Алтынньы 12-14 күннэригэр Бүлүү куоратыгар спорт маастарыгар кандидаттар Юрий Николаев уонна Михаил Константинов бириистэригэр кикбоксинҥа оскуола оҕолоругар аһаҕас күрэхтэһии буолан ааста.
Күрэхтэһиини Бүлүү куоратын салалтата, В.Г.Румянцев аатынан Бүлүүтээҕи спортивнай оскуола уонна Саха өрөспүүбүлүкэтин кикбоксиҥҥа федерацията оскуола оҕолоругар доруобай олоҕу тарҕатар, ис кыахтарын күүһүрдэр, талааннаах оҕолору булар сыаллаах тэрийэн ыыттылар. Манна бириис туруорааччы Юрий Алексеевич Николаев бэйэтинэн кэлэн ыытыста уонна ДЮСШ тренер-преподавателлэрэ Георгий Владимирович Халабышев, Артур Александрович Васильев сүрүннээтилэр.
Кэлбит оҕолор бары быраас толору бэрэбиэркэтин ааһан баран, күрэхтэһиигэ киирдилэр. Былаан быһыытынан судейскай семинар, мандатнай хамыыһыйа үлэтэ уонна күрэхтэһээччилэр ыйааһыннарын чуолкайдааһын ыытылынна.
Күрэхтэһии балаһыанньа быһыытынан үс көрүҥҥэ араарыллан ыытылынна: лоу-кик (2008-2009 уонна 2011-2012 сыллааҕы төрүөх уолаттарга, 2010-2011 сыллааҕы төрүөх кыргыттарга), как-лайт (2012-2013 сыллааҕы төрүөх уолаттарга), кик-лайт (2012-2013 сыллааҕы төрүөх кыргыттарга). Уопсайа үс түһүмэҕинэн барда: бастакы, түмүк иннинээҕи уонна түмүк күөн көрсүһүү. Барыта 62 оҕо кытынна, Бүлүү куоратыттан, Халбаакыттан, Тылгыныттан (ДЮСШ) уонна Бүлүүттэн “Саһарҕа” хамаандатын оҕолоро, ону таһынан Хатастан, Ньурбаттан, Дьокуускай куораттан кэлэннэр үчүгэй тыҥааһыннаах киирсиилэри көрдөрдүлэр.
Түмүккэ хас биирдии көрүҥҥэ кыайыылаахтар билиннилэр, ону таһынан спецпризтээх анал ааттар хаһаайыннарынан буоллулар: “Перспективный спортсмен” — Лебедев Данил (Бүлүү к. “Саһарҕа” хамаанда), “За красивый бой” — Колтовской Фрол (Халбаакы ДЮСШ), Оев Яхе (Дьокуускай куорат), “Лучший боец” — Григорьев Данил (Дьокуускай куорат).
Күрэхтэһии олус сэргэхтик буолан ааста, кыттааччы оҕолор уонна ыалдьааччылар астынан тарҕастылар.
Анна Николаева,
ДЮСШ методиһа.