Биллэрин курдук, кулун тутар 15-17 күннэригэр РФ Бэрэсидьиэнин быыбара ыытыллар. РФ Киин быыбардыыр хамыыһыйата кэлэр быыбардары билиһиннэриигэ «ИнформУИК» диэн саҥа ньыманы киллэрдэ.
Олунньу 17 күнүттэн кулун тутар 7 күнүгэр диэри дойду үрдүнэн ыытыллар «ИнформУИК» бырайыак кыттааччылара – учаастактааҕы быыбардыыр хамыыһыйалар чилиэннэрэ-кэрийээччилэр хас биирдии быыбардааччыга тиийиэхтээхтэр уонна быыбар туһунан ханнык кэмҥэ ыытылларын, хас хандьытаат турбутун билиһиннэриэхтээхтэр. Итини тэҥэ, кэрийээччилэр быыбардааччы атын сиргэ дуу, бэйэтин быыбардыыр учаастагар дуу, быыбардыыр учаастакка эбэтэр дьиэтигэр куоластыырын билиэхтээхтэр. Атын сиргэ сылдьан куоластыыр буоллаҕына, кэрийээччилэр «Мобильнай быыбардааччы» мэхэньиисим туһунан кэпсиэхтээхтэр, сайабылыанньа биэрии бэрээдэгин билиһиннэриэхтээхтэр.
Быыбардааччылары көрсүөхтээх Бүлүү улууһун учаастактааҕы хамыыһыйаларын чилиэннэрэ тэйиччиттэн элбэх түһүмэхтээх үөрэтиини ааспыттара, тиэстэри туттарбыттара.
Бүлүү улууһугар «ИнформУИК» бырайыакка бэлэмнэнии эрдэттэн саҕаламмыта. ТИК учаастактааҕы быыбардыыр хамыыһыйалар бэрэссэдээтэллэрэ, кэрийээччилэр кыттыылаах социальнай ситимнэргэ бөлөхтөрү арыйбыта, телефон мобильнай приложениетыгар сөпкө үлэлииргэ, «ИнформУИК» туһунан семинар тэрийбитэ. Бүлүүтээҕи ТИК улууска «ИнформУИК» бырайыак ыытылларын хонтуруолга тутар, куратордар УИК-тар чилиэннэригэр сүбэ-ама биэрэллэр.
Хас биирдии учаастактааҕы быыбар хамыыһыйаларыттан үстүү киһи быыбардааччылары дьиэлэринэн сылдьан көрсөллөр, кэпсэтэллэр, быыбар туһунан билиһиннэрэллэр. Улууска 34 учаастактааҕы хамыыһыйа баарын санатыахха сөп. Кэрийээччилэр элбэх нэһилиэнньэлээх, дьиэлээх-уоттаах Бүлүү куоратыгар уонна Кыһыл Сыыр бөһүөлэгэр үлэлииллэригэр уустугун бэлиэтиэххэ сөп.
Быыбардааччыларга сылдьар УИК чилиэннэрэ быыбар символикалаах анал маҥан таҥастаахтар, ааттара-суоллара ыйыллар бейджиктаахтар, быыбардааччыларга туттарарга быыбары билиһиннэрэр бэчээттэммит матырыйааллардаахтар.
Бүлүү улууһун үрдүнэн барыта 7184 дьиэ уонна квартира учуокка турар буоллаҕына, олунньу 25 күнүн туругунан, Бүлүү улууһугар 102 кэрийээччи 3835 дьиэлэргэ уонна квартираларга сырытта. Ол эбэтэр учаастактааҕы быыбар хамыыһыйаларын чилиэннэрэ дьиэлэр уонна квартиралар 53,4 % сырыттылар. Ити биир үчүгэй көрдөрүүгэ киирсэр.
— Учаастактааҕы быыбардыыр хамыыһыйалар чилиэннэрэ-кэрийээччилэр элбэх быыбардааччыга сырыттылар. Быыбардааччылар быыбары билиһиннэрэр учаастактааҕы быыбардыыр хамыыһыйалар чилиэннэрин үчүгэйдик көрсөллөр. «ИнформУИК» бырайыак улууска тэтимнээхтик бара турар, — диэн ТИК бэрэссэдээтэлэ Тимофей Иванов билиһиннэрдэ.
Эмиэ ити күҥҥэ Саха сирин үрдүнэн УИК-тар чилиэннэрэ 222 тыһ быыбардаачылары көрсүбүттэрин, 179 тыһ дьиэлэргэ уонна квартираларга сылдьыбыттарын Саха сиринээҕи Киин быыбардыыр хамыыһыйа биллэрдэ.
Олунньу 17 күнүттэн РФ Бэрэсидьиэнин дуоһунаһыгар хандьытааттар телевидениеҕа, бэчээккэ уонна сетевой таһаарыыларга быыбар иннинээҕи аҕытаассыйаларын ыытар кыахтаннылар. Быыбар иннинээҕи аҕытаассыйа кулун тутар 15 күнүгэр 00.00 чааска түмүктэниэхтээх.
Николай Куприянов.