В.О.Каратаев аатынан Олоҥхо дьиэтигэр Төрөөбүт тыл уонна сурук-бичик күнүн дэкээдэтин чэрчитинэн ыытыллыбыт «Ийэ тылынан саҥарабыт, саха тылынан сайдабыт!»- төгүрүк остуол тула бэрт сэргэх, сонун кэпсэтии буолан ааста.
Бу тэрээһиҥҥэ «Бүлүү улууһа (оройуона)» МО баһылыгын солбуйааччы Иван Иванович Евсеев, «Бүлүү куорат» муниципальнай тэриллии баһылыгын солбуйааччы Николай Варламович Иванов, И.М.Гоголев-Кындыл аатынан оройуоннааҕы кииннэммит бибилэтиэкэттэн Луиза Яковлевна Кононова, Никита Петрович Михайлов, улуустааҕы үөрэҕирии салаатыттан методическэй салаа салайааччыта Кыдаана Васильевна Дранаева, Бүлүү улууһун идэлээх сойуустарын сүрүннүүр салайааччыта Пелагея Семеновна Томская, Бүлүү куоратын «Аленушка» оҕону сайыннарар киин логопед учуутала Любовь Мефодиевна Софронеева, ыраах Дьөккөн нэһилиэгиттэн уһуйаан сэбиэдиссэйэ Альбина Ионовна Ионова, бу уһуйаан иитээччитэ Светлана Прокопьевна Афанасьева, Тааһаҕар нэһилиэгиттэн саха тылын уонна литературатын учуутала Ольга Самуиловна Каратаева уо.д.а кыттыыны ыллылар.
Аһаҕас кэпсэтии түмүгүнэн үлэ уопутун салгыы киэҥник тарҕатарга, «Ийэ тыл» түмсүү үлэтин күүһүрдэргэ резолюция ылылынна.
Ыҥырыылаах ыалдьыттары хомуска оонньоон уонна сахалыы ырыанан Г.С. Донской аатынан алын сүһүөх оскуола 3 «Б» кылааһын үөрэнээччилэрэ эҕэрдэлээтилэр. Кырачаан оҕолорбутун сахалыы тыыҥҥа иитэр күндү төрөппүттэргэ уонна уһуйааччы учууталларыгар Айталина Михайловна Чиряеваҕа, Раиса Семеновна Ефремоваҕа, Раиса Васильевна Торотоеваҕа тэрийээччилэр ааттарыттан улаханнык махтанабыт. Маны таһынан, «Симэх» мода тыйаатырын кыттыылаахтара аныгылыы тигиилээх, сахалыы моһуоннаах тирииттэн тигиллибит таҥастары кэтэн хааман көрдөрдүлэр. Салайааччылар Н.И.Ылахова аатынан «Алгыс» НКК үлэһитэ Валентина Александровна Алексеева уонна норуот маастара Александра Ивановна Гаврильева.
Дьөккөн нэһилиэгиттэн үүт, эт араас бородууксуйатын атыылаһан, кэлбит дьон бары астынан, дуоһуйан тарҕастылар.
Салгыы улуус үөрэнээччилэригэр тэриллибит «Күн» түмсүү үлэтин бука бары өйүүргэ, сүрүннүүр үлэҕэ кыттыһарга диэн улахан ыҥырыы таҕыста.
Бу улахан тэрээһини тэрийэн ыыппыт уонна кыттыбыт дьоммутугар улахан махталбытын тиэрдэбит.
Ирина Нифонова,
«Н. И. Ылахова аатынан «Алгыс» НКК» дириэктэри солбуйааччы, Бүлүү улууһун оройуонун Сэбиэтин дьокутаата, өрөспүүбүлүкэтээҕи «Төрөөбүт тыл түмэр түһүлгэтэ» уопсастыбаннай түмсүү чилиэнэ, Бүлүү улууһугар » Ийэ тыл» түмсүү салайааччыта .