Сыл саҕаланыытыгар улуус баһылыга Сергей Винокуров нэһилиэнньэҕэ дьаһалта ааспыт сыллааҕы үлэтин түмүктэрин отчуоттуур. Ол курдук тохсунньу 26 күнүнэр отчуот Өкүндү нэһилиэгин олохтоохторугар ыытылынна.
Сергей Николаевич ааспыт сыл түмүктэрин кэпсээбитин кэннэ олохтоохтор бэйэлэрин ыйытыыларын биэрдилэр уонна санааларын этиннилэр. Бу ыйытыыларга Сергей Николаевич уонна үлэлиир бөлөх толору эппиэттэри биэрдилэр. Ол курдук Өкүндүтээҕи оскуола иһинэн үлэлиир оҕо уһуйаанын хонуктаах бөлөҕө сабыллан, Кыадаҥдаҕа көһүөх курдук буолбутун элбэх үлэһит да. олохтоох да долгуйа истибиттэрин биллэрдилэр. Бу манна ити боппуруос ситэ быһаарылла илигин, сөптөөх түмүк тахсарын туһугар үлэ бара турарын эттилэр. Маны таһынан өкүндүлэр саҥа кулууп тутуутун үлэтэ саҕаланарын күүтэллэрин эттилэр, хаарбах дьиэлэртэн көһүү программатынан саҥа дьиэлэр тутуллаллара былааҥҥа баалларыттан үөрэллэрин биллэрдилэр.
Тыа хаһаайыстыбатын өттүнэн сылгы иитиитин күүһүрдүөххэ наада диэн этии киллэрдилэр, оттуур сирдэр күрүөлэрэ суохтарыттан хомойоллорун биллэрдилэр, көмө көрдөстүлэр. Доруобуйа өттүнэн ФАП-ка атыыга эмп баар буолара буоллар диэн баҕа санааларын эттилэр.
Ыйытыылар таһынан дьаһалта үлэтинэн астыналларын, үөрэллэрин биллэрдилэр, Сергей Николаевичка уонна кинини кытта сылдьар үлэлиир бөлөххө кэлэн отчуоттаабыттарын, ыйытыыларга эппиэттэри биэрбиттэрин иһин махталларын эттилэр.
Василина Татаринова.