Сахалыы тыыннаах кырдьаҕас «Чолбон» сурунаал кулун тутар 4 күнүттэн өрөспүүбүлүкэ 12 улуустарын уонна Дьокуускай куораты хабан «Чолбон өй күрэһэ. Улахан оонньууну» саҕалаабыта. Күрэс Бүлүү куоракка кулун тутар 15 күнүгэр Ыччат библиотекатыгар ыытылынна.
Тэрээһин дьиэ кэргэнинэн ааҕыыны көҕүлүүр сыаллаах, быйыл Россияҕа Дьиэ кэргэн, өрөспүүбүлүкэбитигэр Оҕо саас сылыгар ананна. «Чолбон» бырайыагын СӨ култуураҕа уонна духуобунай сайдыыга министиэристибэтэ, «Сахабэчээт» СӨ судаарыстыба автономиялаах тэрилтэтэ өйүүллэр.
Оонньууга орто уонна үрдүкү кылаастарга үөрэнэр оҕолор төрөппүттэрин уонна эбэлэрин, эһэлэрин кытта, ол эбэтэр үс көлүөнэ сахалыы айымньылары, суруйааччылар олохторун билиигэ күрэхтэстилэр.
Ыччат библиотекатыгар оонньууну “Чолбон” сурунаал бас эрэдээктэрэ Гаврил Андросов, эппиэттиир сэкиритээр Туйаара Павлова, СӨ суруйааччыларын Сойууһун чилиэнэ Ангелина Шадринова-Суоһааны иилээн-саҕалаан ыыттылар. Уопсайа 7 дьиэ кэргэн кытынна.
Онньуу 4 түһүмэхтээх, ол курдук сахалыы литературатын төрүттээччилэр, бастакы норуодунай суруйааччылар, сэрии саҕанааҕы уонна кэннинээҕи литература уонна билиҥҥи кэм суруйааччылар тустарынан боппуруостар бэрилиннилэр. Хас биир ыйытыкка бэрт кылгас бириэмэ бэриллэринэн оонньуу тэтимнээхтик, сытыытык барда. Маны таһынан түһүмэх кэнниттэн сөптөөх эппиэттэр биллэриллэн, бары кыттааччылар да, ыалдьыттар да саха литературатын туһунан билиилэрин хаҥаталларыгар кыах бэрилиннэ.
Тыҥааһыннаах күрэхтэһии түмүгүнэн 27 баалы ылан Тааһаҕартан Каратаева Ольга Самуиловна, Куланова Тамара Евгеньевна уонна Григорьева Саяна (8 кылаас үөрэнээччитэ) дьиэ кэргэттэрин хамаандата бастаата. Иккис миэстэни биир эрэ баалынан хаалан Тоһууттан Петрова Светлана Николаевна, Миронова Полина Николаевна, Терентьева Сайаана (7 кылаас) хамаандата ылла. Үһүс миэстэҕэ 22 бааллаах Ионовтар хамаандалара — Марианна Константиновна, Айталина Александровна, Юлия (5 кылаас) таҕыста. Бастаабыт хамаанда Дьокуускайга полуфиналга Бүлүү улууһун чиэһин көмүскүөҕэ.
Бары кыттыбыт дьиэ кэргэттэр туоһу суруктарынан бэлиэтэннилэр, кыайыылаахтар кинигэ бэлэҕи туттулар. Улуустааҕы киин библиотека директора Николай Харлампьев оонньуу тэрийээччилэригэр махтанан туран, сэмэй бэлэхтэри туттарда.
Изольда Загитова.