Бүлүү улууһун өрүс уҥуор сытар саамай улахан нэһилиэгэр – I Күүлэккэ бу күннэргэ сайыҥҥы уу ситимин үлэлэтии, ыаллар дьиэлэригэр түргэн Интернети – 4G киллэрии, Ийэ искибиэрин тупсарыы үөрүүлээх түгэннэрэ үүннүлэр.
I Күүлэт нэһилиэгин баһылыгынан 20 тахса сыл үлэлээбит, 5 төгүл быыбардаммыт Айал Новиков нэһилиэк олоҕор бу сайын үүммүт үөрүүлээх түгэннэри билиһиннэрэр:
— Бастатан туран, сайыҥҥы уу ситимин үлэлэтии түмүгэр бөһүөлэк 160 дьиэлэрин тиэргэннэригэр уу тиийдэ, ыаллар күөл уутунан туһанар кыахтанан үөрүүлэрэ үгүс.
Тутуу үбүн-харчытын туһунан кэпсээтэххэ, былырыыҥҥыттан саҕалаан сайыҥҥы уу ситимэ улуус дьаһалтата нэһилиэктэргэ АЛРОСА дибидиэниттэн көрөр үбүн, «Дьон көҕүлээһинин өйүүр бырагыраама» көмөлөрүнэн, нэһилиэк бэйэтин бүддьүөтүн суотугар тардыллыбыта. Полиэтилен турбалары Дьокуускайтан урбаанньыт Юрий Докторов тардыбыта.
Бөһүөлэк таһыгар чугаһынан киһи туһанар уулаах күөлэ суох буолан, 2,5 км ыраах сиртэн бөһүөлэккэ диэри уу ситимин тартаран аҕалтарбыппыт, бөһүөлэк иһигэр 5,5 км кэриҥэ усталаах турбалары тартарбыппыт. Ууну хачайдыыр ыстаансыйабытын билигин дизелинэн үлэлэтэбит, энергетиктэр кэлэр өттүгэр ыстаансыйа уокка холбонуутун оҥоруохтаахтар.
Иккис үчүгэй сонуммутунан, Ростелеком Бүлүүтээҕи филиалын кытта үлэлэһэммит, оптоволоконнай ситими ыаллар дьиэлэригэр босхо киллэртэрэ сылдьабыт. Улуус дьаһалтата кыттыгас үбүлээһини көрбүтэ улахан көмөлөөх буолбутун бэлиэтиир тоҕоостоох. Билиҥҥи туругунан түргэн Интернет – 4G 67 ыал дьиэтигэр киирдэ, өссө дьиэҕэ киллэрэргэ үлэ салгыы бара турар.
Түгэнинэн туһанан, улуус баһылыгар Сергей Винокуровка, Ростелеком Бүлүүтээҕи филиалын салайааччытыгар Саввинов Кирилл Анатольевичка нэһилиэк дьонун улахан махталларын тиэрдэбин.
Дьиэ кэргэн, таптал, бэриниилээх буолуу күнүгэр I Күүлэккэ баар Ийэ искибиэригэр 7 оҕолоох Анна Васильевна уонна Ион Семенович Дмитриевтэр, 9 оҕолоох Марфа Трофимовна уонна Алексей Петрович Самсоновтар оҕолоро, сиэннэрэ, хос сиэннэрэ оҥорторбут ыскамыайкалара туруорулунна. Дмитриевтэр улахан кыыстара Раиса Ионовна эппитин толорон, 3 оҕолоох эдэр ыал Ньургуйаана уонна Алексей Васильевтар иилээн-саҕалаан, икки аймах күүстэрин-кыахтарын түмэн, саҥа ыскамыайкалар туруорулуннулар.
Биһиэхэ Ийэ искибиэригэр 10 оҕолоох 4 Герой-Ийэлэрбит, «Ийэ албан аата» уордьан кавалердара, 7 уоннна элбэх оҕолоох ийэлэр ааттара үйэтитилиннэ.
Итини сэргэ, үйэ аҥара алаһа дьиэ тэринэн бииргэ олорбуттарын туоһулуур Бүлүү улууһун ЗАГС отделын «Кыһыл көмүс сыбаайба» Бочуот кинигэтигэр биһиги нэһилиэктэн 5 ыал киллэриллибиттэрин бэлиэтиэххэ сөп. «Дьиэ кэргэн килбиэнин иһин» бэлиэ Евдокия Алексеевна уонна Семен Прокопьевич Ивановтарга,Татьяна Дмитриевна уонна Егор Семенович Васильевтарга, Анна Васильевна уонна Ион Семенович Дмитриевтэрга, Вера Васильевна уонна Василий Семенович Васильевтарга, Валентина Афанасьевна уонна Василий Прокопьевич Захаровтарга, Татьяна Даниловна уонна Иван Филиппович Софронеевтарга туттарыллыбыта.
Бу күн Бүлүү куоратыгар биһиги биир дойдулаахтарбытын 50 сыл бииргэ олорбут Надежда Алексеевна, Василий Николаевич Спиридоновтары, Марина Михайловна, Николай Васильевич Софроновтары, 30 сыл бииргэ олорбут Раиса Ивановна, Анатолий Алексеевич Тутукаровтары чиэстээбиттэрэ.
Ити курдук, бу сайын улуус кииниттэн тэйиччи сытар I Күүлэт нэһилиэгин олоҕо инники өттүгэр сайдарын туоһулуур элбэх үөрүүлээх түгэн үүннэ.
Николай Куприянов.