РФ Киин быыбардыыр хамыыһыйата сэтинньи 15-17 күннэригэр ыыппыт Тэйиччиттэн электроннай куоластааһын Бүтүн Арассыыйатааҕы эрчиллиитигэр Бүлүү улууһун быыбардааччылара көхтөөхтүк кытыннылар.
Быйылгы сыл сэтинньи 15-17 күннэригэр Арассыыйа бары уобаластарыгар, кыраайдарыгар, өрөспүүбүлүкэлэригэр Тэйиччиттэн электроннай куоластааһын Бүтүн Арассыыйатааҕы эрчиллиитэ ыытылынна.
Саха сиринээҕи Киин быыбардыыр хамыыһыйа быһаарыытынан, Бүлүү улууһугар Тэйиччиттэн электроннай куоластааһыҥҥа кырата 260 киһи кыттыахтаах этэ. Бүлүү улууһун быыбардааччыларын сонун тэрээһиҥҥэ кытыннарыыга улуустааҕы быыбардыыр хамыыһыйа, улуус дьаһалтата ыыппыт үлэлэрин түмүгэр Госуслуги порталга 700 киһи тэйиччиттэн куоластыырга сайабылыанньаларын биэрбиттэрэ.
Электроннай куоластааһыҥҥа кыттыан баҕалаахтар сэтинньи 1 күнүттэн 13 күнүгэр диэри Госуслуги порталга сайабылыанньаларын биэрбиттэрэ, сэтинньи 15-17 күннэригэр куоластаабыттара.
— Бүлүү улууһун олохтоохторо Тэйиччиттэн электроннай куоластааһын Бүтүн Арассыйатааҕы эрчиллиитигэр көхтөөхтүк кытыннылар. 405 киһи куоластааһыҥҥа кыттыбыта, сайабылыанньа биэрбиттэртэн 58 % кыттыыны ылбыта үчүгэй көрдөрүү буолар. Улуустааҕы быыбардыыр хамыыһыйа, 34 учаастактааҕы быыбардыыр хамыыһыйалар бары чилиэннэрэ электроннай куоластааһыҥҥа кыттыбыттарын бэлиэтиэм этэ.
Өссө элбэх быыбардааччы кыттыаҕын тыа сиригэр уот баран, сибээс мөлтөх буолан атахтаата, сайабылыанньаларын биэрбит элбэх дьон кыттыбакка хааллылар.
Бүтүн Арассыыйатааҕы эрчиллии кэлэр быыбардарга бэлэмнэнии буолар. Эрчиллиигэ элбэх киһи кыттыбытыгар улуус дьаһалтатын улахан көмөтүн бэлиэтиэм этэ, — диэн улуустааҕы быыбардыыр хамыыһыйа бэрэссэдээтэлэ Тимофей Иванов бэлиэтээтэ.
Тэйиччиттэн электроннай куоластааһыҥҥа Госуслуги порталга бигэргэммит учуоттаах эрэ дьон кыттар кыахтаахтарын, элбэх куоластааччы Арассыыйа Яндекс браузерынан киирэн куоластаабыттарын бэлиэтиэххэ сөп. Итинник ирдэбил кэлэр быыбардарга тутуһуллара сабаҕаланар.
Саха сирин үрдүнэн быйылгы Тэйиччиттэн электроннай куоластааһыҥҥа 13316 киһи кытынна диэн Саха сиринээҕи Киин Быыбардыыр хамыыһыйа биллэрдэ. 2021 сыл сааһыгар тэриллибит бастакы Тэйиччиттэн электроннай куоластааһын Бүтүн Арассыыйатааҕы эрчиллиитигэр Саха сирин 11187 олохтооҕо кыттыбыта биллэр.
Итини сэргэ, бу күннэргэ Арассыыйа быыбардыыр ситимэ тэриллибитэ 30 сылын туолла. 1993 сыллаахха Саха сирин саҥа парламенын – Ил Түмэн депутаттарын быыбардыырга Саха Өрөспүүбүлүкэтин Киин быыбардыыр хамыыһыйата, 56 уокуруктааҕы уонна 817 учаастактааҕы хамыыһыйалар тэриллибиттэрэ.
Николай Куприянов.