Ахсынньы 5 күнүгэр И.М.Гоголев-Кындыл аатынан кииннэммит библиотека ыччакка аналлаах саалатыгар олус интэриэһинэй, дириҥ ис хоһоонноох, сонун тэрээһин буолла.
Үөһээ Бүлүүтээҕи О.Д.Федорова аатынан киин модельнай библиотека Кирилл Никифоров-Лөкөчөөн «Хабыр киирсиилээх Хабытта Бэргэн» туруорбут тифло испиктээкилэ Бүлүү дьонун үрдүк сыанабылын ылла.
Испиктээкил атыттартан уратыта диэн көрөөччү бу кэмҥэ истээччи эрэ буолар. Ол эбэтэр хас биирдии киһи көрбөккө эрэ, аудио устууну истэр. Бу кэмҥэ артыыстар араас ньыманан, тэриллэринэн ардаҕы, тыалы тыаһатан, буруо сытын таһааран көрөөччүлэр айымньыны толорутук ылыналларын ситиһэллэр.
Испиктээкил кэннэ мустубут дьон санааларын эттилэр, олоҥхону барытын бэйэбит харахпытыгар ойуулаан көрдүбүт диэтилэр. Маннык ньыманы туһаныы — көрбөт дьон, хараҕынан инбэлииттэр култуура, искусство эйгэтин хааччаҕа суох билсиһэллэригэр олус наадалаах. Саха сиригэр бу ньыманан туруоруу элбээн эрэрэ үөрдэр.
Бу тэрээһин кэлбит дьон тэрийээччилэргэ махталларынан, уопсай хаартыскаҕа түһүүнэн түмүктэннэ.
Василина Татаринова.