В.О.Каратаев аатынан Олоҥхо дьиэтигэр Бүлүү улууһун «Харысхал» волонтердар түмсүүлэрин кыттыылаахтара: ыаллар эбээлэрэ, ийэлэрэ, кинилэр кэргэннэрэ кэлэн, СВО-ҕа сылдьар биир дойдулаахтарыгар маскировка сиэккэлэрин оҥорон, таҥас-сап хомуйан, байыаннайдарга аадырыстаммыт баһыылкалары, нэһилиэктэр түмсүүлэрэ ыыппыт малларын мунньан, СВО буола турар сиригэр ыыталлар.
Түмсүү малы-салы таксинан Дьокуускайга быһа сөмөлүөккэ ыытар эбит. Москубаҕа сөмөлүөтү көрсөннөр, «Харысхал» ыыппытын Новоазовскайга утаараллар, анарааҥылар опорнай пууннарынан тарҕаталлар уонна байыаннайдарга быһаччы туттараллар.
Дьиэлэриттэн дьоннорун кэһиилэрин, суруктарын туппут байыаннайдар «Харысхал» түмсүүгэ махтаналлара, истиҥник саныыллара биллэр.
«Харысхал» волонтердар түмсүүлэрэ кинилэргэ элбэхтик көмөлөһөр Москубаҕа Бастайааннай Бэрэстэбиитэлистибэҕэ үлэлиир Лена Алексееваҕа махталлара улахан. Түмсүүлэр Москуба уонна Санкт-Петербург волонтердарын кытта билсэллэрин, волонтердар үлэ кэнниттэн ас буһаран уолаттары аһаталларын махтана эттилэр.
— Ыам ыйын 3 күнүгэр Улуу Кыайыы күнүн көрсө II Күүлэт уонна Чинэкэ нэһилиэктэрин, Кыһыл Сыыр бөһүөлэгин уонна «Харысхал» түмсүүлэрин эбээлэрэ, ийэлэрэ тикпит маскировка сиэккэлэрин, байыаннайдарга 28 аадырыстаммыт баһыылкаларын ыыттыбыт.
Барыта СВО буола турар сиригэр тохсус төгүлүн мал-сал ыыттыбыт. Такси суоппардара ыытар тэриллэрбитин босхо таһан абырыыллар. Бу сырыыга такси суоппара Николай Федоров сөмөлүөккэ илдьэрдии айаннаата.
Үтүө санаалаах дьон аттыбытыгар үксүү турдуннар, бары харыстаһа, уолаттарбытын харыстыы сылдьыаҕыҥ! – диэн түмсүү салайааччыта Светлана Иванова ыытар үлэлэрин ис хоһоонун билиһиннэрдэ.
Үтүө санаалаах «Харысхал» түмсүү кыттыылаахтара СВО-ҕа сылдьар биир дойдулаахтарыгар туох кыалларынан көмө оҥороллоро хайҕаныах, өйөнүөх эрэ тустаах.
Николай Куприянов.