Дмитрий Петров таас көтөҕүүгэ үһүс көрдөрүүлээх

Олунньу 1-2 күннэригэр Бороҕоҥҥо «Дыгын оонньууларын» 7 төгүллээх кыайыылааҕа Иван Белолюбскай чиэһигэр спорт национальнай көрүҥнэригэр «Чемпион кубога» X турнир тэрилиннэ. Күрэхтэһии «Дыгын оонньууларыгар» иккис сүүмэрдиир күрэхтэһиинэн буоларынан, барыта 40 спортсмен кытынна.

Таас көтөҕүүгэ Тааһаҕартан төрүттээх Дмитрий Петров үһүс миэстэни ылла. Кини икки сүүмэрдиир күрэхтэһии түмүгүнэн 14 миэстэҕэ сылдьар.

Үһүс күрэхтэһии Чурапчыга муус устарга ыытыллыахтаах. Үс сүүмэрдиир күрэхтэһии түмүгүнэн 16 иһигэр киирбит кус быһыйдар, ат бөҕөлөр «Дыгын оонньууларыгар» кыттар быраабы ылаллар. Дмитрий Петровка ситиһиилэри баҕарыаҕыҥ!

Николай Куприянов.

Читайте дальше