Бүлүү куоратыгар Каландарашвили аатынан уулуссаҕа «Суугунуур күөх хатыҥнаах тапталлаах уулуссам» диэн мааны ааттаах өйдөбүнньүк баннердаах сквер арылынна.
Ол курдук 1951 сыллаахха Нестор Каландарашвили аатын сүгэр уулуссаҕа бастакы дьиэ тутуллубута. Бу кэмтэн ыла тупсаҕай оҥоһуулаах, бөҕө туруктаах чааһынай дьиэлэр кэккэлэспиттэрэ. Билигин сайын аайы үүнэн силигилии турар баай хатыҥнары уулусса олохтоохторун эһэлэрэ — эбэлэрэ, ийэлэрэ — аҕалара мас тэлиэгэнэн тиэйэн аҕалан олордубуттар.
Бу сквер оҥоһуллуутугар туох баар ыытыллыбыт үлэни «ТУСМ» уокуругуттан куорат Сэбиэтин дьокутаата Елизавета Загитова иилээн — саҕалаан ыытта.
«390 үтүө дьыала» акция чэрчитинэн, атын уокуруктарга уонна нэһилиэктэргэ холобур буолар үлэ, куоратын туһугар чахчы ыалдьар уонна кыһаллар дьокутаат үлэтэ», — диэн куорат баһылыга Ян Попов бэлиэтээтэ.
«Дьоммут саҕалаабыт үтүө үгэстэрин салҕаан, тапталлаах Бүлүүбүт куората чэчирии сайдарыгар күүс — көмө буолан көҕөрдүөҕүҥ, ырааһырдыаҕыҥ!» — диэн ыра санаанан салайтаран, куораппытыгар өссө биир саҥа сквер баар буолла.
Диана Новгородова.