Бэс ыйын 11 күнүгэр тэриллибит депутаттар оройуоннааҕы V ыҥырыылаах Сэбиэттэрин алтыс сессиятын үлэтигэр кыттыыны ылбыт 18 депутат бэбиэскэҕэ киирбит 11 боппуруоһу көрдүлэр уонна бигэргэттилэр.
Бастакытынан, депутаттар «Бүлүү улууһа 2024 уонна 2025-26 сыллардааҕы былааннаах бүддьүөтүгэр уларытыылары киллэрии» боппуруоһун билистилэр. Улуус дьаһалтатын үп-казначейскай управлениетын салайааччы Анисим Алексеев быйылгы бүддьүөт суумата эбии 212 мөл. солк. эбиллибитин иһитиннэрдэ.
Сессия биир сүрүн боппуруоһунан Бүлүү улууһун баһылыгын «Улуус дьаһалтатын 2023 сыллааҕы үлэтин туһунан» отчуота буолла. Улуус баһылыга Сергей Винокуров депутаттарга ааспыт сыл сүрүн ситиһиилэрин билиһиннэрдэ. Ол курдук, 2023 сылга Бүлүү куоратыгар Балыыһа комплексын I уочарата,«Тыа сирин кэлимник сайыннарыы» федеральнай бырагырааманан Үгүлээккэ оҕо уһуйаана, I Күүлэккэ оскуола иккилии мэндиэмэннээх таас дьиэлэрэ, «Хаарбах дьиэттэн көһөрүү» бырагырааманан үс элбэх квартиралаах дьиэлэр, Кыргыдайга испэсэлиистэргэ уопсай дьиэ, Хампаҕа култуура киинин дьиэтэ үлэҕэ киирбиттэрэ.
Итини сэргэ, ааспыт сыл бэлиэ түгэннэригэр Бүлүү куорат икки киин уулуссаларынан ааһар «Бүлүү» федеральнай суол, Чапаев уулусса, Лөкөчөөн киин уулуссата аспаал бүрүөһүннэммиттэрэ киирдэ.
Саха сиригэр бастакынан улуус уонна «Сахатранснефтегаз» хампаанньа бииргэ үлэлээбиттэрин түмүгэр Дьөккөн бөһүөлэгэр гаас ситимэ тиэрдиллэн, дьиэлэргэ «күөх төлөн» умайбыта.
2023 сыл улууска Доруобуйа, Бүлүү куоратыгар Саха сиригэр бастакы Үлэ Геройа, кыраайы үөрэтээччи П.Х. Староватов сылларын биллэриллибиттэрэ. Улууска, Дьокуускайга элбэх бэлиэ тэрээһиннэр ыытылыннылар.
Улуус баһылыга байыаннай дьайыы кыттыылаахтарыгар Бүлүү улууһун дьаһалтатын, дьонун-сэргэтин көмөлөрүн туһунан сиһилии кэпсээтэ. Улуус дьаһалтата көмөҕө элбэх үбү көрбүтэ биллэр, Бүлүү улууһун дэлэгээссийэтэ байыаннай эпэрээссийэ буола турар сиригэр икки сырыытыгар 19 мөл. солк. суумаҕа байыаннай, тиэхиньиичэскэй тэрил атыылаһан тиэрдибитэ.
«Олох суола» хаһыат ааспыт сыл бэлиэ түгэннэрин киэҥник сырдаппыта.
Отчуоту дьүүллэһиигэ Кыһыл Сыыртан депутат Иван Кайкы байыаннай дьайыы кыттыылаахтарыгар көмө үбүн улаатыннарарга, депутат Иван Алексеев судаарыстыбаннай, бэлитиичэскэй диэйэтэл Гавриил Чиряев аатын үйэтитиигэ, улууска суоппардары бэлэмнээһини, волейбол тириэньэрдэрин өйүүргэ этиилэри киллэрдэ. Депутаттар бүгүҥҥү күҥҥэ автобус суоппардара тиийбэттэрин бэлиэтээбиттэрэ тоҕоостоох буолла.
Депутаттар киллэрбит этиилэрэ хамыыһыйаларга дьүүллэһиллэн аныгы сессияҕа бэлэмнэнэрэ иһитиннэрилиннэ.
Улуус баһылыгын отчуотун кытта депутаттар улуус 2023 сыллааҕы бүддьүөтүн туолуутун отчуотун бигэргэттилэр.
Оройуон Сэбиэтин депутатыгар эппиэтинэс миэрэтин туттуу, оройуон Сэбиэтин депутатын боломуочуйатын болдьоҕун иннинэ тохтотуу боппуруостара, сыһыаннаах депутаттар сессияҕа бэйэлэр суохтарынан, аныгыскы сессияҕа көһөрүлүннэ.
Депутаттар федеральнай сокуоннарга сөп түбэһиннэриигэ киирбит прокурор бырачыаһын кытта сөбүлэстилэр.
Сессияҕа улуус дьаһалтатын үлэтин көдьүүһүн сыанабылын тосхоллоро, бүддьүөттэн көрүллэр үбүнэн тэриллэр күрэхтэһиилэртэн киирэр дохуот, грант уо.д.а. нолуок тутуллубат испииһэгэ бигэргэтилиннэ.
Оройуон Сэбиэтин алтыс сессиятыгар депутаттар Светлана Зинуроваҕа, Мария Николаеваҕа уонна Виктор Томскайга «Бүлүү улууһун Бочуоттаах гражданнарын» ааттара иҥэрэргэ куоластаатылар. Былырыын Бүлүү улууһун 5 олохтооҕор улуус бочуоттаах гражданнарын ааттара иҥэриллибитэ.
Николай Куприянов.