Бу ааһан эрэр сыл Арассыыйаҕа Дьиэ кэргэн сылынан биллэриллибитэ. Бу сыл чэрчитинэн улууспут дьаһалтата бэс ыйыттан саҕалаан «Дьиэ кэргэн — олох төрдө» диэн 10 түһүмэхтээх улахан куонкурус тэрийбитэ. Куонкурска биһиги нэһилиэктэн 3 оҕолоох эдэр ыал Ульяна, Николай Ивановтар кыттыыны ыллылар.
Ыһыахха «Бүлүү сайдам ыалын бастыҥ түһүлгэтэ» — төрүччүнү көрүү, дьиэ кэргэн эмблемата, музыкальнай номер, сахалыы сиэдэрэй астаах сандалы, дьиэ кэргэн дьарыгын, ситиһиилэрин көрдөрөр быыстапка тэриллибитэ, бу күрэххэ биһиги ыалбыт бочуоттаах 3-с миэстэни ыланнар, ситэри киирсэргэ быһаарынан от ыйыттан саҕалаан, дьиэ кэргэн видеовизитката, «Лето всей семьёй» , ГТО туттарыыта, «Дары осени», «Труд украшает человека», «От сердца к сердцу» акция диэн түһүмэхтэргэ кыттан, 3 иһигэр киирбиттэрэ. Түмүктүүр күҥҥэ төрүччүлэрин төһө билэллэригэр, интеллектуальнай түһүмэххэ уонна талаан күрэҕэр сытыы киирсии түмүгэр, биһиги ыалбыт 2-с миэстэни ылан дойдубут тэбэр сүрэҕэр Москуба куоракка 4 киһиэхэ босхо путевканан наҕараадаланар чиэскэ тиксэн, биир дойдулаахтарын үөртүлэр, бэйэлэрэ муҥура суох дьоллоннулар.
Төрүччүлэрин көрүөхтэн кэрэ Аал-луук мас гына оҥорон, 7 көлүөнэ төрүт дьоннорун киллэрэн, хаартыскалаан, көмүс суруктаан, дьиэ кэргэн архивыттан хаартыскалары, оҥоһуктары, кинигэлэри, альбомнары, мэтээллэри, орденнары кэчигирэтэ ууран, көрбүт эрэ хараҕа хатанар гына оҥордулар. Ол курдук Ульяна (Сунтаар) 2 хос эһэтэ уоттаах сэрии бэтэрээннэрэ эбиттэр, оттон ийэтинэн хос эһэтин бииргэ төрөөбүт быраатын сиэнэ Арассыыйа дьоруойа Филипп Евсеев буоларын туоһулуур хаартыска көрөөччү болҕомтотун тарта. Николай эһэтэ, биһиги, өкүндүлэр биир дойдулаахпыт, эмиэ сэрии бэтэрээнэ Михайлов Иван Васильевич буолар. Эһэтин бырааттарын оҕолоро Юрий Антонович, Дмитрий Михайловтар хаартыскалара ууруллубуттара дьон-сэргэ сэҥээритин ылыан ылла.
Ыал аҕатын хос эһэтэ Үстүүн оҕонньор оҥорбут мебеллэрин хаартыската, эһэтин Ньукулай (Күстэх) оҥорбут сундууга, бэйэтин хаартыската, Уля эбэтин оҕуруонан оҥорбут билэлэрэ, Сэргэй диэн эһэтэ ааттаах тойуксут, улууска биллэр үҥкүү тылын этээччи (ноутбука көстөр) турбуттар.
Интеллектуальнай турга 4 кылааска үөрэнэр кыра уол Вадим биэрбит ыйытыктарыгар тута хоруйдаата. Оттон саамай кэрэхсэбиллээх көрүҥҥэ, талаан күрэҕэр дьиэ кэргэн 100% (1,5 саастаах Милана эмиэ кытынна) ону ааһан Николай балта Санаайа, ийэтэ Светлана Ивановна, аҕата Михаил Николаевич эмиэ күннээх Индия уоттаах-күүстээх үҥкүүтүн үҥкүүлээн былааһы ылан кэбистилэр.
Күрэххэ Анна Мандарова салайааччылаах 6 киһиттэн састааптаах өйүүр бөлөҕөр “Чэчир” норуот айымньытын Дьиэтиттэн Ульяна коллегаларыгар, олохтоох дьаһалтаттан баһылык солбуйааччыта Алексей Шадриҥҥа, Бүлүүттэн анаан-минээн «ыалдьа» кэлбит Борис Васильевка муҥура суох махтанабыт. Үөрүүгэ кыттыспыппытыттан астынныбыт, дьоллоннубут, харахпыт уута кэлбитин билбэккэ да хааллыбыт. Эдэр ыалбытыгар саҕаланыаҕыттан бүтүөр диэри сүбэ-ама, күүс-көмө буолбут коллегаларыгар, дьүөгэлэригэр Дария Владимировнаҕа, Айталина Петровнаҕа махтал истиҥ тылларын аныыбыт!
Кыра да нэһилиэк буолларбыт өкүндүлэр баарбытын биллэрэбит. Сомоҕолоһуу, бэйэ-бэйэни өйөһүү, өйдөһүү биһиги нэһилиэккэ урут да баара, билигин да баарын биллибит дакаастаатыбыт. Өссө төгүл эдэр ыалбытын бүгүҥҥү ситиһиилэринэн эҕэрдэлээн туран баай-байылыат, чөл туруктаах, дьол-соргу аргыстаах олоҕу баҕарабыт.
Матрена Сивцева, Өкүндү кулуубун дириэктэрэ.