Ахсынньы 22 күнүгэр Бүлүү куоратын М.Н.Жирков аатынан Култуура дыбарыаһыгар Саха сиригэр физкултуура хамсааһына саҕаламмыта 100 сылын бэлиэтиир үбүлүөйдээх 2023 сылга улуус спорка түмүктэрин таһаарар «Чемпионнар баалларыгар» бастыҥ спортсменнары, спорт бэтэрээннэрин, тэрийээччилэри чиэстээтилэр.
Ааһан эрэр сылы Бүлүү спортсменнара кэккэ ситиһиилэрдээх түмүктээн эрэллэр. Номоххо кэпсэнэр Бүлүү күүстээхтэрин, быһыйдарын удьуордаабыт спортсменнар ааттара быйыл киэҥ түһүлгэлэргэ элбэхтик ааттанна, дорҕоонноохтук иһилиннэ.
Саха спордун национальнай хабылык, хаамыска көрүҥнэригэр Бүлүү спортсменнара быйыл өрөспүүбүлүкэҕэ хамаанданан уонна биирдиилэн бастаатылар.
2023 сыл сайыныгар ыытыллыбыт Саха сирин үөрэнээччилэрин спартакиадаларыгар Бүлүү оҕолоро хамаанданан иккис миэстэни ылбыттара, буулдьанан ытыыга уонна көҥүл тустууга хамаанданан бириистээх миэстэлэргэ тиксибиттэрэ.
Ааспыт сайын Аммаҕа доруобуйаларынан хааччахтаах спортсменнарга ыытыллыбыт «Дьулуур» спорт адаптивнай көрүҥнэрин спартакиадатыгар Бүлүү улууһун хамаандата бастакы бөлөххө үһүс бочуоттаах миэстэни ылары ситиспитэ.
2023 сылга Саха сирин муниципальнай тэриллиилэрин икки ардыларыгар буулдьалаах саанан ытыыга Бүлүү улууһа эмиэ инники күөҥҥэ таҕыста.
Өрөспүүбүлүкэ нэһилиэктэрин икки ардыларыгар мас тардыһыыга «Нэһилиэк» бырайыакка» Чернышевскай нэһилиэгэ икки сыл хамаанданан субуруччу бастаата.
2023 сылга волейболга, сахаболга «Бүлүү Кубогар» хамаанданан күрэхтэһиигэ бүлүүлэр эмиэ бастаабыттара.
Биирдиилээн спортсменнар Арассыыйа, Саха сирин таһымнаах күрэхтэһиилэргэ бастаатылар, призер буоллулар.
2023 сылга саха спордун национальнай көрүҥнэригэр бастыҥ спортсменнарынан — «Сахаада-спорт» ассоциация спортивнай лауреаттарынан Бүлүү улууһуттан хапсаҕайга маастар Николай Николаев, саха оҕунан ытыыга Арассыыйа спордун маастара Клара Спиридонова, хабылыкка, хаамыскаҕа маастар Андрей Захаров ааттаннылар.
Өр сылларга Бүлүү улууһун спордун ситиһиилээхтик салайбыт Гаврил Евсеевкэ 2023 сыл өрөспүүбүлүкэ саха национальнай спордун көрүҥнэрин бастыҥ тэрийээччитин, «Сахаада-спорт» ассоциация лауреатын аата иҥэрилиннэ.
Гаврил Евсеев дьиэ кэргэнин усулуобуйатынан атырдьах ыйыгар үлэтиттэн тохтоон, Дьокуускайга көспүтэ. Өрөспүүбүлүкэтээҕи күрэхтэһиилэри, сыл түмүгүн таһаараары сэтинньи ый ортотуттан сыл бүтүөр диэри спорт управлениетын бэрэссэдээтэлин эбээһинэһин толоро сылдьар. Ити кэмҥэ мас тардыһыыга Иван Евсеев, хапсаҕайга Василий Румянцев өрөспүүбүлүкэтээҕи турнирдара үрдүк таһымнаахтык тэрилиннилэр, Бүлүү хапсаҕайдьыттара Федерация Кубогар бэркэ туһуннулар, сыл түмүгүн таһаарар «Чемпионнар бааллара» тэрээһиннээхтик ыытылынна.
«Чемпионнар баалларыгар» элбэх наҕараада туттарылынна, бастыҥнар ааттаннылар уонна чиэстэннилэр. «Саха Өрөспүүбүлүкэтин спордун бэтэрээнэ» бэлиэ Анна Игнатьеваҕа, «Бүлүү улууһугар физическэй култуура уонна спорт сайдыытыгар кылаатын иһин» бэлиэ Бороҕон баһылыгар Андрей Ивановка, спорт бэтэрээннэрин улуустааҕы Сэбиэтин бэрэссэдээтэлигэр Константин Прокопьевка туттарылыннылар.
