Сэтинньи 19 күнүгэр Илбэҥэҕэ улууска бастакы аныгы тутуулаах, тупсаҕай оҥоһуулаах быраас амбулаторията үөрүүлээхтик арылынна.
«Бүлүү» федеральнай суолу сыттана сытар Илбэҥэ доруобуйа харыстабыла бөдөҥ эбийиэктэрдээх Бүлүү куоратыттан уонна Бэрдьигэстээх бөһүөлэгиттэн тэйиччи турар буолан, суол быһылааннарыгар эмсэҕэлээбиттэр бастакы көмөнү оҥотторо олохтоох быраас амбулаториятыгар тиийэллэр. Илбэҥэҕэ быраас амбулаторията 1939 сыллааҕы тутуулаах эргэ дьиэҕэ үлэлээн кэлбитэ, саахалланар туруктааҕыттан 2020 сыллаахха стоматология дьиэтигэр көһөрбүттэрэ.
Ол иһин Баппаҕаайы нэһилиэгин дьаһалтата, баһылык Егор Николаев, олохтоохтор, оройуоннааҕы балыыһа, улуус салалтата федеральнай суолга быһылааннар үгүстүк тахсалларынан Илбэҥэҕэ мэдисиинэ аныгы эбийиэгин тутууну туруорсубуттара ыраатта. Даҕатан эттэххэ, быйыл тохсунньу ыйга Илбэҥэҕэ ыытыллыбыт улуус дьаһалтатын отчуотугар оройуон балыыһатын кылаабынай бырааһа, Ил Түмэн депутата Егор Григорьев сайын аныгы быраас амбулаторията тутуллуо диэн эрэннэрбитин олохтоохтор дохсун ытыс тыаһынан көрсүбүттэрэ…
Кылаабынай быраас эппит тыла туолан, сэтинньи 19 күнүгэр Илбэҥэҕэ 3 куойкалаах стационардаах быраас амбулаториятын үөрүүлээх арыйыы сиэрэ-туома тэриллэн илбэҥэлэр туруорсуулара олоххо киирдэ, ыра санаалара туолла.
150 кв м иэннээх дьиэни мэдисиинэ эбийиэктэрин тутууга идэтийэр «Основа» ХЭУо тутааччылара сыл аҥара кэмҥэ туттулар. Бу тэрилтэ Тааһаҕарга ФАП туппутун санатыахха сөп. Олохтоох дьаһалта тутууну ыытарга улахан болҕомтотун уурбута, оннооҕор кэмигэр саҕалыырга — сирин оҥорторууга баһылык бэйэтин хамнаһыттан ботуччу үбү төлөөн турардаах.
Үөрүүлээх тэрээһин ытык кырдьаҕас Матрена Кириллина аал уокка айах тутуутуттан, алгыс тылыттан саҕаланна. Оройуоннааҕы балыыһа кылаабынай бырааһа, Ил Түмэн депутата Егор Григорьев мустубут дьону мэдисиинэ саҥа эбийиэгэ үлэҕэ киирбитинэн эҕэрдэлээтэ, амбулатория сэбиэдиссэйигэр Анна Харлампьеваҕа ытыс тыаһын ортотугар күлүүһү туттарда. Кыһыл лиэнтэни улуус баһылыгын бастакы солбуйааччы Иван Евсеев, Егор Григорьев уонна Анна Харлампьева уруй-айхал ортотугар быстылар.
Амбулатория иһигэр салҕаммыт үөрүүлээх арыйыыга Иван Евсеев, нэһилиэк баһылыгын солбуйааччы Гаврил Алексеев элбэх үтүө тыллары эттилэр, амбулатория үлэһиттэрэ кэлбит дьону бэйэлэрэ астаабыт улахан тортарынан күндүлээтилэр.
Олохтоохтор, ыалдьыттар амбулатория дьиэтин сэргии көрдүлэр, билистилэр. Биир миэстэлээх уонна икки миэстэлээх палаталарга суунар раковиналар туруоруллубуттара сөхтөрдө. Палаталарга Егор Григорьев саҥа үлэҕэ киирбит амбулаторияҕа бэлэхтээбит 2 аныгы смарт тэлэбиисэрдэрэ тураллар. Онон ыарыһахтар Интернеккэ киирэн тугу сөбүлээбиттэрин көрөр кыахтаннылар. Көрүдүөргэ 2 туалет, суунар сирдэр бааллар. Быраас уонна биэлсэр тус-туһунан хоско үлэлиир кыахтаммыттар. Биэлсэр хоһугар аптека үлэлэтиллэр.
Биһиги мэдисиинэ үлэһиттэриттэн кылгас интервьюлары ыллыбыт. П.А.Петров аатынан оройуоннааҕы балыыһа кылаабынай бырааһа, Ил Түмэн депутата Егор Григорьев амбулатория «Доруобуйа» национальнай бырайыак чэрчитинэн тутуллубутун, саҥалыы оҥоһуулаах модульнай балыыһа тутуутун туруорсубутара ырааппытын, биир сүбэнэн ыытыллыбыт түмсүүлээх үлэ түмүгэр саҥа эбийиэк үлэҕэ киирбитин билиһиннэрдэ. Кини амбулатория улууска доруобуйа харыстабылын биир бастыҥ эбийиэгэ буолбутун бэлиэтээтэ. Амбулатория Илбэҥэ уонна Лөкөчөөн олохтоохторун көрөр.
2000 сыллаахтан бырааһынан үлэлиир амбулатория сэбиэдиссэйэ Анна Харлампьева амбулатория дьиэтэ аныгы ирдэбиллэргэ эппиэттиирин, сырдыгын, сылааһын, тупсаҕайын, аныгы мэдисиинэ тэриллэринэн хааччыллан эрэрин, билигин амбулаторияҕа 4 мэдисиинэ сиэстэрэлэрэ, суоппар, дьиэ иһин-таһын, хаһаайыстыбаны көрөр үлэһит үлэлииллэрин билиһиннэрдэ.
Бэйэтэ туспа үлэлиир кабинеттаах биэлсэр Матрена Тарасова 1994 сыллаахтан амбулаторияҕа үлэлиирин, аныгы тутуулаах дьиэҕэ көһөн киирбиттэриттэн улаханнык астынарын, үөрэрин, махтанарын этиннэ.
Баппаҕаайы нэһилиэгин бэтэрээннэрин Сэбиэтин бэрэссэдээтэлэ, үйэтин тухары бэтэринээр бырааһынан үлэлээбит Александра Николаева олохтоохтор ыра санаалара туолбутун, үөрбүттэрин-көппүттэрин, 13 Герой-ийэ нэһилиэккэ олорбутун, доруобуйаларын көрдөрүнэргэ наадыйар аҕам саастаах дьон элбэҕин эттэ.
Үөрүүлээх тэрээһиҥҥэ амбулатория үлэһиттэригэр Ил Түмэн, улуус дьаһалтатын Махтал суруктара, Баппаҕаайы нэһилиэгин тэрилтэлэрин, Ил Түмэн депутата, «Сахатранснефтегаз» кылаабынай инженерэ Александр Гоголев сэмэй бэлэхтэрэ туттарылыннылар.
Ити курдук, оройуон балыыһатын салалтата, нэһилиэк, улуус дьаһалталарын түмсүүлээх үлэлэрин түмүгэр улууска бастакы аныгы тутуулаах быраас амбулаторията үлэҕэ киирдэ.
Николай Куприянов.