Бу күннэргэ Бүлүү улууһун WhatsApp бөлөхтөрүгэр Чинэкэ бөһүөлэгэр биир сыл иһигэр элбэх дьоҥҥо күүс-көмө буолан үлэлээбит үрдүк категориялаах быраас, мэдиссиинэ билимин дуоктара Анна Сивцева үлэтиттэн уурайан эрэрэ киэҥ дьүүллэһиини таһаарда. Социальнай ситимҥэ эрэ буолбакка, «Кыым» хаһыакка «Быраас уурайда.Тоҕо?» диэн дьон быраас уурайыытын утарар санааларын билиһиннэрэр ыстатыйа ахсынньы 14 күнүнээҕи нүөмэргэ бэчээттэннэ.
Социальнай ситимнэргэ тахсыбыт, “Кыым” хаһыакка бэчээттэммит дьон санаатын түмэн билиһиннэрдэххэ, Чернышевскай нэһилиэгин, Бүлүү улууһун олохтоохторо киэҥ билиилээх-көрүүлээх, таһымнаах быраас салгыы үлэлии хааларын туруорсаллар, тыа сиригэр мэдиссиинэ хаадырдарынан хааччыллыытыгар санааларын үллэстэллэр, Чинэкэ балыыһатыгар суоппар, биэлсэр, сиэстэрэ суохтарын, быраас тех-үлэһити кытта эрэ үлэлээбиттэрин ыйаллар.
Биһиги быраас тоҕо уурайан барбытын туһунан оройуоннааҕы киин балыыһа кылаабынай бырааһа Егор Григорьевтан ыйыталаспыппытыгар, кини маннык быһаарда:
— Мин биир сыл анараа өттүгэр быраас Анна Сивцева Ленскэй оройуонугар үлэлии сылдьан уурайбытыгар, Бүлүүгэ ыҥырбытым. Бастаан куоракка поликлиникаҕа, онтон Чинэкэҕэ тахсан бырааһынан үлэлээбитэ.
Соторутааҕыта быраас Анна Сивцева суһал түбэлтэлэргэ (экстреннайдарга) төлөнүллүөхтээх төлөбүрдэрбин төлөөбөттөр диэн сайабылыанна киллэрбитин, бэйэтэ кыттыылаах хамыыһыйа мунньаҕар көрбүппүт. Итинник түбэлтэҕэ боппуруоһу эппиэттээх үлэһиттэртэн састааптаах хамыыһыйа көрүөхтээҕин үлэбит тутула ирдиир.
Хамнас ааҕыытын, үп-харчы боппуруостарынан мин экономикаҕа солбуйааччым дьарыктанар. Билиҥҥи информационнай технология үйэтигэр быраастар хайдах үлэлээбиттэрин, төһө ыарыһаҕы көрбүттэрин барытын компьютер анал бырагыраамаларыгар киллэрэллэр. Ол эбэтэр ханнык эрэ туһааннаах кэми ылан көрдөххө ким хайдах үлэлээбитэ, тугу гыммыта арылхайдык көстө сылдьар диэн бэлиэтиэм этэ. Хамыыһыйаҕа төлөбүр сөпкө оҥоһуллубатах диэн быһаарыы тахсыбыта, быраас сөбүлэспэккэ «уурайабын» диэбитэ.
Бүддьүөт тэрилтэтэ буоларбыт быһыытынан, биһиги киин балыыһабыт оҥорор бары төлөбүрдэрэ, үбэ-харчыта хамсыыра төһө сөптөөҕүн, сокуону кэһэрин-кэспэтин кэтээн көрөр тэрилтэлэр бааллар. Биһиги үп-харчы өттүгэр сокуон ирдэбиллэрин тутуһан үлэлиибит, ити түбэлтэҕэ сокуону кэһии таһаарыллыбата.
Этиллэр кэмҥэ биир сиэстэрэ үлэлии киирэн баран, Дьокуускайга көһөн барбыта. Сиэстэрэ, суоппар үлэлии киирбэтэхтэрэ диэн этиэххэ сөп.
Бүгүҥҥү күҥҥэ быраас сайабылыанньатын биэрэн үлэтиттэн уурайан барда. Билигин Чинэкэҕэ сиэстэрэ үлэлии таҕыста. Сайын биэлсэринэн чинэкэлэр бэйэлэрин кыыстара үлэлии кэлиэхтээх. Чинэкэҕэ быраас буларга үлэлэһэ сылдьабыт, министиэристибэҕэ «Земскэй доктор» бырагырааманан бу сылга миэстэ баар диэн эрэннэрдилэр.
Николай Куприянов.