Музей волонтердара ыаллыы сытар Үөһээ Бүлүү улууһун Харбалааҕар соторутааҕыта саҥа арыллыбыт И.Н. Барахов аатынан култуура Киинигэр үлэлии турар Ем. Ярославскай аатынан өрөспүүбүлүкэтээҕи музей филиалын сэдэх экспонаттарын астына көрөн, элбэҕи истэн-билэн кэллилэр.
Филиал дириэктэрэ Светлана Даниловна Копыленко, исписэлиис Евдокия Павловна музей киэҥ-куоҥ саалаларын барытын сиһилии көрдөрдүлэр, Саха Автономиятын төрүттэспит И.Н. Барахов олоҕун, үлэтин, дьонун-сэргэтин туһунан олус интэриэһинэйдик кэпсээтилэр, элбэх ыйытыыларга чопчу эппиэттэри биэрдилэр.
Манна Бүлүүбүт чаҕылхай дьоно, биллиилээх государственнай-политическай деятеллэр Аржаков Степан Максимович, Чиряев Гавриил Иосифович тустарынан баай матырыйааллаах стендэлэри улаханнык киэн тутта көрдүбүт.
Салгыы иккис этээскэ таһааран киэҥ-куоҥ киинэ көрөр сааланы көрдөрбүттэриттэн эмиэ олус астынныбыт. Биһигини үөрэ-көтө көрсүбүт уонна барытын кэпсээн, сиһилии көрдөрбүт Харбалаах филиалын эйэҕэс-сайаҕас үлэһиттэригэр махталбытын тириэрдэбит, кэлэн иһэр сааскы бастакы бырааһынньыгынан истиҥник эҕэрдэлиибит.
Ити курдук чахчы да барыбытыгар үөрүүнү-көтүүнү бэлэхтээбит, биһигини айаҥҥа тэрийэн ыыппыт П.Х. Староватов аатынан Бүлүүтээҕи кыраайы үөрэтэр музей дириэктэригэр Татьяна Николаевна Афанасьеваҕа, волонтердар үлэлэрин салайааччы Василина Васильевна Тараховскаяҕа уонна олус кыһаллан көрөн-истэн илдьэ сылдьыбыт суоппарбытыгар Дмитрий Борисович Захаровка улахан махталбытын тириэрдэбит.
Түмүккэ быһааран эттэххэ, бу сылга Бүлүүтээҕи кыраайы үөрэтэр музей коллектива 1970-нус сылларга улуустааҕы “Октябрь суола” хаһыакка фотокорреспонденынан үлэлээбит Сердцев Дмитрий Федорович түһэрбит хаартыскаларыгар киирбит дьон ааттарын чуолкайдааһыҥҥа үлэ бэтэрээннэриттэн волонтердары тэрийэн биир дойдулаахпыт баай архыыбын үөрэтиини саҕалаата.
Муза Федорова.
Анастасия Ощепкова түһэриитэ.