Ахсынньы 19 күнүгэр Ил Дархан Айсен Николаев Саха Өрөспүүбүлүкэтин Судаарыстыбаннай Мунньаҕар – Ил Түмэҥҥэ сэттис төгүлүн Туһаайан этиитигэр ааһан эрэр сыл түмүктэрин билиһиннэрдэ, кэлэр сылларга саҥа сүҥкэн соруктары туруорда.
Туһаайан этиигэ доруобуйа харыстабылыгар болҕомто уурулунна, кини «Доруобуйа» национальнай бырайыагынан элбэх саҥа эбийиэктэр үлэҕэ киирбиттэрин, тутулла туралларын тоһоҕолоон бэлиэтээтэ.
П.А.Петров аатынан оройуоннааҕы балыыһа кылаабынай бырааһа, Ил Түмэн депутата Егор Григорьев Ил Дархан Айсен Николаев Туһаайан этиитигэр санаатын үллэһиннэ:
— Ил Дархан Айсен Николаев Туһаайан этиитин тэрээһинигэр Ил Түмэн депутаттарын кытта бары бииргэ кытынныбыт. Кини өрөспүүбүлүкэҕэ экономика, тыа хаһаайыстыбатын салаатын, креативнай көрүҥнэр оҥорон таһаарыыларын улаатыннарыыга, байыаннай дьайыы кыттыылаахтарын, элбэх оҕолоох дьиэ кэргэннэри өйөөһүҥҥэ уо.д.а. хайысхаларга соруктары туруорда, Улуу Кыайыы 80 сылын бэлиэтиир кэлэр сылы Ийэ дойдуну көмүскээччи сылынан биллэрдэ.
Туһаайан этиигэ доруобуйа харыстабылыгар улахан болҕомто уурулунна. Билэрбит курдук, Ил Дархан Саха сирин хас биирдии олохтооҕо мэдиссиинэ өҥөтүнэн, үрдүк технологияларынан туһанарыгар улахан соруктары туруорар. Кини Туһаайан этиитигэр Кардиососудистай киин үлэҕэ киириэҕиттэн сүрэх, тымыр ыарыыларыттан дьон олохтон туорааһына 7 % аччаабытын, мэдисиинэ оҥорор өҥөтүн хаачыстыбата 12 % үрдээбитин, Майаҕа, Сангаарга, Намҥа, Ньурбаҕа, Бүлүүгэ уонна Үөһээ Бүлүүгэ саҥа балыыһа комплекстара тутулла туралларын аҕынна.
Ил Дархан Туһаайан этиитигэр кэлэр сылга оҕо доруобуйатын харыстааһыҥҥа «Мэдиссиинэ көмөлөһөөччүтэ» интерактивнай платформа бары улуустарга үлэлиэҕин бэлиэтээтэ.
Бүлүүгэ балыыһа комплексын бастакы уочарата – мэдисиинэ аныгы тэриллэринэн хааччыллыбыт хирургия, реанимация отделениелара, рентген, клиническэй лаборатория үлэҕэ киирэннэр, ыарыһахтарга үрдүк технологиялаах эпэрээссийэлэр оҥоһуллар буоллулар. Ыарыһахтарга олус тупсаҕай усулуобуйалаах хирургияҕа улуустартан ыарыһахтар кытта көрдөһөн кэлэллэрин бэлиэтиэм этэ.
Балыыһа комплексын терапия, оҕо, төрүүр уо.д.а. отделениелара үлэлиэхтээх иккис уочаратын тутуу тэтимнээхтик ыытыллар. Доруобуйа харыстабылын саҥа эбийиэгэ эһиил үлэҕэ киириэҕэ.
Быйыл биһиги улууска доруобуйа харыстабылын саҥа эбийиэгэ – Илбэҥэҕэ 3 куойкалаах быраас амбулаторията үлэҕэ киирдэ. Хампаҕа амбулатория таас дьиэтигэр тымыр-сүрэх эмтиир отделение 10-тан тахса аныгы тренажердарынан, тэриллэринэн толору хааччыллыбыт инсульт, инфаркт кэннэ чөлүгэр түһэрэр филиала үлэтин саҕалаата.
Ил Дархан Айсен Николаев доруобуйа харыстабылын иннигэр туруорар соруктарын толорууга Бүлүү улууһугар үлэ бара турар диэххэ сөп.
Киэһэ Ил Түмэн депутаттарын кытта Ленин проспегар турар IT-паарка дьиэтигэр Арассыыйа Бэрэсидьиэнэ Владимир Путин пресс-конференциятын иһиттибит.
Николай Куприянов.