СӨ Бырабыытылыстыбатын отчуотун түмүк мунньаҕа Бүлүү куоратыгар М.Н.Жирков аатынан култуура дыбарыаһыгар олунньу 9 күнүгэр ыытылынна. Бу иннинэ тыа хаһаайыстыбатын миниистирэ Артем Александров салайааччылаах делегация түөрт бөлөххө арахсан үс күн устата улуус 21 нэһилиэгэр үлэлээтэ.
Уопсайа отчуокка улуус үрдүнэн 1500 кэриҥэ киһи кыттыыны ыллылар.
Миниистир Артем Александрович Александров өрөспүүбүлүкэҕэ 2023 сылга ыытыллыбыт үлэ-хамнас түмүктэрин билиһиннэрдэ. Ол курдук 2023 сылга Саха өрөспүүбүлүкэтин экэниэмикэтэ Уһук Илиҥҥэ бастыҥ позициятын күүһүрдүбүтүн, эрэгийиэннээҕи баалабай бородуукта 2022 сылы кытта тэҥнээтэххэ 3,5 бырыһыан улааппытын тоһоҕолоон бэлиэтээтэ. Сүрүн сорукпут – Саха сирин нэһилиэнньэтин олоҕун-дьаһаҕын таһымын үрдэтии. Россия Федерациятын Бэрэсидьиэнин көҕүлээһининэн онуоха туһуламмыт национальнай бырайыактар олоххо киирэллэр. 2023 сылга 70 млрд солкуобай, ол иһигэр федеральнай бүддьүөттэн 54 млрд солкуобай ыытылынна. 2023 сылга өрөспүүбүлүкэҕэ 57 социальнай эбийиэк, ол иһигэр национальнай бырайыактар сүнньүлэринэн 30 эбийиэк тутулунна – диэн кэпсээтэ.
— Бүлүү улууһугар былырыын уопсайа 87 боппуруос турбут буоллаҕына, мантан 22-тэ туолбута, — диэтэ Артем Александров.
Бырабыыталыстыба бөлөҕүн салайааччыта кылгастык тыл эппитин кэннэ дьон-сэргэ улуус олоҕор-дьаһаҕар сыһыаннаах ыйытыылары биэрдилэр, санааларын үллэһиннилэр, туруорустулар.
Сүрүннээн Бүлүүгэ 990 миэстэлээх оскуола, гаас уот станциятын, спорт эбийиэктэрин, оҕо уһуйааннарын, дьиэ-уот тутуутун туруорустулар. Сибээс тупсарыгар, онно даҕатан интэриниэт өҥөтө ыараханын ыйдылар. Нэһилиэктэри гаас ситимигэр холбооһун, суол-иис өрөмүөнэ, хаарбах дьиэттэн көһөрүү үлэтэ өссө тэтимнээхтик барарыгар, элбэх оҕолоох дьиэ кэргэттэргэ бэриллэр учаастактар толору хааччыллыылаах буолалларыгар баҕа санааларын эттилэр.
Куорат депутаттарын Сэбиэтин бэрэссэдээтэлэ Николай Харлампьев гаас-уот станциятын тутуу Бүлүү эҥэригэр тыын боппуруоһунан буолар диэн тоһоҕолоото. Бу баараҕай эбийиэк тутуутун чинчийэргэ бырабыыталыстыба хамыыһыйата тэриллэн, саҥа ЛЭП эбэтэр гаас-уот станцията тутар ордугун чопчулуоҕа, манна АЛРОСА, Росатом курдук бөдөҥ хампаанньалар интэриэстээхтэрин көрдөрбүттэрин оробуочай бөлөх кыттыылаахтара кэпсээтилэр. Маны таһынан Николай Харлампьев 390 сыллаах үбүлүөйүнэн сибээстээн Бүлүү куоракка өрөспүүбүлүкэ таһымнаах куорат статуһун иҥэрэргэ ыҥырда. Бу боппуруос үбүлүөй чэрчитинэн судургутук быһаарыллар кыахтааҕын туһунан хоруй бэрилиннэ.
Ытык Сүбэ бэрэссэдээтэлэ Герасим Солтуев үлэ бэтэрээнигэр мэтээл олохтуохха уонна Кыайыы 80 сыла буолаары турарынан 2025 сылы сэрии сылларын оҕолоругар аныахха диэн туруоруста. Михаил Семенович Томскай Саха сирэ киэн туттар чулуу киһитэ Г.И.Чиряев төрөөбүтэ 100 үбүлүөйдээх сылын көрсө Кыадаҥдаҕа таас түмэли тутары туруоруста.
Сытыы, болҕомтону ирдиир элбэх ыйытыылар, туруорсуулар боротокуолга киирдилэр. Кэккэ ыйытыылар тустаах министиэристибэлэргэ, биэдэмистибэлэргэ аадырыстаныахтара диэн бигэргэннэ. Дьону-сэргэни долгутар боппуруостарга тутатына сиһилии быһаарыылар, быһаччы сүбэлэр бэрилиннилэр.
Көрсүһүү кыттыылаахтара бырабыыталыстыба отчуотун сүнньүнэн биһирииллэрин биллэрдилэр, үрдүктүк сыаналаатылар.
Изольда Загитова.