Өкүндү нэһилиэгэр бастыҥнары чиэстээтилэр, инники соруктары чопчулаатылар

Олунньу 1 күнүгэр Өкүндү нэһилиэгэр сылын аайы ыытыллар «Чыпчаал» сыллааҕы ситиһиилэрбитин түмүктүүр, саҥа сылы арыйар кэтэһиилээх дьоро күммүт буолан ааста. Олохтоох дьаһалтабыт баһылыга Никифор Петров киһи истэ үөрэр үтүөкэн сонуннарын кэпсээтэ, элбэх ситиһиилэри бэлиэтээтэ уонна кыайыылаах үлэһит дьоннорбутун Бочуотунай грамоталарынан наҕараадалаан олохтоохторун үөртэ.

Бу үөрэх дьылыгар үлэтин саҥа саҕалаабыт оскуолабыт дириэктэрэ Сергей Алексеевич Прокопьев эмиэ киһи үөрэ истэр сонуннарын, ситиһиилэрин кэпсээтэ. Маны таһынан социальнай харалтабыт үлэһитэ, 2024 сыл түмүгүнэн улууска бастыҥ үлэлээх нэһилиэк «Утум» бэтэрээннэрин түмсүүлэрин салайааччыта Федора Алексеевна Мандарова актыыбынайдык кыттар кырдьаҕастарыгар улуустааҕы бэтэрээннэр Сэбиэттэрин бэрэссэдээтэлин Грамоталарын туттартаата.

Быйылгы сылга 65 сааһын туолбут » Кэнчээри» оҕо садын бэтэрээн үлэһитин Люция Сергеевна Степанованы үлэлээбит тэрилтэтэ үбүлүөйүнэн соһуччу эҕэрдэлээн үөрүүтүн үрдэттилэр. Долгутуулаах эҕэрдэ үөрүүтүн салҕаан, Люция Сергеевна төрөппүт уола, кулууппут биир сүрүн актыбыыһа Альберт Степанов ийэ туһунан ырыата мустубут дьон сүрэҕин эмиэ долгутта.

«Чэчир» Норуот айымньытын дьиэтин дириэктэрэ Матрена Сивцева бастыҥ үлэһиттэригэр улуустааҕы култуура сайдыытын уонна норуот айымньытын киинин начальнигын Бочуотунай Грамоталарын туттарда, ааспыт сылга күүс-көмө буолбут уус-уран самодеятельность көхтөөх кыттыылаахтарыгар, спонсордарга махтанна уонна биир дойдулаахпыт Малышева-Гаврильева Анна Михайловна 5000 харчынан бирииһин бастыҥ үлэлээх «Саһарҕа» түөлбэ салайааччытыгар туттарда.

Сылбытын түмүктүүр киэһэбитигэр өр сылларга олохтоох дьаһалта исписэлииһинэн, кэлиҥҥи сылларга баһылык солбуйааччытынан үлэлии сылдьан соһуччу күн сириттэн күрэммит убаастыыр киһибит Надежда Петровна Иванова бу күн төрөөбүт күнэ буолан биэрдэ.Төрөппүт оҕолоро, тапталлаах кэргэнэ Леонтий Иванов бииргэ төрөөбүттэрэ кини аатынан истипиэндийэ олохтоон, сыл бастыҥ исписэлииһигэр, кулууппут уус-уран салайааччытыгар Дария Владимировна Каратаеваҕа туттардылар. Надежда Петровна сырдык аатын үйэтитэр истипиэндьийэни үтүө үгэскэ кубулутарга этиннилэр.

Нэһилиэкпит дьокутаата, «Саһарҕа» түөлбэ салайааччыта Зоя Александровна Николаева түөлбэтин бастыҥ кыттааччыларын бэлиэтээн сэмэй бэлэхтэрин туттартаата, ырыа ыллаан ситэрэн — хоторон биэрдэ.

Улуустааҕы дьиэ кэргэн күрэҕин кыайыылаахтара Ивановтар дьиэ кэргэнинэн, эбээлэринээн индийскэй үҥкүүлэрин толорон дьоннорун- сэргэлэрин үөртүлэр, сэргэхситтилэр. Дьоро киэһэбитигэр Бөтүҥтэн биир дойдулаахпыт Николай Иванов кэлэн, дуораһыйар кэрэ куолаһынан ыллаан дойдутун дьонун үөртэ. Баяҥҥа доҕуһуоллуу Саха Өрөспүүбүлүкэтин култууратын үтүөлээх үлэһитэ Иван Тулааһынап кэргэнинээн Елена Николаевналыын кэлэннэр күндү ыалдьыт буоллулар.

Эдэр ыччаттарбыт талааннарын сөхтүбүт. Наһаа үчүгэй ис хоһоонноох «Үлэ киһини киэргэтэр» музыкальнай спектакылларын биир тыынынан көрдүбүт. Тутталлара-хапталлара үчүгэйин, үҥкүүлээн элэҥнэтэллэрэ эриэккэһин. Дьэ, маладьыастар! Оскуола үөрэнээччилэрэ эмиэ ылбаҕай ырыаларынан, үҥкүүлэринэн тэрээһини киэргэттилэр.

Улахан тэрээһининэн улууска Степан Аржаков 125 сылын, Арассыыйаҕа Дьиэ кэргэн, Өрөспүүбүлүкэҕэ Оҕо саас сылларын ситиһиилээхтик түмүктээтибит уонна Улуу Кыайыы 80 сылыгар анаммыт сылы бэрт улахан тэрээһиннээхтик көрүстүбүт. Олохтоох дьаһалтабыт баһылыгар Никифор Владимировичка, «Чэчир» сынньалаҥ киинин үлэһиттэригэр, кырдьаҕастарбытыгар барҕа махталбытын тиэрдэбит.

Маннык тэрээһиннэр куруутун буолаллар эрээри, бу күн ураты, сүрдээх истиҥ, киһи эрэ дуоһуйа сынньанар үтүө киэһэтэ буолан ааста. Бу үөрүүлээх киэһэни эрчимнээх куолаһынан көрөөччүлэри бэйэтигэр тардыбыт ыытааччыбытыгар Ульяна Григорьевнаҕа, бары кыттыыны ылбыттарга барҕа махтал буолуохтун. Кэлэр сыллар өссө да үрдүк ситиһиилэрдээх буоллуннар. Барыгытыгар дьолу- соргуну, үөрүүнү-көтүүнү, инникигэ эрэллээх буолууну баҕарабын.

Харатай Кыыһа. Өкүндү

Читайте дальше