацияҕа Маныкин Эльдар (6 кылаас, 1 N-дээх оскуола) бастаата, иккис — Иванов Вячеслав (9 кылаас, 2-с N-дээх оскуола), үһүс — Васильев Михаил (Бүлүү гимназиятын үлэһитэ).
Аҕам саастаахтарга 63 саастаах Захаров Архип Михайлович бастаата, иккис — 61 саастаах Софронов Роман Егорович, үһүс — 57 саастаах Тимофеева Татьяна Афанасьевна буоллулар.
Саамай эдэр саастаах балыксыттарга 6 саастаах Иванова Харитина хотто, иккис миэстэҕэ — 9 саастаах Григорьева Алиса, үһүскэ — 9 саастаах Колодезникова Алиса таҕыстылар.
Саамай элбэх балыгы Николаев Владимир (Бүлүүтээҕи профпедколледж) -1 миэстэ, Маныкин Эльдар — 2-с уонна Бүлүүтээҕи профпедколледж устудьуона Спиридонов Василий (3-с миэстэ) туттулар.
Саамай сыаналаах балыктары Маныкин Эльдар (1 миэстэ), Иванов Вячеслав (2-с) уонна Николаев Владимир (3-с) туттулар.
Күрэххэ туруоруллубут сыаналаах бириистэри улуус уонна куорат дьаһалталара, «Светофор» маҕаһыын, куорат Сэбиэтин депутата Валентин Иванов, улуус Сэбиэтин депутата Александр Григорьев, Бүлүү улууһун айылҕа харыстабылын инспекцията спонсордаатылар.
Хамыыһыйа маннык күрэхтэһиини сылын аайы ыытары быһаарда.
Андрей Яковлев.