Олунньу 19 күнүгэр Өкүндүгэ Сергей Александрович Хатылыков салайааччылаах бырабыыталыстыба отчуота буолан ааста. Отчуоту олохтоох дьаһалтабыт баһылыга Никифор Владимирович салайан ыытта.
Кэлбит ыалдьыттарбыт «Кыайыы 80- сылынан» Кыайыыбыт скверигэр буойуттар сквердэригэр гирлянда ууран аастылар. Онтон оскуола иһигэр кырдьаҕастарбыт арыылаах алаадьынан ыалдьыттарбытын көрүстүбүт. Нэһилиэк олохтоохторо актыыбынай кыттыыны ыланнар, оскуолабыт фойетын толору олордубут.
Сүрүннээн саамай наадалаах сытыы боппуруоспутун — кулууппут тутуллуутун боппуруоһун син биир этиннибит. «Чэчир» сынньалаҥ киинин дириэктэрэ Матрена Григорьевна Сивцева киэҥ ис хоһоонноох гына нэһилиэккэ култуура сайдыытын, историятын, инники кэскилин билиһиннэрдэ. Нэһилиэк депутаттара хомуйбут 127 киһи илии баттааһыннаах сурукпутун Сергей Александровичка туттардыбыт. Уонна кулууппут тутуутун боппуруоһун салгыы быһаарсыаҕа диэн эрэннибит.
Маны таһынан нэһилиэк олохтоохторо интэриэһиргиир араас боппуруостарын биэрэннэр, отчуот бэрт сэргэхтик ааста.
Анна Мандарова, Өкүндү.