Хас биир киһи олоҕор аҕа сүҥкэн оруоллаах. Кини оҕо ис кыаҕын арыйар, кэскилин түстүүр, үтүө киһи буола улаатан тахсарыгар кыһаллар. Саха Өрөспүүбүлүкэтигэр кэнники сылларга аҕа оруолун үрдэтиигэ, дьиэ кэргэн үнсүтүүтүн бөҕөргөтүүгэ, дьэ кэргэн сыаннаһын, чөл олоҕу, аҕа буолар эппиэтинэһин тарҕатыыга улахан суолтаны уураллар. Бүлүү улууһугар Аҕа Сүбэтэ уопсастыбаннай тэрилтэ кэккэ сылларга таһаарыылаахтык үлэлээн кэллэ. Бүгүн биһиги Аһа Сүбэтин бэрэссэдээтэлин Юрий Иванович Тутукаровы кытта кэпсэттибит.
— Бастатан туран, убаастабыллаах Бүлүү улууһун аҕаларын барыларын бүгүҥҥү өрөспүүбүлүкэҕэ бэлиэтэнэр Аҕалар күннэринэн Бүлүүтээҕи Аҕа Сүбэтэ уопсастыбаннай тэрилтэ аатыттан истиҥник эҕэрдэлиибит! Барыгытыгар дьолу-соргуну, туруктаах олоҕу баҕарабыт, Байанайгыт өрүү тосхойо турдун, Күөх боллох мүчүк гыннын, өрүү өттүк харалаах, илии тутуурдаах сылдьыҥ!
Бүлүүтээҕи Аҕа Сүбэтэ 2017 сыллаахтан тэриллэн үлэлиир. Биһиги киэҥ хабааннаах үлэни ыытабыт. Ол курдук биир сүрүн хайысхабытынан бырайыактарга үлэлэһии буолар, ол эбэтэр баар социальнай көстүүлэри, дьиэ кэргэҥҥэ оҕону иитиигэ баар проблемалары быһаарарга туһуламмыт бырайыактары толкуйдаан олоххо киллэрэбит.
Бу бырайыак аҥардас ийэлэргэ иитиллэр, тулаайах, төрөппүт көрүүтэ суох хаалбыт уол оҕолорго туһуланар. Ол курдук оҕолорбутун булка сыһыаннаах саха омук төрүт үгэстэригэр үөрэтэбит, сыһыарабыт, куйуур, муус аннынан балыктааһын, муҥха буоллун, барытыгар уолаттары илдьэ сылдьан бу бырайыак иһинэн сатабылга уонна эр киһи буоларга үөрэтэбит.
Бырайыак 2018 сыллаахха Бэрдьигэстээххэ буолбут педагогическай дьаарбаҥкаҕа бастыҥ социальнай бырайыак номинациятын хаһаайына буолбута. 2022 сыллаахха Кемерово куоракка фонд Гордеевой “Все для детей” диэн ааттаах форумугар эмиэ бастыҥ социальнай бырайыак аатын ылбыта, өрөспүүбүлүкэ чиэһин көмүскээбитэ. 2023 сылга социальнай харалта эйгэтигэр профессиональнай маастарыстыба Бүтүн Россиятааҕы куонкуруска бу бырайыакпыт бастаан турар. Маны таһынан 2024 сыл саҥатыгар Бэрэсидьиэн граннарын Пуондатын бастакы куонкурсун кыайыылааҕа буолла уонна федеральнай грант ылла. Билигин бу бырайыакпытын 2024 сылга уонна 2025сыл аҥарыгар федеральнай үбүнэн реализациялыыбыт.
Уонна бу бүгүҥҥү буруолуу сылдьар үөрүүлээх сонуммунан үллэстиэхпин баҕарабын, ол курдук Майаҕа буола турар XXIV өрөспүүбүлүкэтээҕи “Аҕа-2024 Күрэҕэр” Баппаҕаайыттан сылдьар Дмитрий Маркович уонна Дьулусхан Ивановтар дьиэ кэргэттэрэ иккис миэстэ буоллулар.
Бигэ дьиэ кэргэн олоҕо – аҕа, оттон дьиэ кэргэн бигэ судаарыстыба акылаата буолар. Биһиги, аҕалар, бэйэбит холобурбутунан оҕолорбутун төрөөбүт дойдуларын, дьиэ кэргэттэрин таптыыр, аҕа саастаах көлүөнэҕэ ытыктабыллаах буолалларыгар иитэн таһаарыахтаахпыт, саха норуотун үтүө үгэстэригэр үөрэтиэхтээхпит. Биһиги уопсастыбаннай тэрилтэбит бигэ туруктаах дьиэ кэргэн элбии турарыгар, оҕо иитиитигэр аҕа суолтата үрдүүрүгэр бэйэтин кылаатын киллэрэр.
Изольда Загитова.