Саха сирин физическэй култуураҕа уонна спорка үлэһиттэрин III өрөспүүбүлүкэтээҕи сийиэстэрин ахсынньы 15 күнүгэр ыытыллыбыт түмүктүүр тэрээһинигэр ааһан эрэр 2023 сыл бастыҥ спортсменнара, тэрийээччилэрэ ааттаннылар.
Саха спордун национальнай көрүҥнэригэр бастыҥ спортсменнарынан — «Сахаада-спорт» ассоциация 2023 сыллааҕы спортивнай лауреаттарынан Бүлүү улууһуттан хапсаҕайга маастар Николай Николаев, тириэньэрэ Виктор Соловьев, саха оҕунан ытыыга Арассыыйа спордун маастара Бөтүҥтэн Клара Спиридонова, тириэньэрэ маастар Филипп Соловьев, остуол оонньуутугар – саҥа олохтоммут бырабыыланан хабылыкка, хаамыскаҕа Саха сирин бастакы маастара, хапсаҕайга маастар Андрей Захаров, тириэньэрэ Элеонора Николаева ааттаннылар!
Саха спордун 2023 сыл 9 бастыҥ спортсменнарын ортолоругар 3 Бүлүү улууһун бэрэстэбиитэллэрэ ааттаммыттара ураты көстүү буолла!
Өр сылларга Бүлүү улууһугар спорду ситиһиилээхтик салайбыт, саха национальнай спордун көрүҥнэрэ сайдалларыгар кылаатын киллэрбит Гаврил Евсеев Саха сиригэр 2023 сылга саха национальнай спордун көрүҥнэригэр бастыҥ тэрийээччинэн, «Сахаада-спорт» ассоциация лауреатынан ааттанна. Кини бу бириэмийэ лауреатынан ситиһиилээх үлэтигэр 2018 сыллаахха эмиэ билиниллибитэ.
Быйыл Бүлүү улууһун спортсменнара саха национальнай спордун көрүҥнэригэр: оҕунан, буулдьалаах саанан ытыыга, хабылыкка уонна хаамыскаҕа өрөспүүбүлүкэҕэ хамаанданан бастаабыттара, хапсаҕайга төрдүс буолбуттара.
Мас тардыһыытыгар «Сахаада-спорт» ассоциация 2023 сыллааҕы лауреатынан Бүлүү Бороҕонун күтүөтэ, мас тардыһыытыгар аан дойду чемпиона Константин Жирков буолла.
Итини сэргэ, сийиэһи түмүктүүр тэрээһиҥҥэ И.Л.Кондаков аатынан гимназия физкултуураҕа учуутала Ким Семенов 2023 сылга «Физическэй култуура бастыҥ учуутала» өрөспүүбүлүкэтээҕи номинация лауреатынан ааттанна.
Биир дойдулаахпыт Альберт Васильев Саха сиригэр Бүтүн Арассыйатааҕы ГТО комплексын нормативтарын туттарыыга бастыҥ салайааччы буолла, кини биир дойдулаахтарын кытта ситимнээхтик үлэлии олорор.
Саха сирин 10 бастыҥ спортсменын иһигэр кик-боксиҥҥа Орто Бүлүүттэн төрүттээх Арассыыйа спордун маастара Вадим Колтовской киирбитин бэлиэтиэххэ сөп.
Быйылгы «Дьулуур» адаптивнай спорт көрүҥнэригэр спартакиадаҕа бүлүүлэр бөлөхтөрүгэр үһүс миэстэни ылбыттара, 2026 сыллааҕы Бүлүүгэ тэриллиэхтээх спартакиада былааҕын аҕалбыттара.
Ааспыт сайын Саха сирин үөрэнээччилэрин спартакиадатыгар Бүлүү хамаандата ситиһиилээхик кыттыбыта, эдэр оонньооччулар саахымакка Дьокуускай куорат кэнниттэн иккис миэстэни ылбыттара. Эдэр спортсменнар көҥүл тустууга, буулдьалаах саанан ытыыга бириистээх үһүс миэстэҕэ тиксибиттэрэ.
Саха сиригэр физическэй култуура уонна спорт хамсааһына 100 сыллаах үбүлүөйдээх сылыгар спорт национальнай көрүҥнэригэр дьоһун ситиһиилээх спортсменнарбытын, спорт тэрийээччилэрин эҕэрдэлиибит!
Николай Куприянов.