Олунньу 19 күнүгэр СӨ тас сибээстэһиилэргэ уонна норуоттарын дьыалаларыгар миниистир солбуйааччыта Сергей Хатылыков салайааччылаах IV бөлөх Чинэкэҕэ өрөспүүбүлүкэ ситэриилээх былааһын 2024 сыллааҕы үлэтин отчуотун туруорда, сүрүн ситиһиилэри кэпсээтэ.
Отчуоттуур бөлөх салайааччыта ааспыт отчуокка боротокуолга 7 боппуруос киирбитин, быраас амбулаториятын үлэһиттэринэн хааччыйыы боппуруоһа быһаарыллыбытын, атыттар үлэҕэ сылдьалларын билиһиннэрдэ.
Чинэкэлэр олохтоох бэйэни салайыныыга киириэхтээх саҥа сокуону, гаас тэриллэрин тех-хааччыйыытын төлөбүрэ аһара үрдээбитин уо.д.а. боппуруостары чуолкайдастылар, сэрии сылларын оҕолорун тыыл бэтэрээннэригэр тэҥниири, исписэлиистэргэ уопсай дьиэ тутуутун уо.д.а. туруорустулар.
Үөрэтэр корпуһа көтүрүллэн икки дьиэнэн үлэлиир оскуола оҕолору 2 симиэнэн үөрэтэрэ, оскуола салалтата кулуупка үлэлиирэ, спортсменнар эмиэ култуура тэрилтэтигэр дьарыктаналлара этилиннэ.
Оскуола дириэктэрэ Александр Васильев оскуола бырайыага экспертизаҕа сылдьарын билиһиннэрдэ, кини учууталлар тиийбэттэригэр, тыа сирин учууталларын хамнастарын үрдэтиигэ санаатын этиннэ.
Үөрэх министиэристибэтин департаменын салайааччытын э.т. Ульяна Сыроватская билиһиннэрбитинэн, бүгүҥҥү күҥҥэ улууска учууталлар хамнастара 91, детсадтар — 82 , эбии үөрэхтээһин — 101 тыһ.солк. тэҥнэһэр.
Отчуоттуур бөлөх кыттыылаахтара, улуус управлениеларын эппиэттээх үлэһиттэрэ бары ыйытыктарга толору быһаарыылары биэрдилэр, туруорсуулары болҕомтоҕо ылан, боротокуолга киллэрдилэр.
Николай Куприянов.