В.Г. Румянцев аатынан оҕо спортивнай оскуолатыгар чэпчэки атлетиканан үгүс оҕо утумнаахтык дьарыктанар. Сүүрүүгэ, ыстаҥаҕа, многоборьеҕа күрэххэ улууспут чиэһин куруутун ситиһиилээхтик көмүскүүбүт.
Мин, Ионова Наина, Бүлүүтээҕи И.Л. Кондаков аатынан гимназия 9 «б» кылааһын үөрэнээччитэбин. Сүүрүүнэн үһүс сылбын дьарыктанабын. Тренерим Рожина Туяра Ивановна, СӨ уопсай үөрэхтээһин уонна физическэй култуура туйгуна, РФ бастакы категориялаах судьуйата. Уопсайа, икки сменанан 50 оҕо буолан дьарыктанабыт. Биһиги, улахан кылаастар, үөрэхпит кэнниттэн киэһэ өттүгэр дьарыктанабыт.
Спордунан дьарыктаныы киһини бэрээдэктээх, күннээҕи режими сөпкө аттарар, үрдүккэ тардыһар буоларга үөрэтэр. Сүүрүүбүт таһынан өссө атах оонньууларыгар, хотугу многоборьеҕа, ГТО-ҕа, национальнай многоборьеҕа уонна физкультура олимпиадатыгар улууска, өрөспүүбүлүкэҕэ көхтөөхтүк кыттабыт. Элбэх оҕо Бүлүү улууһун уонна өрөспүүбүлүкэ сүүмэрдэммит хамаандатыгар баарбыт.
Бу ааспыт 2024 сылга биһиги 4-тэ улууска, 8-та өрөспүүбүлүкэҕэ бастыыр иһин, 2-с регионнааҕы ДФО күрэҕэр, 6-та Россия таһымнаах, норуоттар икки ардыларынааҕы ахсыс “Азия оҕолоро” күрэхтэһиилэригэр ситиһиилээхтик кытынныбыт.
Ааспыт сыл саамай улахан ситиһиибитинэн Данилов Владислав 8-с Норуоттар икки ардынааҕы “Азия оҕолоро” оонньууларга сүүрүүгэ 400 м барьердаах сүүрүүгэ 2 миэстэни ылбыта. Ону таһынан Маслов Юра, Буслаев Андрей, Данилов Владислав Хабаровскай, Ярославль, Санкт-Петербург, Улан-Удэ, Сочи куораттарга Россияҕа регионнааҕы күрэхтэһиилэргэ сүүрүүгэ 2-3 миэстэни ылбытара.
Капитонова Алина, Степанов Марат, Степанова Аэлита, Софронов Святослав уонна мин өрөспүүбүлүкэҕэ бастыыр иһин сүүрүүгэ, ыстаҥаҕа, ядроны быраҕыыга бары 1,2,3 миэстэни ылары ситиспиппит. Мин бииргэ дьарыктанар оҕолорум үрдүк ситиһиилэринэн киэн туттабын.
Түгэнинэн туһанан, тренербэр, төрөппүттэрбитигэр, гимназиябыт салалтатыгар, оҕо спортивнай оскуолатын салалтатыгар (директор Г.Д.Осипов), өрөспүүбүлүкэ сүрүн тренеригэр Ариносова Татьяна Кузьминичнаҕа уонна сүбэһиппитигэр, психолог массажиспытыгар Макарова Прасковья Игнатьевнаҕа, оҕо спорда сайдарыгар көмө буолар, өйөбүл буолар спонсордарбытыгар барҕа махтал буоллун.
Наина Ионова, 9 кылаас үөрэнээччитэ, И.Л. Кондаков аатынан Бүлүү гимназията, өрөспүүбүлүкэ чэпчэки атлетикаҕа сүүмэрдэммит хамаандатын чилиэнэ.