Бүлүү куоратын «Эрчим» спорт комплексыгар ыытыллыбыт улуус бэтэрээннэрин 7- с спартакиадатыгар 14 нэһилиэк уонна Бүлүү к.толору састааптаах хамаандалара спорт 7 көрүҥэр илин-кэлин түсүһэн сытыы киирсиилэри көрдөрдүлэр.
Быйылгы спартакиада Саха Өрөспүүбүлүкэтин уһулуччулаах государственнай диэйэтэлэ С.М.Аржаков төрөөбүтэ 125 сылыгар уонна Бүлүү к. 390 сыллаах үбүлүөйүгэр ананан ыытылынна. Улуус баһылыга Сергей Винокуров, бастакы солбуйааччыта Иван Иванович Евсеев, бэтэрээннэр улуустааҕы Сэбиэттэрин бэрэссэдээтэлэ Герасим Солтуев спартакиада кыттыылаахтарын эҕэрдэлээн тыл эттилэр.
Ол курдук бэтэрээннэр хамаандалара теннискэ, дуобакка, саахымакка, ытыыга, дартска, хабылыкка, хаамыскаҕа, 60 метргэ сүүрүүгэ, бальнай үҥкүүлэргэ күрэхтэстилэр.
Түмүккэ саамай үчүгэй бэлэмнээх Чочу нэһилиэгин бэтэрээннэрин хамаандата (баһылык Петр Догоюсов, бэтэрээн Сэбиэтин бэрэссэдээтэлэ Галина Гоголева) бастакы миэстэни ылан, кыайыы үрдүк өрөгөйүн толору биллилэр. Иккис миэстэҕэ Чернышевскай нэһилиэгин бэтэрээннэрин хамаандата таҕыста (баһылык Антон Амбросьев, бэрэссэдээтэл Раиса Сортоева), үһүс миэстэни тыымпылар бэтэрээннэрин хамаандата ылла (баһылык Акимар Михайлов, бэрэссэдээтэл Акулина Митясова).
Кыайыылаахтарга, бириистээх миэстэлэргэ тиксибиттэргэ мэтээллэр, Бочуотунай грамоталар туттарылыннылар. Итини сэргэ улуус бэтэрээннэрин Сэбиэтин бэрэссэдээтэлэ Герасим Солтуев Бүлүү улууһун бочуоттаах бэтэрээннэрин аатын ылбыт Лөкөчөөнтөн Розалия Николаевна Дмитриеваҕа, Кыргыдайтан Павлина Дмитриевна Кырбасоваҕа, Бороҕонтон Март Михайлович Спиридоновка анал лиэнтэлэрин, дастабырыанньаларын үөрүүлээх быһыыга туттарда.
Итини сэргэ быйылгы спартакиадаҕа пааранан бальнай үҥкүүлэргэ — фигурнай вальска краковякка ыытыллыбыт күрэхтэр мустубут дьон болҕомтотун тарта, биһирэбилин ылла. Ол курдук өрөспүүбүлүкэҕэ бальнай үҥкүүлэргэ куруутун инники күөҥҥэ сылдьар «Ай-Лаана» бөлөҕү сэргэ (салайааччы Светлана Зинурова) нэһилиэктэртэн, куораттан элбэх үҥкүүһүттэр кыттыбыттара кэрэхсэбиллээх. Дьиэ кэргэн сылынан бальнай үҥкүүгэ ситиһиилээхтик кыттар кэргэннии паараларга Бүлүүттэн С.К. Дмитриеваҕа уонна Н.Н. Семеновка, Бөтүҥтэн Петровтарга анал Кубоктар туттарылыннылар.
200- чэкэ кыттааччыны түмпүт бэтэрээннэр спартакиадалара доҕордоһуу дьоро киэһэтинэн уонна хамаандалар бэлэмнээбит бэртээхэй кэнсиэртэринэн түмүктэннэ. Ол курдук Балаҕаччы бэтэрээннэрин Сэбиэтин бэрэссэдээтэлэ Мария Алексеева узбекскай үҥкүүтүнэн көрөөччүлэр биһирэбиллэрин ылыан ылла. Чинэкэттэн Гаврил Иванов, Өкүндүттэн Иван Данилов, Кыргыдайтан Анна Иванова, Бороҕонтон Наталья Прокопьева, Чочуттан Валерий Иванов, Тоҕустан Иван Константинов ырыалара уо.д.а. толоруулара дохсун ытыс тыаһынан доҕуһуолланнылар.
Ити курдук үс Геройдаах Бүлүү улууһун бэтэрээннэрэ сыл аайы үгэс быһыытынан ыытыллар спартакиадаларыгар түмсэн көрсүһэн, кэпсэтэн, общественнай үлэлэригэр элбэҕи билэн-көрөн тарҕастылар.
Муза Федорова.
Николай Федоров хаартыскаҕа түһэриитэ.