82 сааһыгар үктэммит Екатерина Алексеева анал байыаннай дьайыы кыттыылаахтарыгар көмөнү оҥорор улуустааҕы пууҥҥа – Саха балаҕаныгар күн аайы сарсыарда эрдэ кэлэн, түбүгэ бүппэт күннээҕи үлэҕэ: хаххалыыр сиэккэлэри баайыыга, байыаннайдарга аналлаах таҥаһы-сабы хомуйууга, малы-салы аттарыыга сылдьан, үлэни салайсан баран дьиэтигэр киэһэ хойут биирдэ тиийэр. Кини итинник кэриҥнээхтик үлэлээбитэ хаһыс да сыла буолла.
— Көмөнү оҥорор улуустааҕы пууҥҥа байыаннай дьайыыга кыттар уолаттарбытыгар көмө оҥороору, өйөбүл буолаары,кинилэр этэҥҥэ эргиллэн кэлэллэрин туһугар күннэтэ түмсэн сылдьабыт, — диир Екатерина Герасимовна.
Саха балаҕаныгар күн аайы куруук 10-ча ыал эбэлэрэ, ийэлэрэ түмсэллэр, эр дьон кэлэн күүс-көмө буолаллар. Итини сэргэ, Бүлүү куорат тэрилтэлэриттэн пууҥҥа күн аайы иккилии-үстүү киһи көмөҕө кэлэллэр. Бары баҕа өттүнэн, биир да солкуобай төлөбүрэ суох үлэлиир, биир дойдулаахтарын тустарыгар күннэрин-дьылларын, дьиэлэрин түбүктэрин аахсыбат дьон үтүө холобурга сылдьар волонтердар буолаллар.
Көмө оҥорор пууҥҥа нэһилиэктэртэн киирэн эмиэ иистэнэллэр, сылаас үтүлүк, кээнчэ, флис көстүүмнэри тигэллэр. Тылгыныттан Иван Прокопьев эмиэ босхо, күнүн-дьылын аахсыбакка туран дойдутугар олорон бэртээхэй байыаннай таҥастары тигэн ыытар.
Екатерина Алексеева улуус уопсастыбаннай түмсүүлэрин, пуун салайааччытын Мария Томскаяны уо.д.а. кытта 2022 сылтан таҥас, аптечка суумкатын тигииттэн, күннэтэ туттар мал-сал, ас-үөл хомуйан ыытыыттан волонтер үлэтин саҕалаабыттара.
СВО кыттыылаахтарыгар көмө оҥорор улуустааҕы пуун 2022 сыллаахтан тэриллэн үлэлиир, байыаннайдарга дьоһуннаах көмөнү оҥорор. «Көмүс тарбахтаах» иистэнньэҥнэр араас таҥаһы, кээнчэлэри, сиэлтэн угунньалары, госпиталларга сытааччыларга биирдэ туттуллар сыттыктары уо.д.а. тигэллэр, баайаллар.
Билигин сүрүннээн хаххалыыр сиэккэлэри оҥороллор. Сиэккэни Дьокуускайтан ыллараллар, таҥас өрбөҕүн баайан бэртээхэй хаххалыыр сиэккэлэри, күҥҥэ муҥутаан иккини бүтэрэллэр.
— Таҥастары, сиэккэлэри уоппускаҕа кэлбит, хантыраак түһэрсэн барааччыларга туттаран ыытабыт, итини тэҥэ хомуйбут малбытын, тикпит таҥаспытын бэйэбит эмиэ Дьокуускайга ыытабыт, барыта СВО-ҕа тиийэр, — диэн кэпсээтэ Екатерина Герасимовна.
Екатерина Алексеева уопсастыбаннай үлэҕэ эдэр сааһыттан кыттар. Бүлүү улууһун биир бастакы уонна бастыҥ үлэлээх «Алаһа» түмсүүтүн салайааччыта буолар. Түмсүү ситиһиилээх үлэтин көрөн нэһилиэктэргэ, куоракка эмиэ атын түмсүүлэр тэриллибиттэрэ. Билигин улуус үрдүнэн элбэх түмсүү үлэлиирин бэлиэтиэххэ сөп.
Байыаннай дьайыы кыттыылаахтарыгар көмөнү оҥорор улуустааҕы пууҥҥа күннэрин-дьылларын, бэйэлэрин кыһалҕаларын аахсыбакка, төлөбүрэ суох күннэтэ тугу кыайалларынан, сатыылларынан үлэлиир үтүө санаалаах волонтер эбээлэргэ, ийэлэргэ дириҥ махтал буоллун!
Николай Куприянов.