Тохсунньу 25 күнүгэр Дьокуускай куорат национальнай библиотекатын историческай уораҕайыгар Чочу нэһилиэгин баһылыга Пётр Александрович Догоюсов биир дойдулаахтарыгар анаан, нэһилиэгин ааспыт 2023 сыллааҕы үлэтин отчуоттаата, кэлэр сылга үлэ былааннарын билиһиннэрдэ. Үгэскэ кубулуйбут бу тэрээһин үрдүк таһымҥа ааспытын кыттыыны ылбыт биир дойдулаахтарбыт бэлиэтээтилэр.
Тэрээһин бастакы чааһыгар олохтоох айар куттаахтар Мария Буслаева — Сыралта Кыыһа, Ольга Винокурова — Саймаара хомуурунньуктарын сүрэхтээһин буолла. Манна Саха сирин суруйааччыларын Сойууһун чилиэнэ “Уран тыл оһуора” литературнай түмсүү салайааччыта Раиса Николаевна Тимофеева — Михайлова — Сырдык Күүс бэйэтинэн кэлэн, биллэр ааттаах- суоллаах хоһоонньуттар: Каджана Николаевна — Чэлгийэ, Парасковья Алексеевна — Туску, Николай Николаевич -Хоро Холлой хоһооннорбутун ааҕан, эттээн — сииннээн ситэрэн ураты тыыннаан айар — кут абылаҥар сиэтэн, кэлбит ыалдьыттары хоһоон хонуутугар көччүтэн таһаардылар.
Итинтэн салгыы ыччат миниистирин бастакы солбуйааччыта Мохначевская Надежда Вячеславовна бэйэтин үлэтиттэн кэпсээтэ, ыччаты патриотизма иитэр дириҥ суолталаах кинигэтин туттарда. Суруйааччы, литературнай музей үлэһитэ Анна Ивановна Гоголева аҕатын Иван Михайлович Гоголев — Кындыл туһунан нууччалыы тылынан таһаарбыт кинигэтин билиһиннэрдэ. Василий Давыдович Иванов кыыһа Мира Васильевна эмиэ аҕатыгар анаабыт кинигэтин бэлэхтээтэ.
“Мин дойдум Чочу” диэн раскраска кинигэ сүрэхтэниитэ сэҥээриини ылыан ылла.
Түмүктүүр түһүмэххэ Чочу нэһилиэгин баһылыга Пётр Догоюсов нэһилиэгин 2023 сыллааҕы үлэтин экрантан көрдөрөн, саҥа сылга былааннарын кэлбит биир дойдулаахтарыгар билиһиннэрдэ. Аҕам саастаах биир дойдулаахпыт Виссарион Андреевич Томскай кэс тылын, Святослав Павлович Григорьев, Виктор Сергеевич Верёвкин айар куттаахтарга сытыы бөрүөлэрэ сыппаабатыгар, нэһилиэк олоҕор өссө да үрдүк ситиһиилэри баҕарар үтүө тылларын эттилэр. Киэн туттар ырыаһыппыт Эрхаан Чочутун туһунан ырыатынан эҕэрдэлээтэ. Баһылык ыалдьыттары дойдуларын өҥ буоругар “Ампаардаах” ТХ үүннэрбит бурдугунан күндүлээбитэ үөрүүлээх түгэнинэн буолла.
Бу тэрээһини тэрийбит, иилээн-саҕалаан ыыппыт биир дойдулаахпытыгар, СӨ национальнай библиотекатын дириэктэрин солбуйааччы Александр Васильевич Игнатьевка барҕа махтал тылын эттибит. Былааннаммыт үлэ сыалын ситтэ.
Мария Буслаева.