«Саха Өрөспүүбүлүкэтигэр физкультурнай хамсааһын 100 сыла» үбүлүөйдээх бэлиэ спорт бэтэрээннэригэр Киргиэлэй Мосовка, Матвей Дорофеевка, Раиса Томскаяҕа, Макар Маисовка, Саргылана Сивцеваҕа, Алексей Хабытчаровка, Антон Поповка, Александр Григорьевка, Николай Федоровка, барыта 27 киһиэхэ туттарылынна.
Итинник бэлиэни Н.Г.Чернышевскай колледжыгар үлэлээбит, национальнай көрүҥнэргэ элбэх чемпионнары иитэн таһаарбыт тириэньэр Григорий Васильевка туттарыыга колледж дириэктэрэ Иван Алексеев, физическэй култуура отделениетын сэбиэдиссэйэ Максим Соломонов уо.д.а. кытыннылар, сыанаҕа тахсан истиҥник эҕэрдэлээтилэр, бэлэх туттардылар.
«Чемпионнар баалларыгар» 2023 сыл бастыҥ 10 спортсменнарын ааттара ааттанна. Бүлүү улууһун 2023 сыл бастыҥ спортсменнарынан Роман Николаев (көҥүл тустуу), Федор Харлампьев (хапсаҕай), Клара Спиридонова (оҕунан ытыы), Рамир Николаев (компакт-спортинг), Мария Догоюсова (буулдьалаах саанан ытыы), Валентина Данилова (чэпчэки атлетика), Николай Николаев (хапсаҕай), Валентина Евдокимова (оҕунан ытыы), Надежда Павлова (кикбоксинг), Ая Давыдова (хабылык, хаамыска) буоллулар.
Оскуола үөрэнээччилэрин ортолоругар 2023 сыл бастыҥ спортсменнарынан Али Лобашев (оҕунан ытыы), Сандал Прокопьев, Михаил Семенов (көҥүл тустуу), Рашид Мусин (бокс), Айаал Поскачин, Дисар Дмитриев (кикбоксинг), Владислав Данилов (чэпчэки атлетика), Афанасий Егоров (буулдьалаах саанан ытыы), Илья Федоров (хайыһар), Ян Михайлов (мас-рестлинг) аттаннылар.
2023 сыл спорка лауреаттара ааттаннылар. «Бастыҥ спортивнай дьиэ кэргэн» көрүҥэр Наталья уонна Антон Поповтар, «Бастыҥ бэтэрээн спортсмен» — Светлана Михайлова, «Адаптивнай спорт көрүҥэр бастыҥ спортсмен» — Айгимар Нифонов, «Спорт бастыҥ испэсэлииһэ» — Валентина Протопопова, «Маассабай спорду бастыҥ тэрийээччи» — Алексей Николаев, «Бастыҥ федерация» көрүҥэр Гаврил Иванов салайааччылаах хабылык, хаамыска, Эдуард Болдонов салайааччылаах оҕунан ытыы федерациялара, «Спорт спонсорынан» -ат сүүрдүүтүн федерациятын бэрэссэдээтэлэ, тыа хаһаайыстыбатын департаменын салайааччы Павел Иннокентьев, «Спортивнай нэһилиэк баһылыга» Чернышевскай нэһилиэгин баһылыга Антон Амбросьев, «Спорка бэриниилээх буолуу» номинация хаһаайыннарынан Николай Сыромятников, Маргарита Куличкина, Александр Корякин, Василий Романов буоллулар.
Итини тэҥэ, соторутааҕыта Федерация Кубогар бочуоттаах 3 миэстэни ылбыт Бүлүү улууһун хапсаҕайга сүүмэрдэммит хамаандатыгар улуус дьаһалтата 300 тыһ. солк. суумалаах сертификаты туттарда. Бүлүү улууһун үгүс олохтооҕо телевизортан икки күн арахсыбакка сытыы хапсыһыылары болҕойон көрдүлэр, биир дойдулаахтарыгар кыайыыны баҕардылар. Бүлүү хапсаҕайдьыттара Федерация Кубогар 3 миэстэни ылар хапсыһыылара улуус олохтоохторун түмпүтэ, сомоҕолоһуннарбыта, киэҥ туттууну үөскэппитэ саарбаҕа суох.
Спорт дьону түмэр, төрөөбүт дойдунан киэн туттарга, патриот буоларга олук уурар!
Николай Куприянов.