Быйыл сааскыттан «Доруобуйа» национальнай бырайыак чэрчитинэн Бүлүү куоратыгар доруобуйа харыстабылын эбийиэгин — Балыыһа комплексын иккис уочаратын тутуу тэтимнээхтик ыытыллар. Саҥа эбийиэк – үс мэндиэмэннээх таас дьиэ 4 тыһ. кв. м иэннээх буолуоҕа.
Атырдьах ыйын 1 күнүгэр тутааччылар дьиэ каркааһын ситэрбит буоллахтарына, билигин икки мэндиэмэн истиэнэлэрин таһаардылар, мэндиэмэннэр икки ардыларын бүрүйдүлэр, дьиэ сарайын тутууну саҕалаатылар.
Тутууну Балыыһа комплексын бастакы уочаратын дьиэтин туппут «Кинг-95» тэрилтэ ыытар. Балыыһа комплексын бастакы дьиэтин тутуута хаачыстыбалааҕын үлэһиттэр, ыарыһахтар ахталлар. Эмтэниини ааһар ыарыһахтар толору хааччыллыылаах тупсаҕай палаталарга сыталларын, мэдиссиинэ үрдүк технологиялаах өҥөлөрүнэн, WI—FI-нан туһаналларын этэллэр.
П.А.Петров аатынан оройуоннааҕы киин балыыһа кылаабынай бырааһа, Ил Түмэн депутата Егор Григорьев билиһиннэрбитинэн, Балыыһа комплексын иккис дьиэтигэр терапия, акушер-гинекология, оҕону эмтиир, киһи доруобуйатын чөлүгэр түһэрэр, сүрэх-тымыр, диагностика отделениелара үлэлиэхтэрэ, саҥа томограф — МРТ тэрил туруоруллуохтаах.
— Баараҕай эбийиэги тутар «Кинг-95» тэрилтэ тутааччылара тэтимнээхтик үлэлииллэр. Быйыл эбийиэк холлоҕоһо бүтүөхтээх, дьиэ таһа ситэриллиэхтээх. Тутааччылар эһиил уотун, ититиитин уо.д.а. ситимнэри таҥыахтара, дьиэ иһин оҥоруохтара. Былаан быһыытынан, доруобуйа харыстабылын саҥа эбийиэгэ эһиил Саҥа дьыл иннинэ үлэҕэ киириэҕэ, — диэн Егор Григорьев билиһиннэрдэ.
Ил Түмэн депутата Егор Григорьев салайааччылаах оройуоннааҕы киин балыыһа салалтата тутууну күүскэ хонтуруоллаһарын тэҥэ, Балыыһа комплексын иккис дьиэтин аныгы оборудованиелаах отделениеларыгар үлэлиэхтээх быраастары эрдэттэн үөрэттэриини ыытарын бэлиэтиэххэ сөп.
Николай Куприянов.