Билиҥҥи кэмҥэ үгүс дойдуларга дьиэ кэргэн статуһа намтаан, арахсыы элбээбитэ, оҕо төрөөһүнэ кыччаабыта мэлдьэҕэ суох көстүү. Биһиги дойдубутугар дьиэ кэргэн — судаарыстыба төрүтэ, инники кэскилэ буоларын өйдүүллэр. Ол курдук, чуолаан Саха сиригэр кэккэ сылларга дьиэ кэргэни өйүүр сөптөөх миэрэлэр ылыллыбыттара. Бу — «Дьиэ кэргэн» ийэ хапытаала, иккис оҕо төрөөтөҕүнэ көрүллэр ийэ хапытаала, «Үйэ оҕолоро» тус сыаллаах хапытаал, элбэх оҕолоохторго босхо сир учаастагын биэрии, култуура уонна спорт тэрилтэлэригэр оҕолору сырытыннарыы чэпчэтиилээх төлөбүрдээх. Үүммүт сыл саҕаланыытыгар эбии саҥа миэрэлэр ылыллыбыттара билиннэ. Ол туһунан СӨ бырабыыталыстыбатын иһинэн ЗАГС управлениетын Бүлүү улууһун отделын салайааччыта Марина Иванова маннык кэпсээтэ:
— 2024 сылы дойду Президенэ Владимир Владимирович Путин дьиэ кэргэн сылынан биллэрбитэ, ол туһунан бэйэтин Ыйааҕар илии баттаабыта. Оттон Саха Өрөспүүбүлүкэтин Ил Дархана Айсен Сергеевич Николаев бу сылы Оҕо саас сылынан биллэрбитэ. Бу быһаарыныылар дьиэ кэргэн сыаннастарын харыстыырга, бөҕөргөтөргө, киэҥник тарҕатарга сыаллаах-соруктаах ылыллыбыттара. Ону тутуһан бу сыл тэрээһиннэрин былааннара ылыллыахтаахтар.
Ил Дархан көҕүлээһининэн Саха сиригэр 25-гэр диэри саастаах дьоҥҥо анаан бастаан ыал буолууларыгар биир кэмнээх харчынан көмө эбии оҥоһуллуохтаах. Усулуобуйалара — бастакытынан, кэргэнниилэр иккиэн 25 саастарыттан аҕа буолуо суохтаахтар, иккиһинэн, кэргэннии буолар регистрациялара 2024 сыл тохсунньу 1 күнүттэн уонна ол кэнниттэн буолуохтаах, үсүһүнэн, кэргэнниилэр иккиэн бастакы холбоһуулара буолуохтаах. Сайабылыанньаны E-YAKUTIA.RU регионнааҕы портал нөҥүө биэриэхтээхтэр.
Маны таһынан ЗАГС отдела бэйэтин үлэтин бу тэрээһиннэргэ кытыннаран ыытыахтаах. Үрүҥ көмүс, кыһыл көмүс сыбаайбалаахтар үбүлүөйдэрин, оҕону ааттыыр, роддомтан таһаарар үөрүүлээх тэрээһиннэри о.д.а. ыытыахтаахпыт.
Изольда Загитова.