«Дьиэ кэргэн – олох төрдө» улуустааҕы күрэх күүтүүлээх түмүктэрэ таҕыстылар

Бүлүү улууһугар кырыа кыһын күүтүүлээх, долгутуулаах тэрээһининэн саҕаланна. Ол курдук, ахсынньы 1 күнүгэр М.Н. Жирков аатынан култуура Дыбарыаһыгар сыл устата ыытыллыбыт “Дьиэ кэргэн – олох төрдө” диэн улуустааҕы күрэх түмүктүүр күнэ үүннэ.

Бу тэрээһин Россияҕа дьиэ кэргэн, Саха сиригэр оҕо саас сылларын чэрчитинэн хас да түһүмэҕинэн ыытылынна. С
үрүн сыалынан уопсастыбаҕа ийэ, аҕа оруолун, дьиэ кэргэн статуһун үрдэтии буолла. Ону тэҥэ көхтөөх, ситиһиилээх дьиэ кэргэттэри киэҥ эйгэҕэ таһаарыы, кинилэри кытта билсиһии. Улууспут 12 бастыҥ ыала бу курдук түһүмэхтэри ааспыттара:

1. Видеонан дьиэ кэргэни билиһиннэрии;
2. Ыһыах кэмигэр “Бүлүү улууһун сайдам ыалын бастыҥ түһүлгэтэ” диэн дьиэ кэргэнинэн түһүлгэ оҥоруу;
3. “Лето всей семьей” диэн дьиэ кэргэнинэн сайыҥҥы сынньалаҥы, үлэни видеоролик көмөтүнэн көрдөрүү;
4. Сайыны быһа үүннэрбит, көрбүт-харайбыт оҕуруоттарын астарынан “Дары осени” дьаарбаҥкаҕа кыттыы;
5. “Сүрэхтэн сүрэххэ” аһымал акцияҕа бэйэ кылаатын киллэрии;
6. “Үлэ киһини киэргэтэр” диэн үлэни көрдөрүү;
7. “Готов к труду и обороне” эт-хаан сайдыытын нуорматын туттарыы.

Уонна бу күн култуура Дыбарыаһыгар “Дьиэ кэргэн төрүччүтэ” диэн быыстапка туруоруллан, үгүс көрөөччү сэҥээриитин ылла.  

Кыттааччылар күрэҕи түмүктүүр күҥҥэ эмиэ хас да тургутуулары аастылар. Бастатан туран, мустубут дьоҥҥо бэйэлэрин билиһиннэрдилэр, дьиэ кэргэннэрин туһунан кэпсээтилэр. Ол кэннэ сыл устата аахпыт кинигэлэринэн блиц-опрос ыйытыктарыгар эппиэттээтилэр. Үһүс түһүмэҕинэн талааннарын көрдөрүү буолла. Кыттааччылар араас чаҕылхай нүөмэрдэри бэлэхтээтилэр, хайдах курдук элбэҕи сатыылларын көрдөрөн сөхтөрдүлэр.

Дьүүллүүр сүбэ састаабыгар «Бүлүү улууһа (оройуона)» муниципальнай оройуон дьаһалтатын дьыалаларын дьаһайааччы Клара Гаврильева, оройуоннааҕы култуура уонна норуот айымньытын сайдыытын киинин салайааччыта, СӨ култууратын туйгуна Алена Дашевская, Бүлүү улууһун үөрэҕириитин салалтатын начальнига, СӨ үөрэҕириитин туйгуна, педагогическай наука кандидата Наталья Семенова, Бүлүү улууһугар нэһилиэнньэ социальнай көмүскэлигэр уонна үлэҕэ тэрилтэтин социальнай харалта салаатын сэбиэдиссэйэ Афанасий Слепцов, 2016 сыллааҕы өрөспүүбүлүкэтээҕи дьиэ кэргэн күрэҕин кыайыылааҕа, норуот маастара, Бүлүү улууһун аҕа сүбэтин чилиэнэ Иннокентий Акимов үлэлээтилэр. Дьүүллүүр сүбэ  дьиэ кэргэттэри сыл устата  сыаналаабыттара. Кыттааччылар бары түһүмэхтэри ааспыттарын кэннэ дьүүллүүр сүбэ түмүктэри таһаара барда. Тэрээһини бу күн араас музыкальнай нүөмэрдэр, оонньуулар киэргэттилэр.

Кыайылаахтары билиһиннэрии түгэнин кыттааччылар да, кинилэри өйүү кэлбит көрөөччүлэр да долгуйан туран иһиттилэр, хас биирдии түмүгү ытыс тыаһынан доҕуһуоллаан көрүстүлэр. Ол курдук, хас биирдии ыалга анал ааттар иҥэрилиннилэр, харчынан сертификаттар туттарылыннылар. Уопсай түмүгүнэн 3 миэстэҕэ Тааһаҕартан Андреевтар тигистилэр уонна Москва куоракка 3 киһиэхэ путевка ылан үөрдүлэр. 2 миэстэҕэ Өкүндүттэн Ивановтар эдэр ыал таҕыстылар уонна 4 путевканы ыллылар. Муҥутуур кыайыылааҕынан Хаҕын нэһилиэгиттэн элбэх оҕолоох, олус талааннаах Семеновтар дьиэ кэргэттэрэ буоллулар. Кинилэр Москва куоракка 5 буолан сынньанан кэлэр путевканан наҕараадаланнылар.

Бүлүүбүт улууһугар олус көхтөөх, элбэх талааннаах, бары өттүнэн сатабыллаах, үлэни-үөрэҕи өрө туппут, бэйэ-бэйэлэригэр истиҥ, сылаас сыһыаннаах ыаллар бааллара олус үөрдэр. Инникитин да өссө элбэх саҥа ааттар ааттана туруохтара, бу курдук чаҕылхай ыаллар биллэн-көстөн иһиэхтэрэ диэн бигэ эрэллээхпит.

Василина Татаринова.  

Читайте дальше