Быйыл I Күүлэт нэһилиэгин дьаһалтата, баһылык Айал Новиков өрөспүүбүлүкэҕэ үлэлиир суотабай хампаанньалар салалталарын кытта ыкса үлэлэрин түмүгэр нэһилиэк олохтоохторо 4G түргэн сибээстээх түөрт эпэрээтэр өҥөлөрүнэн туһанар кыахтаннылар.
Соторутааҥҥа диэри I Күүлэт олохтоохторо «Билайн» 2G сибээһинэн эрэ туһана олорбуттара. Ахсынньы саҥатыгар «Билайн» тупсарыллыбыт аныгы түргэн 4G сибээһэ үлэлэтиллибитэ.
Итини тэҥэ суотабай сибээс саҥа эпэрээтэрдэрэ — «Мегафон» уонна «Йота» эмиэ 4G сибээстэрин киллэрбиттэрин түмүгэр олохтоохтор Интернет куйаарын эйгэтигэр харгыһа суох тахсар кыахтаммыттара.
Бүгүн I Күүлэккэ эмиэ саҥа эпэрээтэр — 4G түргэн уонна бигэ сибээстээх МТС үлэтин саҕалаата.
I Күүлэт нэһилиэгин баһылыга Айал Новиков үөрүүлээх сонунун билиһиннэрдэ:
— Ахсынньы 20 күнүгэр, биһиги нэһилиэккэ төрдүс суотабай эпэрээтэр — МТС бэйэтин үлэтин саҕалаата. Хампаанньа тутаах испэсэлиистэрэ I Күүлэккэ кэлэн суотабай, түргэн Интернет сибээһин тэриллэрин таҥан туруорбуттара, бүгүн сибээһи холбоон үлэлэттилэр. Билигин нэһилиэнньэҕэ төлөпүөн сим-хаарталарын түҥэтии ыытыллар. Нэһилиэнньэ аныгы түргэн сибээһинэн туһанан үөрүүтэ элбэх.
Ити курдук, I Күүлэккэ Арассыыйа түөрт сүрүн суотабай хампаанньалара үлэлэрин саҕалаатылар, ыраах сытар нэһилиэк олохтоохторугар аныгы сибээс өҥөтүн оҥорор буоллулар.
Николай Куприянов.