Быйыл Арыылаах нэһилиэгэ төрүттэммитэ 385 сыла буолар. Бу үбүлүөйдээх сылы арыйа олунньу 1 күнүгэр Хампатааҕы «Эрэл» норуот айымньытын киинин үлэһиттэрэ уонна актыбыыстара Горнай улууһун Кэптэни, Маҥаны нэһилиэктэригэр тиийэн гастроллаатылар.
Кэнсиэркэ “Өксөкү” көр-күлүү мини-театра (салайааччы Татаринова А.И.) бэтиэхэлээх сценкалары көрдөрдүлэр, “Дайаана” үҥкүү бөлөҕө (салайааччы Татаринова А.Е.) абылаҥнаах үҥкүүлэри толордулар. “Эрэл” норуот айымньытын үлэһиттэрэ ыллаан-туойан кытыннылар. Кулууп дириэктэрин солбуйааччы Яков Уваровскай, сыана бэтэрээнэ Сэмэн Евсеев, ырыа куттаах Дмитрий Прокопьев ис дууһаларыттан тахсар ырыалары ыллаан дьон сүргэтин көтөхтүлэр. Гастролу “Эрэл” НАК уус-уран салайааччыта А.И. Татаринова иилээн-саҕалаан ыытта. 
Ыалдьыттаабыт нэһилиэктэрин олохтоохторо ытыстарын тыаһын бэлэхтээннэр,махтананнар, олус үөрдүбүттэр, санааларын күүһүрдүбүттэр.
Өссө да атын сирдэргэ Хампабытын хайҕата, Арыылаахпытын ааттата, нэһилиэкпитин билиһиннэрэ кэнсиэрт көрдөрө барыахтара диэн бигэ эрэллээхпит.
Галина Колодезникова, олохтоох библиотекарь.
Фото Эрэл Степанов.