Бүлүүгэ – хапсаҕай турнира

Рустам Прокопьев уонна Иван Алексеев хапсаҕайга Баһылай Румянцев турнирын муҥутуур кыайыылаахтара

Ахсынньы 2-3 күннэригэр Бүлүү куоратын «Эрчим» спорт уораҕайыгар Василий Гаврильевич Румянцев бирииһигэр хапсаҕайдаһан тустууга «А» категориялаах өрөспүүбүлүкэтээҕи турнир буолан ааста.

Саха сиригэр физическэй култуура үйэлээх үбүлүөйүгэр аналлаах быйылгы турнир үөрүүлээх арыллыытыгар Саха АССР физическэй култууратын үтүөлээх үлэһитэ, Д.П.Коркин аатынан физическэй култуура салаатыгар Саха Өрөспүүбүлүкэтин Судаарыстыбаннай, «Барҕарыы» пуонда Бириэмийэлэрин лауреата, Бүлүү уонна Уус Алдан улуустарын Бочуоттаах олохтооҕо, Саха Өрөспүүбүлүкэтигэр, Бүлүү улууһугар тустуу, үөрэҕирии сайдарыгар улахан өҥөлөөх, аатырбыт тустуук Василий Гаврильевич Румянцев уола, бүлүүлэр күтүөттэрэ Андрей Румянцев бүлүүлэргэ Баһылай Румянцев аатынан күрэхтэһиини 24 төгүлүн тэрийбиттэригэр дьиэ кэргэнин, аймахтарын ааттарыттан улахан махталларын биллэрдэ.

Турнир көбүөрүгэр 70 тахса хапсаҕайдьыт тахсан күөн көрүстэ, сытыы хапсыһыылар аастылар, эдэр хапсаҕайдьыттар биллэр-көстөр маастардары туораталаан таһымнара биллэ үрдээбитин көрдөрдүлэр. Көбүөргэ үксэ Бүлүү, Үөһээ Бүлүү, Кэбээйи хапсаҕайдьыттара бастыҥ аатын былдьастылар, итини сэргэ, Ньурба, Горнай улуустарын, Дьокуускай, Хаҥалас тустууктара күүстэрин-кыахтарын холостулар.

Улуус дьаһалтата «Вконтакте» порталга икки күн күрэхтэһииттэн быһа биэриитин элбэх киһи киирэн көрдө.

Өрөспүүбүлүкэтээҕи таһымнаах турнир сытыы хапсыһыыларын Александр Васильев-Көрдүгэн улаханнык сэргэхситтэ, тустуук, учуутал Василий Гаврильевич олоҕун, үлэтин туһунан кэпсээнэ дьон болҕомтотун тарта.

Турнир кылаабынай судьуйатынан аан дойдутааҕы кылаастаах маастар Андрей Яковлев, көбүөр судьуйатынан Дьөккөнтөн спорт бэтэрээнэ, өрөспүүбүлүкэтээҕи күрэхтэһиилэргэ үлэлиир Вячеслав Иванов, арбитрынан Тылгыныттан өрөспүүбүлүкэтээҕи улахан күрэхтэһиилэр хапсыһыыларын ыытар Аркадий Васильев үлэлээтилэр.

57 киилэ ыйааһыҥҥа финалга үөһээ бүлүүлэр: уопуттаах тустуук Александр Егоров уонна эдэр эрчимнээх Пантелеймон Николаев чемпион аатын былдьастылар. Хапсыһыыга Баһылай Румянцев турнирын урукку сылларга үрүҥ көмүс уонна боруонса призера Александр Егоров утарсааччытын атахха киирэн охторон, кыһыл көмүс мэтээл хаһаайынынан буолла. Кэбээйи улууһун кэлиҥҥи сылларга көстөр-биллэр Мукучу хапсаҕайга киинин иитиллээччитэ Дмитрий Иванов үһүс миэстэни ылла.

65 киилэҕэ 15 тустуук көбүөргэ тахсыбыта. Финалга Бүлүү бөҕөһө Андрей Сивцев Мукучу хапсаҕайга киинин иитиллээччитэ, билигин Үөһээ Бүлүүтэн тустар Олимпий Васильевы кыайда. Үһүс миэстэни Үөһээ Бүлүүттэн Иван Былачаев ылла.

