Дьөккөн таһыгар, «Бүлүү» федеральнай суол кытыытыгар сыттана сытар Лүксүгүҥҥэ Ионовтар дьиэ кэргэннэрин хаһаайыстыбаларыгар саҥа туристическай сезон арылынна.
Үһүс сылын. Лүксүгүҥҥэ 2000 сыллар саҕаланыыларыгар соҕотох мас эрбиир пилорама турбут буоллаҕына, билигин тутуу элбэх: олорор дьиэлэр, хотоннор, үрүҥ илгэни, эти астыыр сыахтар. Манна 160 ынах сүөһү, онтон 100-тэн тахсата ыанар ынах, 50 төбө сылгы, сибиинньэ, индюк уонна … мүөттээх ыҥырыалар бааллар.
Ионовтар дьиэ кэргэннэрин хаһаайыстыбата федеральнай граннар, улуус дьаһалтатын көмөтүнэн сайдыбыта. Ааспыт сайын улуус баһылыга Сергей Винокуров, оройуон Сэбиэтин бэрэссэдээтэлэ Гаврил Корякин мүөттээх ыҥырыалар пасекаларын көрө тахса сырыттахтарына, Альбина Ионовна бүтүн Арассыыйатааҕы куонкуруска кытталларын этэн аһардыбыта. Куонкуруска Ионовтар ситиһиилээхтик кыттаннар, «Агротуризм» диэн бырайыакка федеральнай грант ыланнар, Лүксүгүҥҥэ саҥа туристическай сезон арылынна.
Эмиэ ити күннэргэ Ил Дархан Айсен Николаев тыа хаһаайыстыбатын 2030 сылга диэри сайыннарарга уураах таһаарда.
Тыа хаһаайыстыбатыгар агротуризм диэн саҥа сүүрээн киирэн эрэрэ тыын өллөйүөхтээх. Бүлүү улууһун баһылыгынан үлэлээбит, тыа хаһаайыстыбатын миниистирин солбуйааччы Николай Афанасьев 2023 сылга Горнайта Чемезовтар уонна Бүлүүттэн Ионовтар хаһаайыстыбалара ылбыттарын билиһиннэрдэ. Эко-туризм диэн бырайыак Арассыыйаҕа саҥа саҕаланан эрэр.
Биир сүрүн түгэнинэн Ионовтар хаһаайыстыбаларыгар агро-туризм сезона арыллыбытын бэлиэтээн, хаһаайыстыба салайааччыта Сидор Ионов, нэһилиэк баһылыгын солбуйааччы Акулина Данилова, «Мой бизнес» Бүлүү улууһунааҕы салайааччыта Саргылана Иванова Лүксүгүн диэн суруктаах этинньиги арыйдылар.
Ионовтар бэлэмнэнэн, дьон көрөрүгэр барыта баар. Сүүрүк сылгылар, көрдөххө буденновскай боруода, өссө понилар: Завиток уонна Заколка диэннэр дьон санаатын көтөхтүлэр.
Тыа хаһаайыстыбатын миниистирин солбуйааччы Николай Афанасьев дьөккөннөр киэҥ туттар киһилэрин, убайдарын Николай Кондаков «Утум. Ситим. Тэтим» диэн суруйбутун санатта, Ионовтарга барсарын эттэ.
Биһиги корр.