Олунньу 11 күнүгэр Хаҕын нэһилиэгэр РСФСР Үөрэҕириитин туйгуна, СӨ Учууталлар учууталлара, Хаҕын нэһилиэгин бочуоттаах олохтооҕо, үлэ бэтэрээнэ, үрдүкү категориялаах биология, химия учуутала Мария Гаврильевна Федотова сырдык кэриэһигэр аналлаах улуустааҕы «Мир вокруг нас» научнай-практическай конференция иккис төгүлүн үрдүк таһымҥа буолан ааста.
Тэрээһин саҕаланыытыгар Хаҕын нэһилиэгиттэн бэтэрээн Сэбиэтин салайааччыта Еремеева Оксана Христофоровна истиҥ тылларынан ахтан-санаан ааста.
Үөлээннээҕэ Докторова Светлана Иннокентьевна чугас дьүөгэтин Мария Гаврильевна үлэтин-хамнаһын, саҥа арыйыыларын, ситиһиилэрин, олоххо сыалын-соругун арылхайдык кэпсээтэ. Оскуола дириэктэрэ Матвеева Анастасия Кононовна учуутал үрдүк аатын үйэтитээри анал биология, химия кылааһа арыллыахтааҕын, араас хайысхалаах үлэлэр ыытыллалларын туһунан иһитиннэрдэ.
Бу тэрээһиҥҥэ биир кылааска М.Г. Федотова айымньылаах үлэтин ис хоһоонун арыйар быыстапка тэрилиннэ. Үлэлээбит сылларын хаартысканан кэпсиир видеолары, презентациялары көрдүбүт. Кыргыдай, Хаҕын, Халбаакы, Мастаах орто оскуолатын үөрэнээччилэрэ чинчийбит үлэлэрин анаммыт экспертэргэ көмүскээтилэр, сорохтор аныгы технологияны туһанан «Сферум» нөҥүө кэпсээтилэр.
Ону таһынан туттуллубат, быраҕыллар матырыйааллары туһаҕа таһаарар, айылҕаны харыстыыр сыаллаах-соруктаах быыстапка тэрилиннэ. Быыстапкаҕа киһи сэргиэх кэрэ хартыыналара, туттар маллара, сонун оонньуурдара оҕолор интэриэстэрин көтөхтө. Тэриллибит үлэлэри ырытан, сыаналааһын түмүгэр Кылаан кыайыылаах Тыымпы орто оскуолатын 8 үөрэнээччитэ Павлова Роксана (сал.Николаева У.В.) буолла. Д.А.Гуляев аатынан Кыргыдай оскуолатыттан үгүс үлэ киирбититтэн Наумов С.5 кыл.( сал.Наумова Е.С.) 1 миэстэҕэ тигистэ, Изиева К. 5 кыл. үөрэнээччитин үлэтэ (сал.Степанов И.П.) биһирэннэ. Биһиги оҕолорбут чинчийэр үлэлэрин көмүскээтилэр, ыйытыыларга харса суох эппиэттээтилэр.
Хайысхаларынан түбүктээх уонна таһаарыылаах үлэ түмүгүнэн: Игнатьев Э. 5 кыл. — 2 м. (сал.Окоемова В.Г.), Барчалырова Х., Соловьева С. 5 кыл. — 2 м. (сал.Александрова С.С.), Наумов С. 5 кыл.- 1 м., (сал.Окоемова В.Г.), Изиева К. 5 кыл. — 1 м.(сал.Алексеева А.Д., Игнатьева А.С.), Скрябина Вит., Скрябина Вио. 6 кыл. — 1 м.(сал.Скрябин М.Я., Скрябина Н.Н.), Кырбасова Н. 7 кыл.- 1 м. ( юсал.Игнатьева А.С.), Мучурунова А. 8 кыл. — 2 м. (сал.Александрова С.С.).
Чинчийэр үлэни хасыһыы, дириҥник үөрэтии, ырытыы түмүгүнэн Кылаан кыайыылаах 5 кылаас үөрэнээччитэ Изиева Кристина кубогынан уонна Мария Гаврильевна Федотова оҕолоро, аймахтара туруорбут харчынан бириэмийэлэринэн наҕараадаланна. Ити курдук, иккис сылын кыайыы кубога Д.А.Гуляев аатынан Кыргыдай орто оскуолатыгар кэллэ. Улахан тэрээһини тэрийбит А.К. Матвеева салайааччылаах Хаҕын орто оскуолатын коллективыгар барҕа махталбытын тиэрдэбит.Үлэҕит үгүс ситиһиилээх, коллектив бу күн курдук өрүү түмсүүлээх буолуохтун. Үөрэнээччилэргэ, салайааччыларга тахсыылаах үлэни, туйгун үөрэҕи баҕарабыт.
Василиса Окоемова.