75 киилэҕэ финалга бүлүүлэр көрүстүлэр. Бүлүүлэр инники эрэллэрэ, быйыл кыһыҥҥы күрэхтэһиилэргэ бэркэ тустубут эдэр хапсаҕайдьыт Василий Григорьев икки маастары кэннигэр хааллартаата. Кини финалга күүстээх маастары, биллэр хапсаҕайдьыты Дмитрий Ушницкайы охторон чемпион үрдүк аатын ылла. Үһүс миэстэҕэ  Үөһээ Бүлүүттэн өрөспүүбүлүкэ күүстээх маастара Рустам Прокопьев таҕыста.

85 киилэҕэ чемпион үрдүк аатын Ньурбаттан маастар Айан Петров ылла, иккискэ – Бүлүүттэн Сергей Алексеев, үһүскэ — Үөһээ Бүлүүттэн күүстээх маастар Борис Тарасов таҕыстылар.

95 киилэҕэ Кэбээйи улууһуттан Павел Николаев бастаата, үрүҥ көмүс призерунан Горнайтан Эрсан Соркомов, боруонса призерунан Бүлүү- ППК бэрэстэбиитэлэ Максим Алексеев буоллулар.

95 киилэттэн үөһэ Бүлүү-ХИФУ бэрэстэбиитэлэ Иван Алексеев чемпион буолла, иккиһи – Ньурбаттан Дмитрий Нехоруков, үсүһү — Бүлүүттэн Александр Алексеев ыллылар.

Бэтэрээннэргэ 60 киилэҕэ Хаҥалас хапсаҕайдьыта, маастар Петр Соломонов чемпион буолла, Бүлүү хапсаҕайдьыта Анатолий Сергеев үрүҥ көмүс мэтээли ылла, боруонса призерунан Кэбээйиттэн Петр Соловьев буолла.

70 киилэҕэ Ньурба маастара Петр Осипов бастаата, иккис миэстэҕэ — Горнайтан Альберт Васильев, үһүскэ – Бүлүү Кыргыдайыттан Егор Осипов таҕыстылар.

80 киилэҕэ Үөһээ Бүлүү маастара Иван Григорьев бастаата, киниэхэ Бүлүү Илбэҥэтиттэн Дмитрий Иванов күүстээх утарсыыны оҥордо. Үһүс миэстэҕэ Үөһээ Бүлүү маастара Руслан Николаев таҕыста.

90 киилэҕэ Үөһээ Бүлүү маастара Федор Данилов чемпион буолла, иккискэ – Бүлүүттэн Сергей Сантаев таҕыста, үсүһү Горнайтан Петр Пахомов ылла.

90 киилэттэн үөһэ Бүлүүттэн икки маастар хапсыһыыларыгар очукуонан Константин Мандаров кыайыыны сурунна, иккис – Вячеслав Иванов, үһүс миэстэни Дьокуускайтан Алексей Николаев ыллылар.

Чемпионнарга, призердарга мэтээллэр, кырааматалар, бастакы, иккис буолбуттарга харчынан сертификаттар, үһүс миэстэлэри ылбыттарга бириистэр туттарылыннылар.

75 киилэҕэ диэри күрэхтэһии муҥутуур кыайыылааҕынан Үөһээ Бүлүү күүстээх маастара Рустам Прокопьев буолла. Кини финалга эдэр кэскиллээх тустуукпутун Василий Григорьевы бүтэһик мүнүүтэҕэ кыайда уонна Бүлүү улууһун дьаһалтата туруорбут 50 тыһ. солк. бирииһин хаһаайынынан буолла.

75 киилэттэн үөһэ ыйааһыҥҥа Бүлүүттэн Иван Алексеев Үөһээ Бүлүү күүстээх маастарын, элбэх күрэхтэһии кыайыылааҕын, 90 киилэҕэ бастаабыт Федор Даниловы тэбэн охторон турнир абсолютнай чемпионунан буолла. Кини быйылгы турнирга ыйааһыныгар уонна абсолютнайга бастаабытын бэлиэтиэххэ сөп. Киниэхэ Уус Алдан улууһун дьаһалтата туруорбут бирииһэ — 50 тыһ. солк. туттарылынна.

Улуус спорка кэмитиэтин урукку салайааччыта Гаврил Евсеев хапсаҕай турнирын ыытарга биир сүрүн тэрийсээччи буолбутун, кылгас кэмҥэ улууска таһымнаахтык ыытыллыбыт икки өрөспүүбүлүкэтээҕи күрэхтэһиилэр тэрээһиннэригэр быһаччы кыттыыны ылбытын ахтыахха сөп.

2025 сыллаахха Василий Гаврильевич Румянцев бирииһигэр маастар нуормалаах өрөспүүбүлүкэтээҕи турнир 25 төгүлүн ньиргиэрдээхтик ыытыллыа диэн эрэниэххэ.

Николай Куприянов.