Хапсаҕай туонатыгар — Үөһээ Бүлүүгэ ыытыллыбыт быйылгы 2024 сыл Федерация Кубогар Бүлүү хамаандатын хапсаҕайдьыттара иккис сылын субуруччу үһүс бочуоттаах миэстэни ыллылар.
Бүлүү хамаандатын састаабыгар киирбит эдэрдэргэ Руслан Сергин, Тамерлан Петров, Михаил Семенов, Сарыал Григорьев, Пантелеймон Софронеев, Рашид Мусин, эр дьоҥҥо Сандал Прокопьев, Петр Алексеев, Эдуард Григорьев, Роман Николаев, Афанасий Матвеев, Николай Николаев, бэтэрээннэргэ Анатолий Сергеев, Семен Таныков, Дмитрий Иванов, Клим Иванов, Константин Мандаров көбүөргэ сытыы хапсыһыылары көрдөрдүлэр.
Комментатор Максим Дмитриев хамаандатын кытта күрэхтэһиини Телеграм-ханаалга быһа эфиргэ көрдөрбүттэригэр махтаныахха эрэ сөп. Бүлүү тустууну сэҥэрээччилэрэ мессенджердэргэ биир дойдулаахтарын хапсыһыыларын астына көрдүлэр, спорт кэмитиэтин бэрэссэдээтэлэ Ольга Калачикова быһа биллэрэн испитин билистилэр.
Бүлүү хамаандата бастакы эргииргэ сынньаммыта, иккис эргииргэ сэрэбиэйинэн хаһаайыннары утары тахсан 4:13 хотторбута. Былырыын Намҥа ыытыллыбыт Федерация Кубогар эмиэ хаһаайыннарга бастакы эргииргэ түбэһэн хотторбута.
Үһүс эргииргэ бүлүүлэр уус алданнары 10:7, төрдүскэ ньурбалары 9:8 ахсаанынан кыайбыттара. Саха сирин чулуу хапсаҕайдьыта, аан дойду чемпиона Николай Николаев быһаарыылаах хапсыһыыга Ньурба биллэр хапсаҕайдьытын Степан Тобоновы тилэҕиттэн ылан охторон, Бүлүү хамаандатыгар суолталаах кыайыыны аҕалбытын бэлиэтиир тоҕоостоох.
Бэһис эргииргэ бүлүүлэр үөһээ дьааҥылары 10:7 ахсаанынан кыайары ситистилэр. Боруонса мэтээл иһин киирсиигэ чурапчылар судьуйалар быһаарыыларын утаран көбүөргэ тахсыбатахтарынан Бүлүү хамаандатыгар быһа үһүс миэстэ бэрилиннэ.
Биллэр-көстөр, кыайыыга дьулуурдаах бөҕөстөрдөөх Бүлүү хамаандатыгар уруй-айхал буоллун!
Биирдии хотторуулаах Мэҥэ Хаҥалас уонна Чурапчы хамаандалара финалга тахсалларыгар мөккүөрдээх балаһыанньа үөскээбитэ. Күрэхтэһии балаһыанньатынан финалга хамаандалар квалификацияларын очукуолара тэҥ буоллаҕына, элбэх тиэхиньиичэскэй очукуолаах тахсыахтаах. Судьуйалар мэҥэлэр чурапчылары кытта сирэй көрсөн хапсыһыыга кыайбыттара, онон финалга тахсаллар диэн быһаардылар.
Үөһээ Бүлүү хапсаҕайдьыттара финалга мэҥэлэри баһыйа туттулар.
Чугас сытар Үөһээ Бүлүүгэ тэриллибит таһымнаах хапсаҕай күрэхтэһиитин Бүлүүттэн элбэх тустууну сэҥээрээччи тиийэн көрдө. Халбаакы нэһилиэгин баһылыга Алексей Васильев санаатын бу курдук үллэһиннэ:
— Мин иккис күнүгэр үөһээ дьааҥылары кытта буолбут хапсыһыылары көрбүтүм. Бүлүү хапсаҕайдьыттарын хамаандатын састааба үчүгэй, уолаттар түмсэ сылдьаллар, үчүгэйдик туһуннулар, өйөбүл оҥоһуллуон наада дии саныыбын. Бүлүү хамаандата иккис сылын субуруччу үһүс миэстэни ылбыта улахан чиэс буолар. Көбүөргэ үһүс миэстэни былдьаһа тахсыбатах чурапчылар бүлүүлэри кытта илии тутуспуттара.
* * *
Ити курдук, Федерация Кубогар күрэхтэһии тэриллиэҕиттэн Бүлүү хамаандатын хапсаҕайдьыттара биир үрүҥ көмүс, түөрт боруонса мэтээллэри ылары ситистилэр.
Николай Куприянов.