От ыйын 13 күнүн туругунан Аммаҕа ыытылла турар доруобуйаларынан хааччахтаах дьоҥҥо сөп түбэһэр спорт көрүҥнэригэр Саха Өрөспүүбүлүкэтин XIV спартакиадатыгар Бүлүү улууһун хамаандатын спортсменнара 5 үрүҥ көмүс, 1 боруонса мэтээллэри ыллылар.
Спорт киэргэлэ – чэпчэки атлетикаҕа бастыыр күрэхтэһиилэр «Амма-Олимп» стадиоҥҥа, олорон эрэ волейболга, остуол тенниһигэр, дуобакка киирсиилэр Аммаҕа Николай Захаров-Сахаачча аатынан спорт киинигэр, голболга оонньуу чугастыы сытар Бөтүҥ спорткомплексыгар, ытыыга куоталаһыылар эмиэ Амматтан чугас турар Чапчылҕаҥҥа ыытыллаллар.
Алла Николаева Т51-54 көрүҥҥэ 100 м кэлээскэҕэ олорон эрэ сүүрүүгэ Бүлүү хамаандатыгар үрүҥ көмүс мэтээли аҕалла.
— Үөрүүм улахан, хамаандабар ситиһиилэри баҕарабын! – диэн спартакиада призера санаатын үллэһиннэ.
Куруук үөрэ-көтө сылдьар Русанда Матвеева Т55-57 көрүҥҥэ 100 м кэлээскэҕэ олорон сүүрүүгэ тыҥааһыннаах киирсиигэ үрүҥ көмүс призер буолла. Бастаабыт спортсменканы кытта кэккэлэһэ сүүрдэн иһэн таарыйса сыыһаннар, Русанда хаалан, иккиһинэн кэлэн үрүҥ көмүс призер буолла.
Биир эрэнэр сүүрүүкпүт, элбэх күрэхтэһии, спартакиада кыайыылааҕа Антон Попов 100 м сүүрүүгэ иккис кэлбитин ситиһии быһыытынан көрүөххэ сөп. Спартакиада үөрүүлээх арыллыытыгар Бүлүү улууһун хамаандатын былааҕын күөрэччи көтөҕөн киириэхтээх Антон Попов хамаандатыгар үрүҥ көмүс мэтээли аҕалла.
Лидер-спортсменнаах 100 м сүүрүүгэ Дмитрий Чабыев уонна Василий Каратаев спартакиада үрүҥ көмүс призердарынан буоллулар!
Биир эрэнэр ытааччыбыт Надежда Алексеева бэстилиэтинэн ытыыга «Дьулуур» XIV спартакиада боруонса мэтээлин ылары ситистэ.
Бүгүн Бүлүү улууһун спортсменнарын остуол тенниһигэр, дуобакка, чэпчэки атлетикаҕа күрэхтэһииллэр, 11 чаастан «Амма-Олимп» спартакида үөрүүлээх арыллыыта кэтэһэр.
Николай Куприянов.