Дьокуускайга Рихард Зорге аатынан 2 корпустаах реабилитационнай киин бу уулуссаҕа турар. 1992 с. тэриллибит. Манна 30 сыл устата Бүлүү кыыһа Алексеева Асида Июньевна үлэлээбит, аны 4 сыл устата дириэктэринэн үлэлии олорор.
Олус ыарахан туруктаах дьон аматыйан тахсар кииннэрэ эбит. Билигин СВО-ҕа сылдьыбыт дьон сыталлар, 400-тэн тахса киһи эмтэммит.
Манна элбэх араас тэрээһиннэр, күрэхтэр, кэнсиэртэр ыытыллаллар: теннист, биллиард, саахымат, домино уо.д.а. Соторутааҕыта спортивнай күрэхтэһии түмүгүн таһаардылар, бары араас улуус дьонноро, СВО-ҕа сылдьыбыт уолаттар уонна ийэлэрэ, дьиэ хаһаайкалара бааллар. Түмүк бүтүүтүгэр уолаттарбытын эҕэрдэлээтибит, “Сэрии буолбатын” диэн ырыаны толордубут.
Бу сырыыга Каратаева Прасковья Пантелеймоновналыын эмтэнэн абыранан таҕыстыбыт. Онон бу киин бука бары үлэһиттэригэр, толкуйдаах, тобуллаҕас, сайаҕас дириэктэригэр Асида Июньевнаҕа барҕа махталбын тириэрдэбин.
Павлина ИВАНОВА,
Бүлүү оскуолатын бочуоттаах учуутала.