Ахсынньы 2 күнүгэр Халбаакыга Ньурбатааҕы судаарыстыбыннай көһө сылдьар драматическай тыйаатыр ыалдьыттаата.
Оҕолорго анаан «Тили-Мили Трямдия» диэн устуруойуны көрдөрдүлэр. Куукула тыйаатыра оҕолору оонньотон-үҥкүүлэтэн, сахалыы тыллары үөрэтэн испиктээк көрдөрдө. Олус тэтимнээх муусукалаах, уоттаах-күөстээх, киэргэтиитэ, куукулаларын оҥоһуута, артыыстар итэҕэтиилээхтик онньууллара оҕолор дууһаларын таарыйда, олус сэргэхсийдилэр, тыйаатыр тыыныгар ыллардылар. Туруорааччы режиссер- Маргарита Васильева-Хотууна, худуоһунньук — Дарья Тартакынова.
Киэһэ «Ийэ сүрэҕэ» диэн испиктээк туруордулар. Бу испиктээх дьон сүрэҕин таарыйыаҕын таарыйда. Бастакы мүнүүтэттэн артыыстар дьон болҕомтотун ыллылар. Аны туран калмык норуотун устуоруйатыгар олоҕурбут испиктээк буолан, көрөргө олус интэриэһинэй уонна умсугутуулаах. Туруорааччы-режиссер — СӨ ускуустубатын үтүөлээх диэйэтэлэ Юрий Макаров. Режиссер артыыстары барыларын толору арыйда диэххэ сөп. Биир да персонаж мээнэҕэ кэлбэтэх. Ханнык да оруолу бу сүрүн оруол диир кыаҕым суох. Бары оруоллар сүрүн оруоллар курдук. Оннук курдук артыыстар чаҕылхайдык оонньууллар, киһи дууһатын таарыйаллар. Муусуканан киэргэтиитэ олус үчүгэй, хаһан да истибэтэх матыыптарбын иһиттим, бары даҕаны дуоһуҋууну ыллыбыт. Сыананы киэргэтии, уот-күөс чаҕылхай туруорууну өссө байытта, дьиҥ олоҕу көрө олорор курдук санааны үөскэттэ.
Кыра нэһилиэктэргэ дьиҥнээх тыйаатыр кэлэрэ дириҥ суолталаах. Нэһилиэк дьоно-сэргэтэ, эдэр ыччата, инники көлүөнэ култуура эйгэтигэр уһуйуллара, тыйаатыр тыыныгар киирэллэрэ үрдүк миссия буолар. Оннук миссияны толоро сылдьар Ньурбатааҕы тыйаатыр артыыстарыгар, режиссердарыгар, худуоһунньуктарыгар, бары үлэһиттэригэр ситиһиини баҕарабын. Испиктээктэргит инникитин да дьон боломтотун ыллыннар, дууһатын таарыйдыннар.
Бүлүүгэ бүгүн ахсынньы 3 күнүгэр буолар испиктээктэргэ Бүлүү куоратын олохтоохторун уонна ыалдьыттарын хайаан да баран көрүҥ диэн ыҥырабын.
Елизавета Эверстова, Халбаакы.